ចង់​កែ​សម្ផស្ស​ដោយ​ប្រើ​ថ្នាំ Botox ត្រូវ​ដឹង​ពី​ថ្នាំ​នេះ​ឲ្យ​ច្បាស់​សិន

សម័យ​នេះ ទាំង​ស្រី​ទាំង​ប្រុស អ្នក​ណា​មិន​ចង់​ស្អាត ប៉ុន្តែ​បើ​ចង់​ស្អាត​ដោយ​សារ​កែ​សម្ផស្ស​ត្រូវ​ដឹង​ពី គុណ​សម្បត្តិ និង​គុណ​វិបត្តិ​ផង។ បច្ចុប្បន្ន ថ្នាំ​កែ​សម្ផស្ស​ពេញ​និយម​បំផុត ឃើញ​គេ​ប្រើ​ច្រើន​ ឈ្មោះ​ថា Botox ប៉ុន្តែ​គ្នា​យើង​មាន​ស្គាល់​ថ្នាំ​ប្រភេទ​នេះ​ច្បាស់​អត់?

១- អ្វី​ជាថ្នាំ Botox?

Botox ជា​ថ្នាំ​មួយ​ប្រភេទ​ចម្រាញ់​ចេញ​ពី​មេរោគ​មួយ​ប្រភេទ​ឈ្មោះ Clostridium (មេ​រោគ​បង្ក​ឲ្យ​រាក​រូស) ហើយ​ត្រូវ​ក្រុម​វេជ្ជបណ្ឌិត និង​អ្នក​ជំនាញ​ខាង​កែ​សម្ផស្ស យក​មក​ប្រើប្រាស់​ជាច្រើន​ឆ្នាំ​មក​ហើយ ដើម្បី​បំបាត់​ស្នាម​ជ្រីវជ្រួញ និង​ធ្វើ​ឲ្យ​ផ្ទៃមុខ​មាន​ផ្នត់ ឬ​ចង្កា​ព្រែក​តាម​បំណង។

២- ថ្នាំ Botox ដំណើរការបែបណា?

វា​ជា​សារធាតុ​ពុល​ដ៏​គ្រោះថ្នាក់​បំផុត បើ​សិន​ជា​ប្រើ​លើស​កម្រិត ប៉ុន្តែ​តាម​ការ​បញ្ជាក់​ពី​ក្រុម​គ្រូពេទ្យ ថ្នាំ​នេះ​មាន​ប្រូតេអ៊ីន​ព្យាបាល​រោគ​ដ៏​មាន​ប្រសិទ្ធភាព បើ​ប្រើ​ក្នុង​បរិមាណ​មួយ​សមស្រប។ កោសិកា​ប្រសាទ​បញ្ចេញ​សារធាតុ Acetylcholine បញ្ចូល​ទៅ​ក្នុង​សាច់ដុំ​ពេល​ចាក់​ថ្នាំ Botox ចូល​ក្នុង​រាងកាយ នាំ​ឲ្យ​សាច់ដុំ​អសកម្ម​មិន​អាច​កន្ត្រាក់​បាន។

៣- ការ​ប្រើ​ថ្នាំ Botox

ក្នុង​វិស័យ​វេជ្ជសាស្ត្រ និង​គ្រឿង​សម្អាង Botox ជា​ថ្នាំ​មាន​ប្រយោជន៍​បំផុត​សម្រាប់​វិស័យ​វេជ្ជសាស្ត្រ និង​កែ​សម្ផស្ស ត្រូវ​បាន​ក្រុម​គ្រូ​ពេទ្យ និង​អ្នក​ឯកទេស​ជាច្រើន​ប្រើប្រាស់​ក្នុង​ការ​ព្យាបាល​បំបាត់​ស្នាម​ជ្រីវជ្រួញ​លើ​ផ្ទៃមុខ​កែ​ត្របកភ្នែក​អោយ​មាន​ផ្នត់​ បបូរ​មាត់​ព្រែក កែ​ចង្កា​ស្រួច​ជាដើម។ លើស​ពី​នេះ​​Botox ក៏ ត្រូវ​បាន​ប្រើ​​ប្រាស់​ផ្នែក​វេជ្ជសាស្ត្រ ជា​ថ្នាំ​អាច​ព្យាបាល​ជំងឺ​ជាច្រើន ដែល​ទាក់ទង​នឹង​មុខងារ​របស់​រាងកាយ​ដូច​ជា៖

– ព្យាបាល​ការ​ឈឺចាប់​សាច់ដុំ​ក បណ្ដាល​មក​ពី​សាច់ដុំរួញ
– ព្យាបាល​ការ​កន្ត្រាក់​សាច់ដុំ (រមួល​ក្រពើ)
– ព្យាបាល​ឈឺក្បាល បណ្ដាល​ឲ្យ​ស្រលៀង​ភ្នែក
– ព្យាបាល​ឈឺក្បាល​រ៉ាំរ៉ៃ
– ព្យាបាល​បញ្ហា​បែក​ញើស​ច្រើន
– ព្យាបាល​បញ្ហា​ប្លោកនោម​ខ្សោយ។

៤- ផល​ប៉ះពាល់​នៃ​ថ្នាំ Boto

ក្រៅពី​ផ្ដល់​អត្ថប្រយោជន៍​ខាង​វេជ្ជសាស្ត្រ និង​កែ​សម្ផស្ស​ ក៏​មាន​ផល​ប៉ះ​ពាល់​បន្ទាប់​បន្សំ​មួយ​ចំនួន​ក្រោយ យើង​ចាក់​ថ្នាំ​នេះ​រួច។
ផល​រំខាន​ទាំងនេះ មាន​ដូចជា​ ឈឺក្បាល គ្រុន​ផ្ដាសាយ​ ស្ងួត​មាត់​ ចេញ​កន្ទួល​ ពិបាក​ដកដង្ហើម​ ធ្លាក់​ត្របកភ្នែក​ ឬ​ហើម​ ជាំ​ត្រង់​កន្លែង​ចាក់ថ្នាំ​ជាដើម ។ ក្នុង​ករណី​ធ្ងន់ធ្ងរ គ្នា​យើង​មាន​ជំងឺ អាច​មាន​បញ្ហា​សាច់ដុំ​ ភ្នែក​មើល​ពុំ​ច្បាស់​ ពិបាក​និយាយ ឬ​លេប​អាហារ​ ពិបាក​ដក​ដង្ហើម ប្លោក​នោម​មាន​បញ្ហា។ ហើយ​បើ​បញ្ហា​នេះ​កើត​ឡើង​សូម​ទាក់ទង​ទៅ​វេជ្ជបណ្ឌិត​ជាបន្ទាន់៕

អត្ថបទផ្ដល់សិទ្ធិ៖ Hello គ្រូពេទ្

ចុចអាន៖ លេប​ថ្នាំ Gluta ឲ្យ​ស្បែក​ស អាច​ប៉ះពាល់​ដល់​ក្រពះ​ពោះវៀន​អត់?

ចុចអាន៖ មុន​សាក់​ចិញ្ចើម គួរ​ដឹង​ពី​គុណ​សម្បត្តិ និង​គុណវិបត្តិ​ទាំងនេះ