ព្រឹត្តិការណ៍ប្រវត្តិសាស្រ្ត កើតឡើងចំថ្ងៃ ១០ឧសភា

ពីមួយថ្ងៃទៅមួយថ្ងៃ មានរឿងច្រើនរាប់មិនអស់ បានកើតឡើងទូទាំងពិភពលោក ហើយរឿងខ្លះត្រូវបានគេចាត់ទុកថាជាព្រឹត្តិការណ៍ប្រវត្តិសាស្រ្តទៀតផង។

ចុះតើអ្នកដឹងទេ នៅថ្ងៃទី១០ខែឧសភា មានព្រឹត្តិការណ៍ប្រវត្តិសាស្រ្តអ្វីខ្លះ ត្រូវបានគេកត់ត្រាទុក? តោះទៅមើលជាមួយ កម្ពុជាថ្មី ទាំងអស់គ្នា!

ឆ្នាំ ២០០២​ – ភ្នាក់ងារ FBI អាមេរិក

ភ្នាក់ងារ FBI អាមេរិកឈ្មោះ Robert Hanssen ត្រូវបានកាត់ទោសដាក់គុក មួយជីវិត បន្ទាប់ពីរកឃើញថា មានកំហុសក្នុងការធ្វើចារកម្មឲ្យទីក្រុងមូស្គូ។

ឆ្នាំ ១៩៩៤ – ឃាតកអាមេរិក

ឃាតកសម្លាប់មិនរើសមុខជនជាតិអាមេរិក ឈ្មោះ John Wayne Gacy ត្រូវបានប្រហារជីវិតនៅអាយុ ៥២ឆ្នាំ។ គាត់បានសម្លាប់ក្មេងប្រុស និងយុវជនចំនួន ៣៣នាក់ក្នុងទសវត្សរ៍ឆ្នាំ ១៩៧០ ដោយធ្វើឲ្យសហគមន៍ Chicago មានការភ្ញាក់ផ្អើលយ៉ាងខ្លាំង។

ឆ្នាំ ១៩៩៤ – Nelson Mandela

លោក Nelson Mandela ក្លាយជាប្រធានាធិបតីនៃប្រទេសអាហ្វ្រិកខាងត្បូង។ កិច្ចខិតខំប្រឹងប្រែងរបស់គាត់ដើម្បីបញ្ចប់ការរើសអើងជាតិសាសន៍ បាននាំឲ្យគាត់ត្រូវជាប់ពន្ធនាគារពីឆ្នាំ ១៩៦២ ដល់ ១៩៩០ និងទទួលបានចំណែកជាមួយ F.W. de Klerk ឈ្នះពានរង្វាន់ណូបែលសន្តិភាពឆ្នាំ១៩៩៣។

ឆ្នាំ ១៩៦២ – រឿង The Incredible Hulk 

Marvel Comics បានចេញផ្សាយរឿងដំបូងរបស់ The Incredible Hulk របស់អ្នកនិពន្ធ Stan Lee និងវិចិត្រករ Jack Kirby។

ឆ្នាំ ១៩៤០ – ការលុកលុយរបស់អាល្លឺម៉ង់ ក្នុងសង្រ្គាម​លោក​លើក​ទី២

អាល្លឺម៉ង់ ​បាន​លុកលុយ​បែលហ្ស៊ិក លុចសំបួ និង​ហូឡង់ ក្នុង​អំឡុង​សង្រ្គាម​លោក​លើក​ទី២។

ឆ្នាំ ១៩៤០ – នាយករដ្ឋមន្ត្រីអង់គ្លេស លាលែងពីតំណែង

បន្ទាប់ពីបាត់បង់ការគាំទ្រពីអ្នកអភិរក្សជាច្រើននៅក្នុងសភា នាយករដ្ឋមន្ត្រីអង់គ្លេសលោក Neville Chamberlain បានលាលែងពីតំណែង ហើយត្រូវបានជំនួសដោយ Winston Churchill។

ឆ្នាំ ១៨៧២ – ស្រ្តីដំបូងគេ ជាអ្នកប្រជែងតំណែងប្រធានាធិបតី

អ្នកកំណែទម្រង់ជនជាតិអាមេរិក លោកស្រី Victoria Woodhull បានក្លាយជាស្ត្រីដំបូងគេដែលត្រូវបានតែងតាំងជាអ្នកប្រជែងតំណែងប្រធានាធិបតី នៅពេលគណបក្ស Equal Rights បានជ្រើសរើសគាត់ជាបេក្ខជនរបស់ខ្លួន។

ឆ្នាំ ១៨៦៩ – ផ្លូវដែកឆ្លងទ្វីប

ផ្លូវដែក ប៉ាស៊ីហ្វិកកណ្តាល និងសហភាពប៉ាស៊ីហ្វិកត្រូវបានភ្ជាប់គ្នានៅឯទីក្រុង Promontory រដ្ឋ Utah ដើម្បីបង្កើតផ្លូវដែកឆ្លងទ្វីបដំបូងគេនៅក្នុងសហរដ្ឋអាមេរិក។

ឆ្នាំ ១៧៧៤ – ស្តេចបារាំង ត្រូវបានកាត់ក្បាល

ស្តេច Louis ទី១៦ បាន​ឡើង​គ្រង​រាជ្យ​នៅ​ប្រទេស​បារាំង ហើយមហេសី Marie-Antoinette, បាន​ក្លាយ​​​ជា​ម្ចាស់​ក្សត្រី។ ក្រោយមក ស្តេចទាំងពីរអង្គ ត្រូវបានកាត់ក្បាលក្នុងអំឡុងបដិវត្តន៍បារាំង៕

ប្រែសម្រួល៖ Vann Vann

ចុចអាន៖ ព្រឹត្តិការណ៍ប្រវត្តិសាស្រ្ត កើតឡើងចំថ្ងៃ ៩ឧសភា