នាយករដ្ឋមន្ត្រី ៨រូប កាន់តំណែង ខ្លីបំផុតក្នុងប្រវត្តិសាស្រ្តអង់គ្លេស

ក្នុងរយៈពេលប៉ុន្មានឆ្នាំចុងក្រោយនេះ នយោបាយរបស់អង់គ្លេស មានភាពច្របូកច្របល់មែនទែន ដោយមានការផ្លាស់ប្តូរនាយករដ្ឋមន្ត្រីយ៉ាងញឹកញាប់បំផុត។

ចុងក្រោយគេ លោកស្រី Liz Truss បាន​ក្លាយ​ជា​នាយក​រដ្ឋមន្ត្រី​ដែល​កាន់​តំណែង​ខ្លី​បំផុត​ក្នុង​ប្រវត្តិសាស្ត្រ​អង់គ្លេស ដោយ​លាលែង​ពី​តំណែង​ក្រោយ​ពី​កាន់​អំណាច​បានត្រឹម​តែ ៤៤ ថ្ងៃប៉ុណ្ណោះ។

ថ្ងៃនេះ កម្ពុជាថ្មី សូមបង្ហាញជូន នាយករដ្ឋមន្ត្រីអង់គ្លេសទាំង៨រូប ដែលកាន់តំណែង ក្នុងរយៈពេលខ្លីបំផុត៖

នៅរសៀលថ្ងៃព្រហស្បតិ៍ លោកស្រី Truss បានលាលែងពីតំណែង បន្ទាប់ពីមានការចលាចល និងជម្លោះជាច្រើនសប្តាហ៍នៅក្នុងគណបក្សអភិរក្ស។

១. លោកស្រី Liz Truss – ៤៤ថ្ងៃ

លោកស្រី Liz Truss គឺជានាយករដ្ឋមន្ត្រីដែលកាន់តំណែងខ្លីបំផុតក្នុងប្រវត្តិសាស្ត្រអង់គ្លេស។

លោកស្រី Truss បានចាប់ផ្តើមតំណែងជានាយករដ្ឋមន្ត្រីនៅថ្ងៃទី០៦ខែកញ្ញា ហើយកាន់អំណាចមិនបានប៉ុន្មានថ្ងៃផង ម្ចាស់ក្សត្រិយានី Elizabeth ទី២ ក៏សោយទិវង្គត។

ការមិនសប្បាយចិត្តជាទូទៅជំវិញកញ្ចប់សេដ្ឋកិច្ចខ្នាតតូច និងការបះបោរក្នុងគណបក្ស នាំឲ្យរដ្ឋមន្ត្រី២រូបលាលែងពីតំណែង ហើយនៅទីបំផុត លោកស្រី Truss ក៏បានចុះចេញនៅថ្ងៃទី២០ខែតុលាឆ្នាំ២០២២។

២. លោក Sir Alec Douglas-Home – ១ឆ្នាំ ១ថ្ងៃ

លោក Sir Alec Douglas-Home បានក្លាយជានាយករដ្ឋមន្ត្រីនៅខែតុលាឆ្នាំ១៩៦៣ បន្ទាប់ពីលោក Harold Macmillan បានលាលែងពីតំណែង ក្នុងអំឡុងពេលមានវិបត្តិគណបក្សអភិរក្ស។ នៅឆ្នាំ១៩៦៤ លោក Douglas-Home បានចាញ់ឆ្នោតលោក Harold Wilson។

៣.លោក Sir Anthony Eden – ១ឆ្នាំ ២៧៩ថ្ងៃ

បន្ទាប់ពីបានគ្រប់គ្រងរដ្ឋាភិបាលអភិរក្សនិយមក្នុងទសវត្សរ៍ឆ្នាំ១៩៥០ វាគឺជាវិបត្តិ Suez ដែលនាំឲ្យតំណែងរបស់លោក Sir Anthony Eden ត្រូវដួលរលំ។ ថ្វីបើមានការលើកឡើងអំពីបញ្ហាសុខភាពមិនល្អ ជាដើមហេតុសម្រាប់ការលាលែងរបស់គាត់ក៏ដោយ ប៉ុន្តែមនុស្សជាច្រើនជឿថា ការចាកចេញរបស់គាត់គឺដោយសារតែមានការយល់ច្រឡំ ជុំវិញការឃុបឃិតរបស់គាត់ជាមួយបារាំង និងអ៊ីស្រាអែល។

