អ្នកវិទ្យាសាស្រ្តព្រមាន វីរុសបំប្លែងខ្លួនថ្មីៗ នឹងធ្ងន់ធ្ងរជាង អូមីក្រុង

វីរុសកូវីដ១៩បំប្លែងខ្លួនប្រភេទថ្មីៗ អាចធ្ងន់ធ្ងរជាង អូមីក្រុង ហើយរដូវរងានាពេលអនាគត នឹងពិបាក។ នេះបើតាមការព្រមានពីទីប្រឹក្សាវេជ្ជសាស្ត្រកំពូលរបស់រដ្ឋាភិបាលអង់គ្លេស កាលពីថ្ងៃចន្ទទី២១ខែកុម្ភៈ។

ថ្លែងនៅក្នុងសន្និសីទសារព័ត៌មាន Downing Street, ប្រធានផ្នែកវេជ្ជសាស្រ្តរបស់ប្រទេសអង់គ្លេស លោកសាស្ត្រាចារ្យ Sir Chris Whitty បានសង្កត់ធ្ងន់ថា វីរុសកូវីដបំប្លែងខ្លួនថ្មី អាចបណ្តាលឲ្យមានបញ្ហាសំខាន់ៗ រួមទាំងហានិភ័យចូលព្យាបាលក្នុងមន្ទីរពេទ្យខ្ពស់ជាង អូមីក្រុង ផងដែរ។

ទន្ទឹមនឹងនេះ លោក Sir Patrick Vallance ប្រធានទីប្រឹក្សាវិទ្យាសាស្ត្ររបស់ប្រទេសអង់គ្លេស បានបន្ថែមថា “មេរោគនឹងបន្តវិវត្ត ហើយវាអាចនឹងប្រែប្រួលក្នុងល្បឿនលឿនបំផុត សម្រាប់រយៈពេលប្រាំឆ្នាំខាងមុខ។ រឿង​មួយ​ដែល​មេរោគ​​បាន​បង្រៀន​យើង ​គឺ​កុំព្រហើន”​។

ការអត្ថាធិប្បាយនេះបានធ្វើឡើង ប៉ុន្មានម៉ោងបន្ទាប់ពីលោកនាយករដ្ឋមន្ត្រី Boris Johnson បានបង្ហាញផែនការ រស់នៅជាមួយកូវីដ ដោយប្រកាសថា តម្រូវការផ្លូវច្បាប់សម្រាប់អ្នកដែលធ្វើតេស្តវិជ្ជមានកូវីដ ហើយធ្វើចត្តាឡីស័ក នឹងត្រូវដកចេញនៅថ្ងៃព្រហស្បតិ៍នេះ។

ផែនការរបស់លោកនាយករដ្ឋមន្ត្រី ក៏នឹងបញ្ចប់ការធ្វើតេស្តលើអ្នកចេញរោគសញ្ញា និងមិនចេញរោគសញ្ញាដោយឥតគិតថ្លៃនៅក្នុងប្រទេសអង់គ្លេសចាប់ពីថ្ងៃទី ១ខែមេសាផងដែរ៕

ប្រែសម្រួល៖ Vann Vann

ប្រភព៖ Sky

ចុចអាន៖ កុំមើលស្រាល! អូមីក្រុង វាយលុកខ្លាំងឡើងៗ ថៃប្រកាសអាសន្នហើយ