ក្រុមហាម៉ាសនឹងឆ្លើយតបឆាប់ៗចំពោះសំណើបញ្ចប់សង្គ្រាមនៅហ្គាហ្សា របស់ត្រាំ

យោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១ខែតុលា មន្ត្រីក្រុមហាម៉ាសបាននិយាយថា ពួកគេនឹងឆ្លើយតបឆាប់ៗនេះចំពោះផែនការដែលស្នើឡើងដោយប្រធានាធិបតីអាមេរិក លោក ដូណាល់ ត្រាំ ដើម្បីបញ្ចប់សង្រ្គាមជិតពីរឆ្នាំរបស់អ៊ីស្រាអែលនៅលើតំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សំណើ​២០​ចំណុច​រួម​មាន​បទ​ឈប់​បាញ់​ជា​បន្ទាន់ ការ​ផ្លាស់​ប្តូរ​ឈ្លើយសឹក ការ​ដក​ខ្លួន​របស់​អ៊ីស្រាអែល ការ​រំសាយ​អាវុធ​របស់​ក្រុមហាម៉ាស និង​រដ្ឋាភិបាល​អន្តរកាល​សម្រាប់​តំបន់ហ្គាហ្សា។ ខណៈពេលដែលលោក ត្រាំ ទុកពេលឱ្យក្រុម ហាម៉ាស ពី ៣ ទៅ ៤ ថ្ងៃដើម្បីសម្រេចចិត្ត មេដឹកនាំក្រុម ហាម៉ាស លោក Mohammed Nazzal បាននិយាយថា ក្រុមនឹងពិនិត្យមើលផែនការនេះដោយប្រុងប្រយ័ត្ន ដើម្បីធានាថាវាការពារផលប្រយោជន៍ប៉ាឡេស្ទីន។

អេហ្ស៊ីប កាតា និងតួកគី កំពុងសម្រុះសម្រួលដើម្បីជំរុញក្រុមហាម៉ាសឆ្ពោះទៅរកការទទួលយកកិច្ចព្រមព្រៀងនេះ ទោះបីជាអេហ្ស៊ីបបានព្រមានថាបញ្ហាសំខាន់ៗដូចជាអភិបាលកិច្ច និងសន្តិសុខនៅតែមិនទាន់ដោះស្រាយនៅឡើយ។ រដ្ឋមន្ត្រីការបរទេសអេហ្ស៊ីបលោក Badr Abdelatty បាននិយាយថា ក្រុមហាម៉ាសត្រូវតែដកអាវុធដើម្បីការពារអ៊ីស្រាអែលពីការប្រើប្រាស់វាជាលេសសម្រាប់ការវាយប្រហារបន្ថែមទៀត ប៉ុន្តែបានប្រឆាំងយ៉ាងខ្លាំងចំពោះផែនការណាមួយដែលអាចនាំឱ្យមានការផ្លាស់ទីលំនៅរបស់ប៉ាឡេស្ទីន។

គួរបញ្ជាក់ថា វិបត្តិមនុស្សធម៌នៅហ្គាហ្សាកាន់តែធ្ងន់ធ្ងរដោយក្រសួងសុខាភិបាលប៉ាឡេស្ទីនរាយការណ៍ថាមានអ្នកស្លាប់ជាង ៦៦,០០០ នាក់ ដែលភាគច្រើនជាស្ត្រី និងកុមារ ចាប់តាំងពីការវាយលុករបស់អ៊ីស្រាអែលបានចាប់ផ្តើម ខណៈអ្នកជំនាញនិយាយថាចំនួនអ្នកស្លាប់ពិតប្រាកដអាចខ្ពស់ជាងនេះឆ្ងាយ៕

អត្ថបទ៖ ប៊ុន សុភាព