៤. លោក Gordon Brown – ២ឆ្នាំ ៣១៨ថ្ងៃ

សាធារណជន​អង់គ្លេស​ មិន​ដែល​គាំទ្រ​​មេដឹកនាំ​មិន​ជាប់​ឆ្នោតឡើយ ដូច្នេះ​នៅពេល​ដែល​អតីត​អធិការបតី​ Gordon Brown ចូល​កាន់​តំណែង, ការ​ស្ទង់​មតិ​មិន​បង្ហាញការពេញចិត្តនោះទេ។ លោក Brown បានចាញ់លោក David Cameron ​ក្នុង​ការ​បោះឆ្នោត​សកល​ឆ្នាំ២០១០។

៥. លោក Neville Chamberlain – ២ឆ្នាំ ៣៤៨ថ្ងៃ

ភាពឆោតល្ងង់របស់លោក Neville Chamberlain នៅតែដក់ជាប់ក្នុងចិត្តប្រជាជនអង់គ្លេស។ ត្រលប់ពីការចរចាសន្តិភាពជាមួយ Adolf Hitler, លោក Chamberlain បានប្រកាសថា “ខ្ញុំជឿថាវាជាសន្តិភាពសម្រាប់ពេលវេលារបស់យើង” នៅក្នុងខែកញ្ញា ឆ្នាំ ១៩៣៨។ គាត់មិនអាចកាន់តំណែងកំពូលបានយូរឡើយ បន្ទាប់ពីការផ្ទុះឡើងនៃសង្គ្រាមលោកលើកទីពីរ។

៦. លោកស្រី Theresa May -​ ៣ឆ្នាំ ១១ថ្ងៃ

លោកស្រី Theresa May បានចូលកាន់តំណែងក្នុងឆ្នាំ ២០១៦ ក្រោយពេលលោក David Cameron ចុះចេញបន្ទាប់ពីការធ្វើប្រជាមតិ Brexit។ កិច្ចការ​ដែល​សឹងតែ​មិន​អាច​ទៅ​រួច​នោះ លោកស្រី May បាន​កាន់កាប់​រដ្ឋាភិបាល​ចំពេល​​មាន​ជម្លោះ​ខ្លាំង។

កិច្ចព្រមព្រៀង Brexit របស់លោកស្រី បានទទួលបរាជ័យម្តងហើយម្តងទៀតនៅក្នុងសភា ហើយនេះមានន័យថា ត្រឹមខែមិថុនា ឆ្នាំ២០១៩ តំណែងរបស់លោកស្រីក៏ត្រូវបានបញ្ចប់។

៧. លោក Jim Callaghan – ៣ឆ្នាំ ២៩ថ្ងៃ។

លោក Jim Callaghan គឺជាជនរងគ្រោះនៃក្បាលម៉ាស៊ីននយោបាយ ដែលដឹកនាំដោយ លោកស្រី Margaret Thatcher។ គាត់គឺជានាយករដ្ឋមន្ត្រីទីបួនរបស់គណបក្សការងារ ប៉ុន្តែមិនទទួលបានប្រជាប្រិយភាពទេ។

លោក Callaghan ត្រូវតស៊ូជាមួយនឹងអត្រាគ្មានការងារធ្វើ និងកម្រិតនៃការមិនសប្បាយចិត្តយ៉ាងខ្លាំង ជាហេតុនាំឲ្យមានជ័យជម្នះយ៉ាងងាយស្រួលដល់គូប្រជែងរបស់គាត់។

៨. លោក Boris Johnson – ៣ឆ្នាំ ៤៤ថ្ងៃ

អាជីពរបស់លោក Boris Johnson ជានាយករដ្ឋមន្ត្រី ពោរពេញដោយភាពចម្រូងចម្រាស។ ការព្យាយាមដឹកនាំចក្រភពអង់គ្លេស ឆ្លងកាត់វិបត្តិជំងឺរាតត្បាតជាសកល និងកិច្ចព្រមព្រៀង Brexit បានធ្វើឲ្យគាត់ រងការប្រមាថ និងមើលងាយ សូម្បីតែក្នុងគណបក្សរបស់គាត់ផ្ទាល់។

រដ្ឋាភិបាលរបស់គាត់​ ត្រូវដួលរលំនៅក្រោមរឿងអាស្រូវបង្កដោយខ្លួនឯង។ លោកក៏បានចុះចេញពីតំណែងនៅថ្ងៃទី ៧ខែកញ្ញា ឆ្នាំ២០២២៕

ប្រែសម្រួល៖ Vann Vann

ប្រភព៖ History

ចុចអាន៖ ដំណើររឿង ចាប់តាំងពីការឡើងកាន់អំណាច និងធ្លាក់ពីតំណែង របស់លោកស្រី Liz Truss