ព្រឹត្តិការណ៍ប្រវត្តិសាស្រ្ត កើតឡើងចំថ្ងៃ ៩ឧសភា

ពីមួយថ្ងៃទៅមួយថ្ងៃ មានរឿងច្រើនរាប់មិនអស់ បានកើតឡើងទូទាំងពិភពលោក ហើយរឿងខ្លះត្រូវបានគេចាត់ទុកថាជាព្រឹត្តិការណ៍ប្រវត្តិសាស្រ្តទៀតផង។

ចុះតើអ្នកដឹងទេ នៅថ្ងៃទី៩ខែឧសភា មានព្រឹត្តិការណ៍ប្រវត្តិសាស្រ្តអ្វីខ្លះ ត្រូវបានគេកត់ត្រាទុក? តោះទៅមើលជាមួយ កម្ពុជាថ្មី ទាំងអស់គ្នា!

២០២០ – តារាចម្រៀង និងអ្នកលេងព្យ៉ាណូអាមេរិក Little Richard

តារាចម្រៀង និងអ្នកលេងព្យ៉ាណូជនជាតិអាមេរិក Little Richard ដែលបទចម្រៀងរបស់គាត់បង្កភាពល្បីរន្ទឺនៅពាក់កណ្តាលទសវត្សរ៍ឆ្នាំ១៩៥០ អំឡុងយុគសម័យ Rock and Roll បានទទួលមរណភាពក្នុងអាយុ ៨៧ ឆ្នាំ។

១៩៨០ – ខ្សែភាពយន្ត Friday the 13th

ខ្សែភាពយន្តបែបភ័យរន្ធត់ ចំណងជើង Friday the 13th ដែលនិយាយអំពី ក្រុមបោះជំរំរដូវក្តៅត្រូវបានតាមប្រមាញ់ដោយឃាតកពាក់របាំងមុខ បានចាក់បញ្ចាំងនៅក្នុងរោងកុន ហើយភាពជោគជ័យដ៏ធំរបស់វា បាននាំទៅរកសិទ្ធិផ្តាច់មុខដ៏ពេញនិយមមួយ។

១៩៧៤ – សវនាការប្រធានាធិបតីអាមេរិក Richard M. Nixon 

គណៈកម្មាធិការ​តុលាការ​នៃ​សភា​អាមេរិក​ បាន​ចាប់​ផ្តើម​សវនាការ​ជា​ផ្លូវ​ការ ​ក្នុង​ការ​ស៊ើប​អង្កេត​​ចោទ​ប្រកាន់​លោក​ប្រធានាធិបតី Richard M. Nixon ទម្លាក់តំណែង។

ឆ្នាំ ១៩៦០ – ថ្នាំពន្យារកំណើត 

រដ្ឋបាលចំណីអាហារ និងឱសថអាមេរិក បានអនុម័តថ្នាំពន្យារកំណើត ជាលើកដំបូង។

១៩៣៩ – អត្តពលិក​​អាមេរិក

អត្តពលិក​​អាមេរិក Ralph Boston ដែលជា​បុរស​ដំបូង​គេ​ ​លោត​បានចម្ងាយ​ជាង ៨.២៣ ម៉ែត្រ បានកើត​នៅ Laurel រដ្ឋ Mississippi។

ឆ្នាំ១៩៣៦ – ប្រទេសអ៊ីតាលី បានកាត់បញ្ចូលប្រទេសអេត្យូពី

៧ខែបន្ទាប់ពីការលុកលុយប្រទេសអេត្យូពី និងបានជំរុញឲ្យអធិរាជ Haile Selassie ទី១ និរទេសខ្លួន, ប្រទេសអ៊ីតាលី បានកាត់បញ្ចូលប្រទេសអេត្យូពីជាផ្នែកមួយនៃ អាហ្វ្រិកខាងកើតរបស់អ៊ីតាលី។

ឆ្នាំ ១៥០២ – Christopher Columbus

អ្នករុករក និងជាឧត្តមនាវី Christopher Columbus ដែលត្រូវគេចាត់ទុកជាយូរយារណាស់មកហើយថាជា អ្នករកឃើញពិភពលោកថ្មី បានចេញដំណើរពីទីក្រុង Cádiz នៃប្រទេសអេស្ប៉ាញ ក្នុងការធ្វើដំណើរទីបួន និងជាដំណើរចុងក្រោយរបស់គាត់ ដោយសង្ឃឹមថានឹងស្វែងរកផ្លូវទៅកាន់ទ្វីបអាស៊ី៕

ប្រែសម្រួល៖ Vann Vann