សុខភាព

ញ៉ាំអាហារតិច កាឡូរីមិនគ្រប់គ្រាន់ ធ្វើឲ្យប៉ះពាល់សុខភាពច្រើនយ៉ាង

បានផុស

៦ years មុន

នៅ

ថ្ងៃព្រហស្បតិ៍ ៥ វិច្ឆិកា ២០២០

ដោយ

ការទទួលបានកាឡូរីគឺសំខាន់ណាស់សម្រាប់មុខងាររបស់រាងកាយ ប៉ុន្តែការទទួលបានកាឡូរីច្រើនពេក ឬតិចពេកអាចបង្កបញ្ហាដល់សុខភាពបាន។ ការទទួលកាឡូរីមិនគ្រប់គ្រាន់អាចមកពីយើងមានជំងឺមិនឃ្លានអាហារ តមអាហារ និងបញ្ហាសុខភាពផ្សេង និងអាចបង្កបញ្ហាសុខភាពមួយចំនួន។

១. បញ្ហាបេះដូង

នៅពេលដែលយើងកំណត់បរិមាណកាឡូរីដែលយើងញ៉ាំរយៈពេលយូរ បញ្ហាកង្វះអាហារូបត្ថម្ភអាចនឹងកើតមាន។ គ្នាយើងដែលមានជំងឺមិនឃ្លានអាហារ ងាយប្រឈមនឹងបញ្ហាកង្វះអាហារូបត្ថម្ភ។ ចំណែកឯអ្នកដែលកំណត់បរិមាណកាឡូរី ឬតមអាហារតឹងតែងពេក អាចធ្វើឲ្យការធ្វើមេតាប៉ូលីសយឺតព្រោះរាងកាយស្ថិតក្នុងសភាពស្រេកឃ្លាន និងពន្យឺតមុខងាររាងកាយដើម្បីរក្សាថាមពល។ អ្នកដែលមានបញ្ហាកង្វះអាហារូបត្ថម្ភ ចង្វាក់បេះដូងតែងមិនប្រក្រតី ឬលឿនពេក ព្រោះសាច់ដុំបេះដូងអាចនឹងស្ដើង និងខ្សោយហើយថតបេះដូងអាចនឹងរួមតូចដែលអាចមានជំងឺគាំងបេះដូង

២. បញ្ហាប្រព័ន្ធរំលាយអាហារ

នៅពេលដែលយើងទទួលកាឡូរីមិនគ្រប់គ្រាន់ ប្រព័ន្ធរំលាយអាហារអាចនឹងយឺតដើម្បីរក្សាថាមពល។ ប្រព័ន្ធរំលាយអាហារគឺមានតួនាទីបំបែកអាហារ និងភេសជ្ជៈដើម្បីឲ្យរាងកាយស្រូបយកសារធាតុចិញ្ចឹម។ នៅពេលដែលទទួលបានកាឡូរីមិនគ្រប់គ្រាន់ ការរំលាយអាហារនឹងយឺតយ៉ាវ ហើយជញ្ជាំងពោះវៀនក៏រួមតូច។ នៅពេលយើងមិនញ៉ាំអាហារ ប្រព័ន្ធរំលាយអាហារនឹងរងការខូចខាតធ្ងន់ធ្ងរដែលមិនរំលាយអាហារបានត្រឹមត្រូវ។ រីឯលំពែងក៏ផលិតអង់ហ្សីមរំលាយអាហារយឺតជាងមុនដែលធ្វើឲ្យយើងមានអាការៈរាករូស។ អាការៈរាករូសនេះអាចធ្វើឲ្យបាត់បង់ជាតិទឹក ជាតិរ៉ែ និងវីតាមីនសំខាន់ៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

៣. កង្វះអាហារូបត្ថម្ភ

គ្នាយើងដែលតមអាហារអាចមានបញ្ហាកង្វះអាហារូបត្ថម្ភ។ ភាគច្រើនគឺខ្វះជាតិដែក ហ្វូឡាត និងវីតាមីន B12 ដែលអាចបង្កជំងឺស្លេកស្លាំង។ ជំងឺស្លេកស្លាំងអាចប៉ះពាល់ដល់គ្រាប់ឈាមក្រហមដែលមានតួនាទីជញ្ជូនអុកស៊ីសែនទៅកាន់សរីរាង្គ និងជាលិកាផ្សេងៗ។ ជំងឺស្លេកស្លាំងដោយសារកង្វះអាហារូបត្ថម្ភអាចបង្កឲ្យអស់កម្លាំង ពិបាកដកដង្ហើម ស្លេកស្លាំង ចង្វាក់បេះដូងមិនប្រក្រតី វិលមុខ ត្រជាក់ចុងដៃចុងជើង និងឈឺក្បាល។

៤. ស្រកទម្ងន់

ប្រសិនជាគ្នាយើងតមអាហារដើម្បីសម្រកទម្ងន់ នេះមិនមែនជាវិធីល្អទេ ព្រោះវិធីនេះមិនមានប្រសិទ្ធភាពយូរអង្វែងទេ ហើយនៅអាចធ្វើឲ្យត្រលប់ទៅរកទម្លាប់នៃការញ៉ាំរបស់យើងពីមុនវិញ និងបង្កការខូចខាតដល់ជាលិកាសាច់ដុំទៀតផង។ យោងតាមសាកលវិទ្យាល័យ West Virginia សហរដ្ឋអាមេរិក យើងមិនគួរស្រកទម្ងន់ច្រើនជាង ០,៩គីឡូក្រាម ក្នុងមួយសប្ដាហ៍ទេ។ ប្រសិនជាយើងស្រកច្រើនជាងនេះ អាចមកពីយើងទទួលបានកាឡូរីតិចពេក៕

អត្ថបទផ្ដល់សិទ្ធិដោយ៖ Hellokrupet

Related Topics: