មុនពេលល្បី តារាជួរមុខកូរ៉េខាងត្បូង Lee Min-ho មិនធ្លាប់ចង់ចូលសិល្បៈទេ

លោក Lee Min-ho ជាតារាសម្ដែង តារាចម្រៀង ជាតារាម៉ូដែល និងជាអ្នកជំនួញ ដែលត្រូវបានគេស្ញប់ស្ញែងនូវរូបរាងស្រស់សង្ហា សមត្ថភាពពហុជំនាញ ព្រមទាំងជាតារាដែលបានចូលរួមសកម្មភាពសប្បុរសធម៌ក្នុងសង្គមយ៉ាងផុសផុល។

ចាប់តាំងពីប្រឡូកចូលសិល្បៈដំបូងក្នុងឆ្នាំ ២០០៦ មក Lee Min-ho មានប្រជាប្រិយភាពខ្លាំង ក្នុងតំបន់អាស៊ី និងនៅទូទាំងពិភពលោក។ តារាប្រុសកូរ៉េខាងត្បូងរូបនេះក៏ធ្លាប់ទទួលបានពានរង្វាន់ជាច្រើន ព្រោះតែទេពកោសល្យយ៉ាងប៉ិនប្រសប់របស់លោក ប៉ុន្តែមុនល្បីល្បាញដូចពេលនេះ លោកមិនធ្លាប់ស្រមៃក្លាយជាតារានោះទ។

Lee Min-ho កើតនៅថ្ងៃទី២២ ខែមិថុនា ឆ្នាំ១៩៨៧ ទីក្រុងសេអ៊ូល ប្រទេសកូរ៉េខាងត្បូង។ លោកជាកូនពៅក្នុងគ្រួសារដែលបងប្អូនពីរនាក់។ ឪពុកម្ដាយរបស់លោកជាពុទ្ធសាសនិក ប៉ុន្តែលោកមិនប្រតិបត្តិសាសនាណាមួយឡើយ។ កាលនៅក្មេង Lee Min-ho ចង់ក្លាយជាកីឡាករបាល់ទាត់អាជីព ប៉ុន្តែតារាវ័យ ៣៥ឆ្នាំរូបនេះ បានផ្លាស់ប្ដូរបំណងប្រាថ្នាវិញ ក្រោយរងរបួសធ្ងន់ធ្ងរ អំឡុងពេលលេងបាល់ទាត់ កាលរៀនថ្នាក់ទី៥។

Lee Min-ho បញ្ចប់ថ្នាក់បរិញ្ញាប័ត្រភាពយន្ត នៅក្នុងមហាវិទ្យាល័យសិល្បៈ និងការរចនា នៃសាកលវិទ្យាល័យ Konkuk ខណៈបច្ចុប្បន្នកំពុងបន្តការសិក្សាថ្នាក់អនុបណ្ឌិតផ្នែកភាពយន្តនៅសាកលវិទ្យាល័យ Kookmin Graduate School។

មុនពេលមានទស្សនិកជនទទួលស្គាល់ក្នុងកំលុងឆ្នាំ ២០០៦ តាមពិតតួឯកប្រុសរឿង អធិរាជឆ្លងភព ចូលខ្លួនក្នុងវិស័យភាពយន្តតាំងពីឆ្នាំ ២០០២ មកម្ល៉េះ ប៉ុន្តែកាលណោះបានត្រឹមជាតួរាយរងប៉ុណ្ណោះ។ យ៉ាងណាមិញ Lee Min-ho ល្បីល្បាញខ្លាំងបន្ទាប់ពីសម្ដែងក្នុងរឿង “City Hunter” ឆ្នាំ២០១១។ មកទល់ពេលនេះ លោកសម្ដែងទាំងរឿងភាគ និងរឿងដុំប្រមាណ ២៨រឿង។

ក្រៅពីសម្ដែង តារាប្រុសរូបនេះ ជាបុគ្គលដ៏មានឥទ្ធិពលនៅលើប្រព័ន្ធផ្សព្វផ្សាយផងដែរ។ មិនថាបណ្ដាញ Twitter, Weibo, Instagram និង Facebook នោះទេ លោកមានអ្នកតាមដានរាប់លាននាក់ រហូតជាប់ឈ្មោះជា “ស្តេចនៃប្រព័ន្ធផ្សព្វផ្សាយសង្គម” ទៀតផង។

មិនតែប៉ុណ្ណោះ Lee Min-ho បានបង្កើតប្រវត្តិសាស្ត្រក្លាយទៅជាតារាកូរ៉េដំបូងដែលបានបង្ហាញខ្លួននៅលើកញ្ចក់ទូរទស្សន៍ China’s CCTV Lunar New Year Gala  របស់ចិន ក្នុងឆ្នាំ ២០១៤។ លោក Lee Min-ho ត្រូវបានគេអញ្ជើញឲ្យទៅសម្តែងនៅក្នុងកម្មវិធីទូរទស្សន៍នេះ ដែលជាកម្មវិធីទទួលបានការទស្សនាច្រើនជាងគេបំផុតក្នុងប្រទេសចិននាឱកាសបុណ្យចូលឆ្នាំថ្មី។ ពេលនោះ មានទស្សនិកជនប្រមាណ ៧០០លាននាក់បានទន្ទឹងរង់ចាំមើល Lee Min-ho ច្រៀងបទ Boys Over Flowers ជាមួយតារាចម្រៀងតៃវ៉ាន់ Harlem Yu។

បច្ចុប្បន្ន តារាជួរមុខកូរ៉េខាងត្បូងរូបនេះ មានទ្រព្យសម្បត្តិ ២៦លានដុល្លារអាមេរិក៕

ប្រែសម្រួល៖ សន្យា

ចុចអាន៖ តួឯកប្រុស “Squid Game” ពីអ្នករត់តុកាហ្វេ ក្លាយជាកំពូលតារាស៊ីថ្លៃខ្ពស់ជាងគេរបស់កូរ៉េខាងត្បូង