វៀតណាម ជួបព្យុះថ្មីមួយទៀត បន្ទាប់ពីព្យុះចាស់ សម្លាប់មនុស្ស៣៩នាក់ និងបំផ្លិចបំផ្លាញធំធេង

យោងតាមមជ្ឈមណ្ឌលជាតិសម្រាប់ការព្យាករអាកាធាតុវៀតណាម, ប្រទេសនេះនឹងជួបព្យុះមួយទៀត ដែលនឹងវាយប្រហារដីគោកនៅចុងសប្តាហ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន Vietnam Net ផ្សាយថា បច្ចុប្បន្នព្យុះឈ្មោះ Matmo នេះកំពុងស្ថិតនៅភាគខាងកើតដែនទឹកហ្វីលីពីន ហើយនឹងទៅដល់ដីគោកវៀតណាមនៅថ្ងៃសោរ៍ទី៤ខែតុលា ជាមួយកម្លាំងខ្យល់ខ្លាំង។

ព្យុះថ្មីនឹងវាយប្រហារវៀតណាម ស្របពេលប្រទេសនេះមិនទាន់ធូរស្បើយស្រួលបួលផង ពីឥទ្ធិពលព្យុះប៊ូឡូយ ដែលបណ្តាលឲ្យមនុស្ស៣៩នាក់ស្លាប់ របួស១៤៧នាក់និង២១នាក់​បាត់ខ្លួនភាគច្រើនដោយសារបាក់ដីនិងទឹកជំនន់។

លើសពីនេះ បើយោងតាមនាយកដ្ឋានគ្រប់គ្រងនិងការពារគ្រោះធម្មជាតិវៀតណាម, ក្រៅពីជនរងគ្រោះ ខ្យល់ព្យុះក៏ធ្វើឲ្យផ្ទះ​១៦០​ខ្នងបាក់​រលំ និង​ជិត​១៥៥ ០០០​ខ្នង​រង​ការ​ខូចខាតផងដែរ។

មិនត្រឹមប៉ុណ្ណឹង ដីកសិកម្មជាង ៥១ ០០០ហិកតានិងវារីវប្បកម្ម ១៣ ៤០០ហិកតា ត្រូវទឹកជន់លិច រីឯសត្វចិញ្ចឹម ១ ៦០០ក្បាលនិងបក្សី៤០៥ ០០០ក្បាលត្រូវងាប់។

ទន្ទឹមនោះ សាលារៀន១ ៤០០កន្លែងបានរងផលប៉ះពាល់ ចំណែកផ្លូវថ្នល់ ៦ ៨០០ខ្សែនៅប៉ែកខាងជើងត្រូវទឹកជន់លិច ខណៈបង្គោលភ្លើង ៨ ២០០ដើមបានបាក់ កាត់ផ្តាច់អគ្គិសនីដល់មនុស្ស ២.៧លាននាក់។

សរុបជារួម ព្យុះប៊ូឡូយ បានបង្កការខាត់បង់ផ្នែកសេដ្ឋកិច្ចគិតជាទំហំទឹកប្រាក់ ជាង ១១ ៤០០ពាន់លានដុង ក្នុងនោះខេត្តHa Tinh ធ្ងង់ធ្ងរជាងគេដោយខាតអស់ ៦ ០០០ពាន់លានដុង បន្ទាប់មក Lao Cai ២ ៧៥០ពាន់លានដុងនិង Nghe An ១ ៦០០ពាន់លានដុង៕

អត្ថបទ៖ សុខ សុវណ្ណ

ចុចអាន៖ ព្យុះ Bualoi បង្កការបំផ្លិចបំផ្លាញធ្ងន់ធ្ងរក្នុងប្រទេសវៀតណាម ខណៈអ្នកស្លាប់កើនដល់២៦នាក់