សុខភាព

អ្វីទៅជាជំងឺខ្សោយពោះវៀន?

បានផុស

៦ years មុន

នៅ

ថ្ងៃចន្ទ ២៨ ធ្នូ ២០២០

ដោយ

១) អ្វីទៅជាជំងឺខ្សោយពោះវៀន(Irritable Bowel Syndrome)?

ជាបណ្តុំរោគសញ្ញាទាំងឡាយណា ដែលបញ្ជាក់ថា អ្នកជំងឺមានបញ្ហាពាក់ព័ន្ធនឹងពោះវៀន។ ដោយពាក្យរបស់ខ្មែរ មិនទាន់អាចមានពាក្យណាពន្យល់ឲ្យចំ និងស្រួលស្តាប់បាន ជំងឺនេះត្រូវបានគេឲ្យឈ្មោះផ្សេងៗ ទៅតាមការនិយមរបស់គ្រូពេទ្យ ដើម្បីងាយស្រួលក្នុងការពន្យល់អ្នកជំងឺដូចជា៖

– ជំងឺរលាកពោះវៀនរ៉ាំរ៉ៃ

– ជំងឺខ្យល់ក្នុងពោះវៀន

– ហើមពោះវៀន

– ជំងឺខ្សោយពោះវៀន។

គឺជាជំងឺមួយដែលតែងជួបប្រទះញឹកញាប់ ជាពិសេសទៅលើអ្នកជំងឺ ដែលមកពិគ្រោះនៅផ្នែកថ្លើម-ក្រពះ-ពោះវៀន នៃមន្ទីរពេទ្យកាល់ម៉ែត (លើសពី៥០%)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

២) តើរោគសញ្ញានៃជំងឺខ្សោយពោះវៀនមានអ្វីខ្លះ?

រោគសញ្ញានៃជំងឺខ្សោយពោះវៀនរួមមាន៖

– ការឈឺពោះរ៉ាំរ៉ៃ

– តឹងណែនក្នុងពោះ

– ញ៉ាំឆាប់ឆ្អែត

និងរោគសញ្ញាមួយចំនួនទៀត ដែលមានលក្ខណៈខុសគ្នា ដែលអាចឲ្យគេចែកជំងឺនេះ ជាបួនក្រុម៖

– រាគរ៉ាំរ៉ៃ (ក្រុមទី១)

– ទល់លាមករ៉ាំរ៉ៃ (ក្រុមទី២)

– រាគ និងទល់លាមកឆ្លាស់គ្នា (ក្រុមទី៣)

– មិនមានរោគសញ្ញារាគ ឫទល់ទេ (ក្រុមទី៤)

៣) តើជំងឺខ្សោយពោះវៀននេះ មានលក្ខណៈធ្ងន់ធ្ងរដែរឬទេ?

ជាទូទៅជំងឺខ្សោយពោះវៀន មិនមានបង្កជាផលវិបាកធ្ងន់ធ្ងរទេ តែវមានភាពរំខានខ្លាំងក្នុងជីវភាពរស់នៅរបស់អ្នកជំងឺ។ ប៉ុន្តែអ្វីជាការចាំបាច់ យើងត្រូវតែធ្វើរោគវិនិច្ឆ័យឲ្យបានច្បាស់លាស់ថា ជាជំងឺខ្សោយពោះវៀនពិតប្រាកដមែនឬទេ។ ផ្ទុយទៅវិញអ្នកដែលមានសម្ពាធការងារ ឬគ្រួសារច្រើន ភាគច្រើនមានបញ្ហានេះជាញឹកញាប់។

៤) តើធ្វើយ៉ាងណា ដើម្បីឲ្យដឹងថា អ្នកជំងឺមានជំងឺខ្សោយពោះវៀនពិតប្រាកដ?

ជាទូទៅការធ្វើរោគវិនិច្ឆ័យនៃជំងឺខ្សោយពោះវៀន គឺពឹងផ្អែកទៅលើរោគសញ្ញាដែលផ្តល់ដោយអ្នកជំងឺ។ យ៉ាងណាមិញ មានជំងឺមួយចំនួនអាចស្តែងចេញរោគសញ្ញាដូច ជំងឺខ្សោយពោះវៀនដែរ ដូចជាជំងឺរលាកពោះវៀន ដោយសារមេរោគដំបៅពោះវៀន និងជំងឺមហារីកពោះវៀនជាដើម។ ដូចនេះដើម្បីបានការធ្វើរោគវិនិច្ឆ័យនៃជំងឺខ្សោយពោះវៀនឲ្យបានសុក្រឹត អ្នកជំងឺគួរតែទៅពិគ្រោះជាមួយវេជ្ជបណ្ឌិតឯកទេសផ្នែកថ្លើម-ក្រពះ-ពោះវៀន។

៥) តើមានវិធីអ្វីអាចបង្ការជំងឺនេះ បានដែរឬទេ?

