ឥណ្ឌូណេស៊ី ហាមឃាត់ថ្នាំទឹកស៊ីរ៉ូក្អកគ្រប់ប្រភេទ បន្ទាប់ពីកុមារជិត ១០០នាក់ ស្លាប់ (មានវីដេអូ)

រដ្ឋាភិបាលឥណ្ឌូណេស៊ី បានប្រកាសហាមប្រាមលើថ្នាំទឹកស៊ីរ៉ូ និងការលក់ដោយគ្មានវេជ្ជបញ្ជាទាំងអស់ បន្ទាប់ពីកុមារជិត ១០០ នាក់បានស្លាប់ដោយសាររបួសតម្រងនោមស្រួចស្រាវក្នុងឆ្នាំនេះ។

ការហាមប្រាមនេះកើតឡើង នៅពេលដែលអាជ្ញាធរសុខាភិបាលរបស់ប្រទេសអាស៊ីអាគ្នេយ៍មួយនេះ បានបើកការស៊ើបអង្កេត ចំពោះការកើនឡើងដែលមិនអាចពន្យល់បាននូវការស្លាប់ដ៏គួរឲ្យសង្ស័យចំពោះកុមារជាច្រើន ដោយសារតែរបួសតម្រងនោមស្រួចស្រាវចាប់តាំងពីខែមករាមក។

រឿងនេះក៏កើតឡើងផងដែរ បន្ទាប់ពីកុមារជិត៧០នាក់ បានស្លាប់នៅក្នុងប្រទេសហ្គាំប៊ី កាលពីដើមឆ្នាំនេះដោយសាររបួសដូចគ្នានេះ ទាក់ទងទៅនឹងស៊ីរ៉ូក្អកផលិតនៅឥណ្ឌាចំនួន ៤ប្រភេទ។

ទោះបីជាយ៉ាងណាក៏ដោយ ទីភ្នាក់ងារចំណីអាហារ និងឱសថឥណ្ឌូណេស៊ី បាននិយាយថា ស៊ីរ៉ូដែលនាំចូលប្រទេសហ្គាំប៊ី គឺមិនមាននៅក្នុងប្រទេសអាស៊ីអាគ្នេយ៍ទេ។

អ្នកនាំពាក្យក្រសួងសុខាភិបាលលោក Syahril Mansyur បានប្រាប់សន្និសីទសារព័ត៌មានថា “រហូតមកដល់ថ្ងៃនេះ យើងបានទទួលករណីរាយការណ៍ចំនួន ២០៦ ពីខេត្តចំនួន ២០ ដែលមានកុមារស្លាប់ចំនួន ៩៩ នាក់”។

លោកបន្ថែមថា “ជាការប្រុងប្រយ័ត្ន ក្រសួងបានស្នើដល់បុគ្គលិកសុខាភិបាលទាំងអស់នៅក្នុងមណ្ឌលសុខភាព កុំចេញវេជ្ជបញ្ជាថ្នាំទឹកស៊ីរ៉ូជាបណ្តោះអាសន្នសិន។ យើងក៏បានស្នើឲ្យ ឱសថស្ថាន បញ្ឈប់ជាបណ្តោះអាសន្ននូវថ្នាំទឹក ឬស៊ីរ៉ូដែលមិនមានវេជ្ជបញ្ជា រហូតដល់ការស៊ើបអង្កេតត្រូវបានបញ្ចប់”។

ក្រសួងសុខាភិបាលនិយាយថា ភាគច្រើននៃករណីដែលត្រូវបានរាយការណ៍នៅក្នុងប្រទេសឥណ្ឌូណេស៊ី គឺពាក់ព័ន្ធនឹងកុមារដែលមានអាយុក្រោម៥ឆ្នាំ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Telegraph

ចុចអាន៖ ថៃ កំពុងប្រយ័ត្ន ថ្នាំទឹកសេរ៉ូ ដែលសម្លាប់កុមារជាង ១០០នាក់