សុខភាព

ថ្ងៃនេះ មន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ សៀមរាប កំពុងរង់ចាំពិនិត្យ ព្យាបាលជំងឺកុមារប្រមាណ ៧០០ នាក់

បានផុស

៣ years មុន

នៅ

ថ្ងៃអាទិត្យ ៣០ កក្កដា ២០២៣

ដោយ

នៅថ្ងៃទី ៣០ ខែកក្កដា ឆ្នាំ ២០២៣ នេះ មន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ ខេត្តសៀមរាប កំពុងរង់ចាំពិនិត្យព្យាបាលជំងឺកុមារប្រមាណ ៧០០ នាក់ ក្នុងនោះក៏មានកុមារ ២,៣០០ នាក់ ទៀត កំពុងសម្រាកព្យាបាលក្នុងមន្ទីរពេទ្យផងដែរ។

តាមរយៈផេកហ្វេសប៊ុក Dr.beat Richner បានបង្ហោះព្រឹកនេះ ឲ្យដឹងថា នាថ្ងៃអាទិត្យ ទី ៣០ ខែកក្កដា ឆ្នាំ ២០២៣ ដែលជាថ្ងៃឈប់សម្រាក នៅមន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ ក្នុងខេត្តសៀមរាប មានកុមារច្រើនជាអតិបរមាប្រមាណ ៧០០ នាក់ កំពុងរង់ចាំពិនិត្យព្យាបាលនៅផ្នែកពិគ្រោះជំងឺក្រៅ។ ដោយឡែក ចំពោះកុមារចំនួន ២,៣០០ នាក់ ទៀត កំពុងសម្រាកព្យាបាលក្នុងមន្ទីរពេទ្យ (inpatients)។

មន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ ខេត្តសៀមរាប បានអរគុណដល់បុគ្គលិកយាមប្រចាំការថ្ងៃឈប់សម្រាក ចំនួន ១ ភាគ ៤ នៃបុគ្គលិកទាំងអស់ ដែលខិតខំបំពេញការងារយ៉ាងនឿយហត់ ប្រកបដោយវិជ្ជាជីវៈ។

ជាមួយនោះ មន្ទីរពេទ្យគន្ធបុប្ផាភ្នំពេញ និងជ័យវរ្ម័នទី ៧ ខេត្តសៀមរាប ក៏បានអរគុណមូលនិធិគន្ធបុប្ផាស្វីស (KFS) និងមូលនិធិគន្ធបុប្ផាកម្ពុជា (CKF) ព្រមទាំងសប្បុរសជនគ្រប់ៗរូប ដែលតែងតែឧបត្ថម្ភគាំទ្រដំណើរការ នៃមន្ទីរពេទ្យគន្ធបុប្ផាផងដែរ។

សូមជម្រាបថា រាល់ការព្យាបាលទាំងអស់ គឺ ឥតគិតថ្លៃសម្រាប់គ្រប់ៗគ្នា ដោយគ្មានការរើសអើងឡើយ៕

អត្ថបទ ៖ ពិសី