WHO ព្រមានថា ប្រទេសជាងពាក់កណ្តាលផែនដី នឹងផ្ទុះជំងឺកញ្ជ្រឹល ឆ្នាំនេះ

អង្គការសុខភាពពិភពលោក បានព្រមានថា បើគ្មានវិធានការបន្ទាន់ណាមួយទេនោះ ប្រទេសជាងពាក់កណ្តាលពិភពលោក នឹងមានហានិភ័យខ្ពស់នៃការផ្ទុះជំងឺកញ្ជ្រឹលត្រឹមចុងឆ្នាំនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Reuters កាលពីថ្ងៃអង្គារទី២០ខែកុម្ភៈ, ករណីជំងឺកញ្ជ្រឹល បាននិងកំពុងកើនឡើងនៅទូទាំងតំបន់ភាគច្រើន ជាពិសេសគឺដោយសារតែការមិនចាក់វ៉ាក់សាំងក្នុងអំឡុងពេលផ្ទុះជំងឺរាតត្បាតកូវីដ១៩ ព្រោះពេលនោះ ប្រព័ន្ធសុខាភិបាលសឹងតែដួលរលំទៅហើយ។

លោកស្រី Natasha Crowcroft ទីប្រឹក្សាបច្ចេកទេសជាន់ខ្ពស់ផ្នែកជំងឺកញ្ជ្រឹលរបស់ WHO បានប្រាប់សន្និសីទសារព័ត៌មាននៅទីក្រុងហ្សឺណែវ នៃប្រទេសស្វីសថា “អ្វីដែលយើងព្រួយបារម្ភគឺថា ឆ្នាំ២០២៤នេះ យើងពិតជាមានចន្លោះប្រហោងយ៉ាងធំ ក្នុងកម្មវិធីចាក់ថ្នាំបង្ការរបស់យើង ហើយប្រសិនបើយើងមិនចាក់វ៉ាក់សាំងឲ្យបានលឿនទេនោះ ជំងឺកញ្ជ្រឹលនឹងផ្ទុះឡើងខ្លាំង។ យើងអាចមើលឃើញទិន្នន័យរបស់ WHO ដែលថា ជាងពាក់កណ្តាលនៃប្រទេសទាំងអស់លើពិភពលោក នឹងមានហានិភ័យខ្ពស់ ផ្ទុះជំងឺនេះនៅចុង​ឆ្នាំ​”។

សូមបញ្ជាក់ កញ្ជ្រឹលគឺជាជំងឺឆ្លងខ្លាំង ដែលភាគច្រើនប៉ះពាល់ដល់កុមារអាយុក្រោមប្រាំឆ្នាំ ប៉ុន្តែវាអាចការពារបានដោយការចាក់វ៉ាក់សាំង២ដូស ហើយថ្នាំបង្ការក៏បានបញ្ចៀសការស្លាប់កុមារជាង៥០លាននាក់ចាប់តាំងពីឆ្នាំ២០០០មកដែរ។

ទោះបីជាយ៉ាងណាក៏ដោយ ឆ្នាំមុន ករណីឆ្លងជំងឺនេះបានកើនឡើងរួចទៅហើយ ពោលគឺកើន៧៩% ស្មើនឹង៣០០០០០នាក់៕

អត្ថបទ៖ សុខ សុវណ្ណ

ចុចអាន៖ អូមីក្រុង ឆ្លងលឿន និងរហ័សមែន តែឆ្លងចាញ់ជំងឺមួយនេះទេ (មានវីដេអូ)