សុខភាព

ការវះកាត់សួតដោយការចោះទ្រូង លើអ្នកជំងឺខ្យល់ក្នុងស្រោមសួត

បានផុស

៥ years មុន

នៅ

ថ្ងៃអង្គារ ២៦ មករា ២០២១

ដោយ

ជំងឺខ្យល់ក្នុងស្រោមសួត គឺបណ្ដាលមកពីការធ្លាយសាច់សួត ឬ មានរបួសលើសាច់ទ្រូង។ វាអាចកើតឡើងមកដោយឯកឯង ឬ ដោយការប៉ះទង្គិចលើទ្រូង និង សួត។ អ្នកជំងឺនេះ អាចមានរោគសញ្ញាដូចជា ហត់ ពិបាកដកដង្ហើម ឈឺក្នុងទ្រូង និង ក្អកជាដើម។ យើងអាចធ្វើរោគវិនិច្ឆ័យបានដោយការថតកាំរស្មីអ៊ិច (X-Ray) ឬ ដោយការថតស្កេនន័រ (Scanner) ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្យាបាលជាមូលដ្ឋាននៃជំងឺនេះ គឺការបូមខ្យល់ក្នុងស្រោមសួតចេញដោយប្រើប្រាស់បំពង់បូមទ្រូង (Drainage pleural) ។ ក្នុងករណីមួយចំនួនតូចជំងឺនេះ ត្រូវការការព្យាបាលដោយវះកាត់ ។

ការវះកាត់ គឺដើម្បីកាត់យកផ្នែកដែលខូចខាតនៃសួត (bulle emphysémateuse) និងដើម្បីភ្ជាប់សាច់ស្រោមសួត (Symphyse pleurale) ។ ការវះកាត់នេះអាចធ្វើឡើងដោយការចោះទ្រូង (Vidéothoracoscopie) ឬ ការវះកាត់បើកទ្រូងតាមចន្លោះឆ្អឹងជំនី (Thoracotomie) ។

ការវះកាត់ដោយចោះទ្រូង (Vidéothoracoscopie) គឺជាមធ្យោបាយ ដែលមានប្រសិទ្ធភាព និង មានគុណសម្បត្តិច្រើនដូចជា៖

– មិនបង្កឲ្យមានការឈឺចាប់ខ្លាំងទេ បើប្រៀបធៀបនឹងការវះកាត់បើកទ្រូង។

– មានស្នាមរបួសតូចជាងការវះកាត់បើកទ្រូង ។

– រយៈពេលសម្រាកពេទ្យខ្លី (ជាធម្មតា៥ទៅ៦ថ្ងៃក្រោយវះកាត់អ្នកជំងឺអាចត្រលប់ទៅផ្ទះបាន ក្នុងករណីគ្មានផលវិបាកក្រោយវះកាត់ ។

– ឆាប់បានធ្វើការដូចធម្មតា។

ក្រោយពីការព្យាបាល អ្នកជំងឺនឹងទទួលបានការណែនាំ និង លំហាត់ចលនាសួត ព្រមទាំងការកែសម្រួលឥរិយាបថមួយចំនួន ដើម្បីកាត់បន្ថយការកើតឡើងវិញនូវជំងឺនេះ។ អ្នកជំងឺនឹងត្រូវណាត់ជួបក្រុមវេជ្ជបណ្ឌិត១ខែក្រោយ ដើម្បីតាមដានពីសភាពនៃសួត។

ជាសរុប ជំងឺខ្យល់ក្នុងស្រោមសួតជាជំងឺ ដែលមានគ្រោះថ្នាក់ តែអាចព្យាបាលដោយប្រសិទ្ធភាពដោយប្រើប្រាស់ការបូមខ្យល់ចេញដោយបំពង់បូម។ ក្នុងករណីមួយចំនួនតូច យើងចាំបាច់ត្រូវធ្វើការវះកាត់។ ការវះកាត់សាច់សួត ដោយមធ្យោបាយចោះទ្រូងជាមធ្យោបាយ ដែលមានប្រសិទ្ធភាព និងមិនសូវមានការឈឺចាប់។ បច្ចុប្បន្ននេះ នៅក្នុងមន្ទីរពេទ្យកាល់ម៉ែត ពួកយើងអាចធ្វើការវះកាត់ដោយការចោះទ្រូង ដោយក្រុមវេជ្ជបណ្ឌិតឯកទេសនៃផ្នែកសល្យសាស្ត្រ៕

អត្ថបទ៖ រស្មី

សូមចុចអាន៖