សុខភាព

១ ថ្ងៃ មន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ សៀមរាប ពិនិត្យព្យាបាលជំងឺកុមារជិត ១,៦០០ នាក់

បានផុស

២ years មុន

នៅ

ថ្ងៃអង្គារ ២៥ កក្កដា ២០២៣

ដោយ

នៅចំថ្ងៃឈប់សម្រាកក្រោយបោះឆ្នោតជ្រើសតាំង តំណាងរាស្រ្ដ នីតិកាលទី ៧ នាថ្ងៃទី ២៤ ខែកក្កដា ឆ្នាំ ២០២៣ មន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ ខេត្តសៀមរាប បានពិនិត្យព្យាបាលជំងឺកុមារចំនួន ១,៥៧៥ នាក់ ក្នុងនោះ កុមារកើតជំងឺធ្ងន់ធ្ងរ ៤៨៥ នាក់ ជាករណីថ្មី (newly admitted patients)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈផេកហ្វេសប៊ុក Dr.beat Richner បង្ហោះនៅព្រឹកថ្ងៃទី ២៥ ខែកក្កដា ឆ្នាំ ២០២៣ នេះ បានឲ្យដឹងថា កាលពីថ្ងៃទី ២៤ ខែកក្កដា ឆ្នាំ ២០២៣ ម្សិលមិញ ចំថ្ងៃឈប់សម្រាកក្រោយបោះឆ្នោតសភាជាតិ នៅមន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ ខេត្តសៀមរាប មានកុមារច្រើនជាអតិបរមា ចំនួន ១,៥៧៥ នាក់ ត្រូវបានពិនិត្យព្យាបាលនៅផ្នែកពិគ្រោះជំងឺក្រៅ។ ចំណែកឯ កុមារដែលមានជំងឺធ្ងន់ធ្ងរចំនួន ៤៨៥ នាក់ ជាករណីថ្មី (newly admitted patients) ត្រូវបានដាក់ឲ្យចូលសម្រាកព្យាបាលនៅក្នុងមន្ទីរពេទ្យ។

ជាមួយគ្នានេះ កុមារចំនួន ២,១២៩ នាក់ កំពុងសម្រាកព្យាបាលក្នុងមន្ទីរពេទ្យ (inpatients) និងកុមារ ៤៥០ នាក់ ទៀត កំពុងត្រូវបានសង្គ្រោះព្យាបាលនៅក្នុងបន្ទប់សង្គ្រោះបន្ទាន់ មានការវះកាត់សង្គ្រោះបន្ទាន់ ចំនួន ១៣ នាក់ ដោយក្នុងនោះ ស្ត្រីសម្រាលកូន មាន ៤៥ នាក់ កាលពីថ្ងៃទី ២៤ កក្កដា។ ចំពោះការព្យាបាលទាំងអស់ គឺ ឥតគិតថ្លៃ សម្រាប់គ្រប់ៗគ្នា ដោយគ្មានការរើសអើង។

មន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ ខេត្តសៀមរាប បានអរគុណទៅដល់បុគ្គលិកយាមប្រចាំការថ្ងៃឈប់សម្រាក ចំនួន ១ ភាគ ៤ នៃបុគ្គលិកទាំងអស់ ដែលខិតខំបំពេញការងារយ៉ាងនឿយហត់ ប្រកបដោយវិជ្ជាជីវៈ។

ជាចុងក្រោយ មន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ ខេត្តសៀមរាប ក៏បានអរគុណដល់មូលនិធិគន្ធបុប្ផាស្វីស (KFS) និងមូលនិធិគន្ធបុប្ផាកម្ពុជា (CKF) ព្រមទាំងសប្បុរសជនគ្រប់ៗរូប ដែលតែងតែឧបត្ថម្ភគាំទ្រដំណើរការ នៃមន្ទីរពេទ្យគន្ធបុប្ផា៕

អត្ថបទ ៖ ពិសី