ជំងឺហ្សែនមួយប្រភេទ ធ្វើឲ្យមនុស្សសើចដោយគ្មានមូលហេតុ

ជំងឺ “Angelman” បកប្រែថា “មនុស្សទេវតា” គឺជាជំងឺហ្សែនមួយប្រភេទ ដែលប៉ះពាល់ដល់ការលូតលាស់របស់កុមារ ការនិយាយស្ដី ការរក្សាលំនឹងខ្លួន បង្កពិការភាពបញ្ញា និងពេលខ្លះប្រកាច់ទៀតផង។

បុគ្គលណាមានផ្ទុកជំងឺនេះចូលចិត្តញញឹមនិងសើចជារឿយៗពិបាកនឹងទប់ ជាពិសេសតែងតែសប្បាយចិត្ត រំភើបចិត្តជាងមនុស្សធម្មតា។ ការលូតលាស់យឺតចាប់ផ្តើមពីអាយុប្រហែល ៦ទៅ១២ខែ ជារោគសញ្ញាដំបូងនៃជំងឺ “Angelman” ចំណែកឯការប្រកាច់នឹងចាប់ផ្ដើមនៅអាយុ២ទៅ៣ឆ្នាំ។ យ៉ាងណាមិញ អ្នកជំងឺអាចមានជីវិតយូរប្រហែលមនុស្សធម្មតាគ្រាន់តែមិនអាចព្យាបាលជំងឺបាន។

ការព្យាបាលជំងឺនេះគេផ្ដោតសំខាន់ទៅលើ ការគ្រប់គ្រងសុខភាព ការគេង និងការលូតលាស់។ សម្រាប់ការរកឥទ្ធិពលពីជំងឺ Angelman វិញមានដូចជា៖

_ លូតលាស់យឺតរួមមាន មិនចេះលូន មិនមានសញ្ញានៃការនិយាយស្ដី (អាយុ ៦ទៅ១២ខែ) 

_ ពិការភាពបញ្ញា

_ មិនចេះនិយាយ ឬនិយាយតិចតួចបំផុត

_ ពិបាកដើរ បម្លាស់ទី ពិបាករក្សាលំនឹង

_ សើច ញញឹមច្រើន

_ ជាមនុស្សសប្បាយចិត្ត រំភើបចិត្តច្រើន

_ ពិបាកបរិភោគ ឬបៅ

_ ពិបាកគេង។

យើងអាចសង្កេតឃើញអ្នកជំងឺ Angelman មានលក្ខណៈដូចខាងក្រោម៖

_ ប្រកាច់ ចាប់ផ្ដើមនៅអាយុ ២ទៅ៣ឆ្នាំ

_ ចលនាឆ្កុយៗ និងប្លែកៗ

_ ក្បាលតូច និងកំប៉ិតពីក្រោយ

_ រុញអណ្ដាត

_ ស្បែក សក់ និងភ្នែក មានពណ៌ស្រាល

_ មានបញ្ហាក្នុងការគេង

_ ឆ្អឹងខ្នងកោងជាដើម។

Angelman ជាជំងឺហ្សែនបណ្ដាលមកពីបញ្ហាជាមួយហ្សែនក្នុងក្រូម៉ូសូម ១៥ ហៅថា ubiquitin protein ligase E3A (UBE3A) gene វាជាជំងឺកម្រ សូម្បីអ្នកស្រាវជ្រាវក៏មិនទាន់ដឹងពីមូលហេតុពិតប្រាកដែរ។ បើកូនលោកអ្នកមានបញ្ហាដូចដែលបានរៀបរាប់នៅខាងលើ សូមធ្វើការណាត់ពិគ្រោះជាមួយគ្រូពេទ្យជំនាញដើម្បីដោះស្រាយនិងគ្រប់គ្រងជំងឺនោះ៕

ប្រែសម្រួលដោយ៖ វារី

ចុចអាន៖អ្នកចូលចិត្តច្រៀងលេងកម្សាន្ត នឹងទទួលបានអត្ថប្រយោជន៍ ១០ យ៉ាងនេះក្នុងរាងកាយ