ព័ត៌មានអន្ដរជាតិ

វេណេស៊ុយអេឡាពន្លះអាមេរិកនៅក្នុងសន្និបាតអង្គការសហប្រជាជាតិ

បានផុស

៩ ខែ មុន

នៅ

ថ្ងៃសៅរ៍ ២៧ កញ្ញា ២០២៥

ដោយ

ក្នុងពេលថ្លែងទៅកាន់មហាសន្និបាតអង្គការសហប្រជាជាតិនៅថ្ងៃសុក្រ រដ្ឋមន្ត្រីការបរទេសវេណេស៊ុយអេឡាបានចោទប្រកាន់សហរដ្ឋអាមេរិក ថា បានប្រឌិត «ការភូតភរ និងភូតកុហក» ដើម្បីបង្ហាញអំពីភាពត្រឹមត្រូវនៃការកសាងយោធានៅតំបន់សមុទ្រការ៉ាបៀន ដោយព្រមានថា វាជាផ្នែកនៃយុទ្ធនាការបង្ខំឱ្យមានការផ្លាស់ប្តូររបបនៅទីក្រុងការ៉ាកាសប៉ុណ្ណោះ។

លោក Yvan Gil Pinto រដ្ឋមន្ត្រីការបរទេសវេណេស៊ុយអេឡា។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅមុនកិច្ចប្រជុំមហាសន្និបាតអង្គការសហប្រជាជាតិប៉ុន្មានថ្ងៃ ជម្លោះវោហាស័ព្ទរវាងប្រធានាធិបតីសហរដ្ឋអាមេរិក លោក ដូណាល់ ត្រាំ និង ប្រធានាធិបតីវេណេស៊ុយអេឡា លោក នីកូឡាស ម៉ាឌូរ៉ូ (Nicolas Maduro) បានកើតឡើងដែលស្ទើរតែផ្ទុះអាវុធទ្រង់ទ្រាយធំទៅហើយ បន្ទាប់យោធាសហរដ្ឋអាមេរិកបើកការវាយប្រហារលើនាវារបស់វេណេស៊ុយអេឡា ដោយចោទថា លោក ម៉ាឌូរ៉ូ បានជាប់ពាក់ព័ន្ធ។

ប៉ុន្តែលោក ម៉ាឌូរ៉ូ បានច្រានចោលការចោទប្រកាន់ និងបានសរសេរលិខិតទៅបញ្ជាក់ប្រាប់ប្រធានាធិបតីសហរដ្ឋអាមេរិក លោក ដូណាល់ ត្រាំ ដោយបញ្ជាក់ពីភាពគ្មានពាក់ព័ន្ធ ហើយភាពតានតឹងក៏ចាប់ផ្តើមធូរស្រាលវិញ។

ការធ្វើសមយុទ្ធយោធាសហរដ្ឋអាមេរិកនៅសមុទ្រការ៉ាបៀន។ Reuters

តាមសេចក្តីរាយការណ៍របស់រ៉យទ័រ លោក Yvan Gil Pinto រដ្ឋមន្ត្រីការបរទេសវេណេស៊ុយអេឡា បានថ្លែងថា៖«ថ្ងៃនេះការឈ្លានពានគឺសំដៅទៅលើប្រទេសវេណេស៊ុយអេឡា ដែលជាប្រទេសមានសន្តិភាពនិងគាំទ្រ ដូចប្រទេសវេណេស៊ុយអេឡា»។

លោក រដ្ឋមន្ត្រីបានបន្តថា៖«វាមិនអាចត្រូវបានគេចោទប្រកាន់ថាមានអាវុធប្រល័យលោក ឬអាវុធនុយក្លេអ៊ែរនោះទេ។ សព្វថ្ងៃនេះ ពួកគេបង្កើតការភូតកុហក និងអសុរោះ ដែលគ្មាននរណាម្នាក់ជឿ ទាំងនៅក្នុងសហរដ្ឋអាមេរិក និងក្នុងពិភពលោក ដើម្បីបង្ហាញអំពីភាពត្រឹមត្រូវនៃការគំរាមកំហែងយោធាមួយលានលានដ៏ឃោរឃៅ ហួសហេតុ និងអសីលធម៌»។

លោក Pinto បាននិយាយថា គោលដៅរបស់ទីក្រុងវ៉ាស៊ីនតោនគឺ «នាំយកសង្រ្គាមទៅកាន់តំបន់ការ៉ាបៀន និងអាមេរិកខាងត្បូង ដើម្បីរុញច្រានការផ្លាស់ប្តូររបប ដែលនឹងអនុញ្ញាតឱ្យពួកគេលួចទ្រព្យសម្បត្តិប្រេង និងឧស្ម័នដែលមិនអាចគណនាបានរបស់វេណេស៊ុយអេឡា»។

ប្រឈមការគាំរាមបែបនេះពីសំណាក់សហរដ្ឋអាមេរិក លោកបានបន្ថែមថា៖«ការគំរាមកំហែង ការភូតភរ ឬកាណុងមិនបំភ័យយើងឡើយ»។

កាលថ្ងៃព្រហស្បតិ៍យោធាសហរដ្ឋអាមេរិក បានធ្វើលំហាត់សមយុទ្ធនៅលើឆ្នេរខ្សាច់ក្នុងទីក្រុង Arroyo រដ្ឋដែនដី ព័រតូរីកូ (Puerto Rico) នៅឈូងសមុទ្រការ៉ាបៀន។ នៅក្នុងវីដេអូដែលចងក្រងដោយទីភ្នាក់ងារព័ត៌មានរ៉យទ័រ គេសង្កេតឃើញ កងយោធាសហរដ្ឋអាមេរិក បានដាក់ពង្រាយកងទ័ព កប៉ាល់ និងរថពាសដែក រថយន្តដឹកយោធា ក្នុងការបង្ហាញសមត្ថភាពដឹកជញ្ជូន និងនាវាចរណ៍៕

រ៉ាន់ រើយ