គន្លឹះ១០ចំណុច ក្នុងការថែរក្សាទំនាក់ទំនងស្នេហារបស់អ្នកឲ្យបានគង់វង្ស

ស្នេហា គឺជារឿងដែលមនុស្សម្នាក់ៗត្រូវមានចៀសមិនផុតឡើយ គ្រាន់តែទម្រង់របស់ស្នេហានីមួយៗមិនដូចគ្នាប៉ុណ្ណោះ។ មនុស្សមួយចំនួនបានជួបស្នេហាពិត និងសមប្រកប ធ្វើឲ្យជីវិតគូរបស់ពួកគេមានភាពរស់រវើក ស្រឡាញ់គ្នាដល់ចាស់កោងខ្នង។ ប៉ុន្តែ សម្រាប់មនុស្សមួយចំនួន បែរជាជួបតែស្នេហាបែកបាក់ នៅមិនចុះសម្រុងគ្នា ទោះបីព្យាយាមបើកចិត្តទទួលយកអ្នកថ្មីជាបន្តបន្ទាប់ ក៏នៅតែបរាជ័យ។

តើកត្តាទាំងនេះ បណ្តាលមកពីមូលហេតុអ្វី? តើមនុស្សគ្រប់រូបគួរតែធ្វើបែបណា ទើបឲ្យជីវិតស្នេហារបស់ពួកគេទទួលបានភាពជោគជ័យ និងរស់នៅចុះសម្រុងគ្នាល្អ? ខាងក្រោមនេះ គឺជាគន្លឹះ​ ១០ចំណុច ដើម្បីអ្នក និងគូស្នេហ៍របស់អ្នកសម្របខ្លួនជាមួយគ្នាបានល្អ៖

១.ត្រូវស្មោះត្រង់នឹងដៃគូ

ការកំណត់ខ្លួនឯងឲ្យមានភាពស្មោះត្រង់ចំពោះដៃគូ គឺជារឿងដំបូងបំផុតដែលអ្នកត្រូវតែគិតមុននឹងចាប់ផ្តើមមានស្នេហា។ អ្នកត្រូវប្រាកដខ្លួនឯងឲ្យច្បាស់សិនថា អ្នកនឹងមិនប្រែចិត្តមានអ្នកថ្មី ឬទាក់ទងមនុស្ស២នាក់ក្នុងពេលតែមួយ ប្រសិនជាអ្នកមិនចង់បាត់បង់គូស្នេហ៍របស់ខ្លួន ឬមិនចង់ស្តាយក្រោយនឹងទង្វើរបស់ខ្លួន។

២.ធ្វើជាអ្នកស្តាប់ ពិភាក្សា និងចែករំលែក

ពាក្យថា “គូស្នេហ៍” មិនមែនពោលតែពាក្យស្រឡាញ់មួយម៉ាត់ឡើយ ត្រូវមានទង្វើ និងការយកចិត្តទុកដាក់ចំពោះគ្នាទៅវិញទៅមកផងដែរ។ គូស្នេហ៍គ្រប់រូប គួរយកបញ្ហាដែលខ្លួនជួបប្រទះ រួចគិតថា ចែករំលែកឲ្យគ្នាបាន មកចែករំលែក ពិភាក្សាគ្នាទៅវិញទៅមក ដោយការយកចិត្តទុកដាក់ ដើម្បីស្វែងរកដំណោះស្រាយមួយប្រកបដោយប្រសិទ្ធភាព។ ការធ្វើបែបនេះ នឹងធ្វើឲ្យដៃគូរបស់អ្នកមានអារម្មណ៍ថាកក់ក្តៅ មានស្មាផ្អែកនៅពេលដែលគេជួបបញ្ហា។​

