ព័ត៌មានអន្ដរជាតិ

លោក ម៉ាឌូរ៉ូ ត្រៀមប្រកាសដាក់ប្រទេសក្នុងភាពអាសន្ន បើអាមេរិកវាយប្រហារវេណេស៊ុយអេឡា

បានផុស

១០ ខែ មុន

នៅ

ថ្ងៃអង្គារ ៣០ កញ្ញា ២០២៥

ដោយ

Chheang

ប្រធានាធិបតីវេណេស៊ុយអេឡា នីកូឡាស ម៉ាឌូរ៉ូ បានត្រៀមខ្លួនរួចជាស្រេចដើម្បីប្រកាសដាក់ប្រទេសក្នុងភាពអាសន្ន ប្រសិនបើសហរដ្ឋអាមេរិកបើកការវាយប្រហារយោធាលើទឹកដីរបស់ខ្លួន។ នេះបើយោងតាមការលើកឡើងរបស់អនុប្រធានាធិបតី លោកស្រី Delcy Rodríguez កាលពីថ្ងៃចន្ទទី២៩ខែកញ្ញាឆ្នាំ២០២៥ ដោយព្រមានអំពីផលវិបាក «ដ៏មហន្តរាយ» បើសេណារីយ៉ូបែបនេះកើតឡើងមែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍នេះ ធ្វើឡើងនៅពេលដែលភាពតានតឹងរឹតតែក្ដៅគគុក បន្ទាប់ពីការដាក់ពង្រាយកងទ័ពជើងទឹកអាមេរិកនាពេលថ្មីៗនេះ នៅតំបន់ការ៉ាប៊ីន និងការវាយប្រហារតាមអាកាសលើកប៉ាល់វេណេស៊ុយអេឡា ដែលក្រុងវ៉ាស៊ីនតោនអះអាងថា ជាផ្នែកមួយនៃយុទ្ធនាការប្រឆាំងនឹងក្រុមជួញដូរគ្រឿងញៀនអាមេរិកឡាទីន។ មន្ត្រីវេណេស៊ុយអេឡា បាននិយាយថា មនុស្សយ៉ាងហោចណាស់ ១៧នាក់ត្រូវបានសម្លាប់ក្នុងការវាយប្រហារ។

លោកស្រី Rodríguez បានច្រានចោលការបញ្ជាក់របស់សហរដ្ឋអាមេរិកថាជា «ការភូតកុហកដ៏ធំមួយ» ដោយចោទប្រកាន់ក្រុងវ៉ាស៊ីនតោនថាតាមពិតមានបំណងចង់បានគ្រប់គ្រងធនធានធម្មជាតិដ៏ច្រើនរបស់វេណេស៊ុយអេឡា ដូចជា ប្រេង ឧស្ម័ន មាស និងរ៉ែ។

ប្រសិនបើត្រូវបានអនុម័ត ការប្រកាសភាពអាសន្ននឹងផ្តល់ឲ្យលោក ម៉ាឌូរ៉ូ នូវអំណាចបន្ថែមទៀត រួមទាំងសមត្ថភាពក្នុងការប្រមូលផ្តុំកងកម្លាំងប្រដាប់អាវុធ បិទព្រំដែន និងដាក់យោធាឲ្យទទួលខុសត្រូវលើហេដ្ឋារចនាសម្ព័ន្ធសំខាន់ៗ។ ការដាក់រដ្ឋក្នុងភាពអាសន្ន មានរយៈពេល៩០ថ្ងៃ ហើយអាចបន្តរយៈពេល៩០ថ្ងៃទៀតបើចាំបាច់។

សារព័ត៌មាន NBC បានរាយការណ៍កាលពីសប្តាហ៍មុនថា អ្នករៀបចំផែនការយោធាអាមេរិកកំពុងថ្លឹងថ្លែងការវាយប្រហារបន្ថែមប្រឆាំងនឹងអ្នកជួញដូរគ្រឿងញៀនដែលសង្ស័យនៅក្នុងប្រទេសវេណេស៊ុយអេឡា ដោយប្រើប្រាស់យន្តហោះគ្មានមនុស្សបើក «ក្នុងរយៈពេលប៉ុន្មានសប្តាហ៍ខាងមុខនេះ»៕

ដោយ៖ ឈាង

ចុចអាន៖ វេណេស៊ុយអេឡាពន្លះអាមេរិកនៅក្នុងសន្និបាតអង្គការសហប្រជាជាតិ