កុំមើលស្រាល! អូមីក្រុង វាយលុកខ្លាំងឡើងៗ ថៃប្រកាសអាសន្នហើយ (មានវីដេអូ)

ក្រសួង​សុខាភិបាល​សាធារណៈថៃ​ បាន​ដំឡើង​ការ​ប្រកាស​អាសន្ន​ជំងឺ​កូវីដ-១៩ ដល់​កម្រិត​ទី៤ បន្ទាប់​ពី​មាន​ការ​កើន​ឡើង​យ៉ាង​ខ្លាំង​នៃករណីឆ្លងវីរុសបំប្លែងខ្លួន អូមីក្រុង ទូទាំង​ប្រទេស។

ទោះបីជាយ៉ាងណាក៏ដោយ​ ក្រសួងនិយាយថា មជ្ឈមណ្ឌលគ្រប់គ្រងស្ថានភាពជំងឺកូវីដ១៩ (CCSA) បានបង្ហាញថា នឹងមិនមានការបិទខ្ទប់ជាថ្មីនោះទេ។

អ្នកនាំពាក្យក្រសួងលោក Rungrueng Kijphati បានបង្ហោះនៅលើ Facebook កាលពីថ្ងៃចន្ទទី២១ខែកុម្ភៈថា កិច្ចប្រជុំនៃមជ្ឈមណ្ឌលប្រតិបត្តិការសង្គ្រោះបន្ទាន់ (EOC) របស់ក្រសួង បានសម្រេចថា កម្រិតប្រកាសអាសន្ននឹងត្រូវដំឡើងទូទាំងប្រទេស ហើយវិធានការទប់ស្កាត់ត្រូវបង្កើន នៅក្នុងតំបន់ដែលមានហានិភ័យខ្ពស់។

រឿងនេះកើតឡើងស្របពេលដែលចំនួននៃការឆ្លងថ្មី ករណីធ្ងន់ធ្ងរ និងការស្លាប់នៅតែបន្តកើនឡើង ដោយអាជ្ញាធរបានកត់សម្គាល់ពីហានិភ័យនៃការឆ្លងខ្ពស់ ក្នុងចំណោមសមាជិកគ្រួសារ និងអ្នកជិតស្និទ្ធ ដែលបានចូលរួមក្នុងសកម្មភាពជួបជុំដូចជា ការទទួលទានអាហារខាងក្រៅផ្ទះ ការលេងកីឡា ការ​ចូលរួម​ក្នុង​ពិធី​មង្គលការ និង​បុណ្យសព។

លោកបានបន្ថែមថា បុគ្គលមកពីក្រុមមានហានិភ័យរួមទាំងមនុស្សចាស់ អ្នកដែលមានជំងឺរ៉ាំរ៉ៃ និងអ្នកមិនចាក់វ៉ាក់សាំង នៅតែរួមចំណែកភាគច្រើនក្នុងចំណោមអ្នកស្លាប់ដោយសារកូវីដ។

ក្រោមការជូនដំណឹងថ្មីនេះ ប្រជាជនត្រូវបានលើកទឹកចិត្តឲ្យធ្វើការពីផ្ទះ ចៀសវាងការធ្វើដំណើរឆ្លងខេត្តដែលមិនសំខាន់ ផ្អាកការធ្វើដំណើរទៅក្រៅប្រទេស បិទកន្លែងដែលមានហានិភ័យ និងចៀសវាងការជួបជុំទ្រង់ទ្រាយធំ។

គួរបញ្ជាក់ថា ក្រសួង​បាន​ដំឡើង​ការ​ប្រកាស​អាសន្ន​ដល់​កម្រិត​ទី​៤​ក្នុង​ខេត្ត​ជាតំបន់​ក្រហម​មួយ​ចំនួន​កាល​ពី​ដើម​ខែ​មុន ពេលដែល​ស្ថានភាព​មិន​សូវ​ធ្ងន់ធ្ងរដូចពេល​នេះ។ ប៉ុន្តែការប្រកាសចុងក្រោយនេះ គឺនឹងអនុវត្តចំពោះគ្រប់ខេត្តទូទាំងប្រទេស៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Bangkok Post

ចុចអាន៖ អូមីក្រុងបំបាំងកាយ នឹងជំរុញការឆ្លងកូវីដនៅថៃ កើនដល់ ១០ម៉ឺនករណី ក្នុងមួយថ្ងៃ