ព័ត៌មានជាតិ

ក្រសួង គ្រោងនឹងដាក់ឱ្យដំណើរការថ្នាំព្រឹបប្រភេទចាក់មានសកម្មភាពយូរ បង្ការមុនពេលប្រឈមការឆ្លងមេរោគអេដស៍ នៅព្រឹកស្អែក

បានផុស

១២ ខែ មុន

នៅ

ថ្ងៃព្រហស្បតិ៍ ២៦ មិថុនា ២០២៥

ដោយ

មជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគ នៃក្រសួងសុខាភិបាល នឹងដាក់ឱ្យដំណើរការថ្នាំព្រឹបប្រភេទចាក់ មានសកម្មភាពយូរ ដែលអាចបង្ការមេរោគអេដស៍ហៅថា «ថ្នាំកាបូតេត្រាវៀ» នៅថ្ងៃទី ២៧ ខែមិថុនា ឆ្នាំ ២០២៥ ស្អែកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត អ៊ុក វិជ្ជា ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគ នៃក្រសួងសុខាភិបាល បានឱ្យដឹងថា ពិធីដាក់ឱ្យដំណើរការថ្នាំព្រឹបប្រភេទចាក់នេះ នឹងប្រព្រឹត្តិទៅនៅមជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគ ក្រោមអធិបតីភាព លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល។

ការនាំយកថ្នាំព្រឹបប្រភេទចាក់ មានសកម្មភាពយូរ មកកម្ពុជានេះ ដើម្បីទប់ស្កាត់ការឆ្លងរាលដាលមេរោគអេដស៍នៅប្រទេសកម្ពុជាក្នុងចំណោមក្រុមប្រជាជនប្រឈមមុខខ្ពស់ដូចជា ស្ត្រីបម្រើសេវាកម្សាន្ត ក្រុមបុរសស្រឡាញ់បុរស ក្រុមអ្នកប្លែងភេទ និងក្រុមអ្នកចាក់គ្រឿងញៀន ឱ្យកាន់តែមានប្រសិទ្ធភាពជាងមុន។

ថ្នាំព្រឹបប្រភេទចាក់នេះ អាចការពារមេរោគអេដស៍បានរយៈពេល ២ ខែ ខណៈបច្ចុប្បន្ន កម្ពុជា មានថ្នាំប្រឹពសម្រាប់លេបប្រចាំថ្ងៃមុនពេលរួមភេទ និងថ្នាំប៉ឹបសម្រាប់លេបក្រោយពេលនឹងគ្រោះថ្នាក់ឆ្លងមេរោគអេដស៍ ដូចជា នៅពេលរួមភេទដោយមិនមានសុវត្ថិភាព ស្រោមអនាម័យដាច់រហែក ភ្លេចពាក់ស្រោមអនាម័យ និងមុតសម្ភារៈមុតស្រួចជាដើម។ ថ្នាំព្រឹបប្រភេទកាបូតេត្រាវៀនេះ ចាក់នៅត្រគាក និងសាច់ដុំ ហើយមិនមានផលប៉ះពាល់ដល់អ្នកចាក់ទេ និងអាចបង្ការបានតែជំងឺអេដស៍ប៉ុណ្ណោះ ហើយមិនអាចការពារការឆ្លងជំងឺស្វាយ ជំងឺប្រមេះ និងជំងឺកាមរោគផ្សេងទៀតបានទេ គឺមានតែការប្រើប្រាស់ស្រោមអនាម័យឱ្យបានត្រឹមត្រូវ និងជាប់លាប់តែប៉ុណ្ណោះ ដែលអាចបង្ការការឆ្លងមេរោគអេដស៍ និង ជំងឺកាមរោគគ្រប់ប្រភេទបាន។

គួរបញ្ជាក់ថា តាមការប៉ាន់ស្មានឆ្នាំ ២០២៤ កម្ពុជា មានចំនួនអ្នករស់នៅជាមួយមេរោគអេដស៍ប្រមាណ ៧៦ ០០០ នាក់ ក្នុងនោះ មានអ្នកជំងឺអេដស៍សកម្មដែលកំពុងទទួលសេវាព្យាបាលដោយឱសថប្រឆាំងមេរោគអេដស៍ទាំង ៧៤ កន្លែង ជិត ៧ ម៉ឺននាក់ ហើយប្រហែលនៅសល់អ្នករស់នៅជាមួយមេរោគអេដស៍ ៦ ០០០ នាក់ ទៅ ៧ ០០០ នាក់ នៅមិនទាន់បានដឹងខ្លួន និងមិនទាន់បានធ្វើតេស្ត និងទទួលសេវាព្យាបាលនៅឡើយទេ ខណៈក្នុង ១ ឆ្នាំៗ មានអ្នកឆ្លងថ្មី នៃមេរោគអេដស៍ ប្រមាណ ១ ២០០ នាក់ និងស្លាប់ប្រមាណ ១ ១០០ នាក់៕

អត្ថបទ ៖ សំអឿន

Related Topics:ក្រសួងសុខាភិបាល មេរោគអេដស៍

សេចក្ដីជូនដំណឹង១ សប្តាហ៍ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា