ព្យុះត្រូពិច Imelda សម្លាប់មនុស្ស២នាក់ក្នុងប្រទេសគុយបា ខណៈរាប់ម៉ឺននាក់ត្រូវជម្លៀសចេញ

ព្យុះត្រូពិច Imelda បានវាយលុកភាគខាងកើតប្រទេសគុយបា បណ្តាលឱ្យមានបំណាក់ដី និងទឹកជំនន់ធ្ងន់ធ្ងរ សម្លាប់មនុស្សយ៉ាងហោចណាស់ ២ នាក់ស្លាប់ និងរាប់ពាន់នាក់ត្រូវជម្លៀសចេញ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី៣០ខែកញ្ញា។

ក្រៅពីមានអ្នកស្លាប់ ភ្លៀងធ្លាក់យ៉ាងគំហុកដោយសារព្យុះនេះបានកាត់ផ្តាច់សហគមន៍ចំនួន១៧ នៅក្នុងខេត្ត Santiago de Cuba ដោយមនុស្សជាង ២ ម៉ឺន​៤ពាន់ នាក់ត្រូវជាប់គាំង។ ផ្លូវត្រូវបានបិទដោយសារបំណាក់ដី និងទឹកទន្លេហូរហៀ ដែលធ្វើអោយមានភាពស្មុគស្មាញដល់កិច្ចខិតខំប្រឹងប្រែងសង្គ្រោះ។ ចំណែកនៅក្នុងខេត្ត Guantanamo អ្នកស្រុកជាង ១ម៉ឺន៨ពាន់ត្រូវជម្លៀសទៅកាន់តំបន់មានសុវត្ថិភាព ដោយសារទឹកជំនន់បានគំរាមកំហែងដល់ផ្ទះសម្បែង និងហេដ្ឋារចនាសម្ព័ន្ធខ្លាំងពេក។ អាជ្ញាធរ​គុយបាក៏បាន​ព្រមាន​ថា ចំនួន​គ្រួសារ​ដែល​រង​ផល​ប៉ះពាល់​អាច​នឹង​កើន​ឡើង។

ប្រព័ន្ធផ្សព្វផ្សាយរដ្ឋគុយបាបានរាយការណ៍ពីការខូចខាតយ៉ាងធំធេងទៅលើដំណាំ អគ្គិសនី និងបណ្តាញដឹកជញ្ជូន ដោយវាបានបន្ថែមលើការលំបាករបស់ប្រជាជនគុយបាជាច្រើនដែលប្រឈមមុខនឹងការខ្វះខាតស្បៀងអាហារ និងការផ្គត់ផ្គង់ជាចាំបាច់រួចស្រាប់ទៅហើយថែមទៀត។ នៅពេលនេះក្រុមជួយសង្គ្រោះ និងអ្នកស្ម័គ្រចិត្ដក្នុងតំបន់ត្រូវបានចល័តដើម្បីផ្តល់ជំនួយ និងស្ដារលទ្ធភាពចូលទៅកាន់តំបន់កាត់ផ្តាច់ ប៉ុន្តែអាជ្ញាធរបានព្រមានថា ភ្លៀងនៅតែបន្តធ្លាក់អាចធ្វើឲ្យស្ថានភាពកាន់តែអាក្រក់ទៅៗ៕

អត្ថបទ៖ ប៊ុន សុភាព