អំបិលល្អជាងគេលើលោក តម្លៃកប់ពពក ១គីឡូក្រាមរាប់រយដុល្លារ

អំបិល​មួយ​ប្រភេទ​មាន​ប្រភព​មក​ពី​ប្រទេស​កូរ៉េ ​ធ្វើ​ឱ្យ​មនុស្ស​ជា​ច្រើន​ផ្ទុះការ​ភ្ញាក់​ផ្អើល​ជា​មួយ​នឹង​តម្លៃ​ខ្ពស់​កប់​ពពក​ដល់​ទៅ ៣៥០ដុល្លារអាមេរិក ក្នុង​១​គីឡូក្រាម។ វាជាអំបិលប្រណីត ដោយប្រើបចេ្ចកទេសទំនើបដើម្បីផលិត ហើយត្រូវបានគេអះអាងថា មានគុណភាពខ្ពស់ និងល្អខ្លាំងណាស់សម្រាប់សុខភាព។

អំបិលនេះ ឈ្មោះថា អំបិលឫស្សី។ ជាអំបិលប្រពៃណីរបស់កូរ៉េ ដែលមានតម្លៃថ្លៃជាងជាងគេលើលោក។ វាបង្ហាញខ្លួនលើកដំបូង នៅក្នុងប្រទេសកូរ៉េ តាំងពីរាប់ពាន់ឆ្នាំមុន។ អំបិលឫស្សី វាជាអំបិលសុទ្ធបំផុតនៅលើពិភពលោក ដោយសារដំណើរការផលិតដ៏ហ្មត់ចត់ ទំនើប និងមានផលល្អចំពោះសុខភាពរបស់មនុស្សទូទៅ។

ដើម្បីធ្វើអំបិលឫស្សី គេត្រូវដុតអំបិលក្នុងបំពង់ឬស្សីចំនួន ៩ដង នៅក្នុងឡ ដែលមានសីតុណ្ហភាពជាង ១ពាន់អង្សារសេ។ នៅដំណាក់កាលទី៩ សីតុណ្ហភាពនៅក្នុងឡឡើងដល់ ១០០០-១៥០០ អង្សារសេឯណោះ នោះទើបគុណភាពអំបិលត្រឹមត្រូវតាមកម្រិតស្តង់ដារ។ ដោយសារជនជាតិកូរ៉េបុរាណមានជំនឿថា ការដុតអំបិលនៅសីតុណ្ហភាពខ្ពស់បែបនេះច្រើនដង បូករួមនឹងសារធាតុចិញ្ចឹមដែលមាននៅក្នុងឬស្សីបញ្ចូលទៅក្នុងអំបិលផង ទើបធ្វើឱ្យវាប្រែក្លាយទៅជាអំបិលដែលល្អគ្មានពីរ។

យោងតាមឱសថបុរាណរបស់ប្រទេសកូរ៉េ អំបិលឫស្សីមានប្រសិទ្ធភាពខ្ពស់ក្នុងការទ្រទ្រង់ និងព្យាបាលជំងឺជាច្រើន ដោយជួយបណ្ដេញជាតិពុល ជួយស្ដារ​រាងកាយ ជាពិសេសបញ្ហាទាក់ទងនឹងមាត់។ ដោយហេតុផលនេះហើយ បានជាប្រជាជនកូរ៉េប្រើអំបិលឬស្សីជំនួសអំបិលពណ៌ស រហូតក្លាយជាទម្លាប់ប្រចាំថ្ងៃរបស់ពួកគេ៕

ប្រែសម្រួល៖ សន្យា

ចុចអាន៖ មក​ដឹង​អត្ថប្រយោជន៍​អំបិល​ខ្មៅ ​ល្អ​ជាង​អំបិល​ធម្មតា​យ៉ាង​ម៉េច​ខ្លះ?