ជំងឺនេះ មិនទាន់មានវិធីបង្ការណាមួយជាក់លាក់ទេ ព្រោះមូលហេតុពិតប្រាកដនៃជំងឺខ្សោយពោះវៀន មិនទាន់បានត្រូវគេរកឃើញនៅឡើយ ប៉ុន្តែគេសង្កេតឃើញថា សុខភាពផ្លូវចិត្តមានការប៉ះពាល់យ៉ាងខ្លាំង ទៅលើជំងឺនេះ។ អ្នកដែលមានសុខភាពផ្លូវចិត្តល្អ ភាគច្រើនមិនមានបញ្ហានេះទេ។

៦) តើជំងឺខ្សោយពោះវៀនអាចព្យាបាលជាឬទេ?

ជំងឺខ្សោយពោះវៀនជាជំងឺមួយ ដែលអាចព្យាបាលជាបាន ប៉ុន្តែអត្រាលាប់ឡើងមកវិញ គឺមានកម្រិតខ្ពស់ ការព្យាបាលទាមទារឲ្យមានការចូលរួមពីអ្នកជំងឺ ដើម្បីកាត់បន្ថយនូវអត្រាលាប់ឡើងមកវិញនេះ។ ដូចបានរៀបរាប់ខាងលើ សុខភាពផ្លូវចិត្តជាកត្តាសំខាន់ ដើម្បីការពារកុំឲ្យលាប់នៃជំងឺ និងចាំបាច់ត្រូវកាត់បន្ថយភាពតានតឹងក្នុងអារម្មណ៍ យល់ច្បាស់ពីជំងឺរបស់ខ្លួន និងមានភាពជឿជាក់លើគ្រូពេទ្យ។

៧) តើអ្នកជំងឺខ្សោយពោះវៀនគួរតមអ្វីខ្លះ?

ជាទូទៅចំណីអាហារមិនមែនជាកត្តាបង្កជំងឺខ្សោយពោះវៀននោះទេ ប៉ុន្តែចំណីអាហារមួយចំនួនអាចធ្វើឲ្យមានលេចចេញរោគសញ្ញាខ្សោយពោះវៀនកាន់តែច្បាស់ និងខ្លាំងក្លា។ អ្នកជំងឺម្នាក់ៗអាចឆ្លើយតបទៅនឹងចំណីអាហារខុសៗគ្នាដូចជា

– អ្នកខ្លះញ៉ាំម្ជូរមិនបាន

– អ្នកខ្លះញ៉ាំស៊ុតមិនបាន

– អ្នកខ្លះទៀតញ៉ាំបន្លែមិនបាន

ដូចនេះការតមអាហារ គឺធ្វើទៅតាមការឆ្លើយតបរបស់ជំងឺទៅនិងចំណីអាហាររបស់អ្នកជំងឺមួយៗ។

បញ្ជាក់៖ ដោយជំងឺខ្សោយពោះវៀនជាជំងឺមួយ ដែលគេតែងជួបប្រទះញឹកញាប់ តែរោគសញ្ញានៃជំងឺនេះ អាចឲ្យងាយមានការភណ្ឌច្រឡំទៅនឹងជំងឺមួយចំនួន ដែលអាចមានលក្ខណៈធ្ងន់ធ្ងរ អ្នកជំងឺ ដែលមានរោគសញ្ញានៃជំងឺខ្សោយពោះវៀន គួរតែបានជួបពិគ្រោះជាមួយក្រុមវេជ្ជបណ្ឌិតឯកទេស និងជំនាញផ្នែក ថ្លើម-ក្រពះ-ពោះវៀន នៅមន្ទីរពេទ្យកាល់ម៉ែត ដើម្បីទទួលបានរោគវិនិច្ឆ័យច្បាស់លាស់ និងទទួលនូវសេវាព្យាបាលឲ្យបានត្រឹមត្រូវ ប្រកបដោយប្រសិទ្ធភាពខ្ពស់។ ចូលរួមយល់ដឹងអំពីបញ្ហាសុខភាពខ្លួន ដើម្បីសុខុមាលភាពយូរអង្វែង៕

អត្ថបទ៖ រស្មី

សូមចុចអាន៖ ទឹកនោមផ្អែមជាជំងឺអាចជៀសវាងបាន តែត្រូវប្រកាន់គោលការណ៍មួយចំនួន

Related Topics:សុខភាព