៣.កុំរករឿងនៅពេលដែលដៃគូចំណាយពេលជាមួយមិត្តភក្តិ ឬក្រុមគ្រួសាររប​ស់ពួកគេ

នៅពេលដែលគូស្នេហ៍របស់អ្នកប្រាប់ថា គេនឹងទៅទទួលទានអាហារពេលល្ងាច ឬដើរលេងជាមួយមិត្តភក្តិ និងក្រុមគ្រួសាររបស់គេ ចូរអ្នកកុំខឹងសម្បារ ឬរករឿងគេ។ អ្នកត្រូវដឹងថា ស្នេហាមិនមែនជាការបិទសិទ្ធិ អ្នកត្រូវបើកចិត្តឲ្យទូលាយឲ្យគេទៅដោយសប្បាយចិត្ត កុំហួងហែងពេក កុំបិទសិទ្ធិខ្លាំងរហូតដល់គេមានអារម្មណ៍ថា មានសម្ពោធ និងគ្មានសេរីភាពពេលនៅជាមួយអ្នកឲ្យសោះ។

៤.កុំយករឿងអតីតកាលមកលាយជាមួយបច្ចុប្បន្នភាព

ធម្មតាទេគូស្នេហ៍មិនដែលផ្អែមល្ហែមរហូតឡើយ តែងមានភាពល្វីងជូរចត់ខ្លះ ដូចជា ការអន់ចិត្ត ប្រច័ណ្ឌ និងឈ្លោះប្រកែកគ្នាជាដើម។ រឿងដែលសំខាន់ គឺស្រឡាញ់អ្នកនៅក្នុងបច្ចុប្បន្នភាព។ សូមកុំយកអតីតកាលមកពាក់ព័ន្ធជាមួយឲ្យសោះ អាចបណ្តាលឲ្យអ្នកម្ខាងទៀតមិនសប្បាយចិត្តជាមួយអ្វីដែលយើងកំពុងតែធ្វើ។ អ្នកមិនត្រូវរំលឹកពីអ្នកចាស់ ឬ សរសើរសង្សារចាស់ពីចំណុចដែលសង្សារថ្មីអ្នកមិនដូចគេទេ។

៥.រៀនលើកលែងទោស និងបំភ្លេច

កំហុសបន្តិចបន្តួចដែលកើតមានចេញពីកំហុសអចេតនា សូមកុំធ្វើការស្តីបន្ទោស ឬទម្លាក់កំហុសដាក់គ្នាទៅវិញទៅមក ប៉ុន្តែ ត្រូវចេះអត់ឱន និងលើកលែងទោសឲ្យគ្នា។ មួយវិញទៀត ក៏ត្រូវបំភ្លេចកំហុសនោះចោលដូចគ្នា កុំព្យាយាមជីកកកាយរឿងដែលកន្លងហួសទៅហើយនោះ ឡើងមកវិញអី។

៦.ជឿជាក់គ្នាទៅវិញទៅមក

ចូរអ្នកកុំព្យាយាមគិតតែពីចំណុចអាក្រក់ៗរបស់គេ និងមិនទុកចិត្តដៃគូរបស់ខ្លួន។ អ្នកមិនត្រូវសង្ស័យលើដៃគូរបស់ខ្លួនថាក្បត់ចិត្តគ្រប់ពេលឡើយ ប្រសិនជាអ្នកនៅតែបន្តធ្វើបែបនេះ បន្តទាមទារពិនិត្យទូរស័ព្ទរបស់គេជារឿយៗ នឹងធ្វើឲ្យទំនាក់ទំនងអ្នកទាំងពីរ ចុះខ្យោយបន្តិចម្តងៗ។ ភាគីទាំងពី កុំព្យាយាមប្រច័ណ្ឌដោយគ្មានហេតុផល ទង្វើទាំងអស់នេះ អាចបណ្តាលឲ្យអស់ចិត្តចំពោះគ្នាជារឿយៗ។

៧.និយាយពាក្យថា សុំទោស

ប្រសិនជានរណាម្នាក់បានធ្វើខុសលើបញ្ហាអ្វីមួយ អ្នកត្រូវហ៊ាននិយាយនូវពាក្យសុំទោសចេញមក កុំគិតថា ជាពាក្យដែលបង្ហាញពីភាពទន់ជ្រាយ ឬអន់ តែ គឺជាពាក្យដែលបង្ហាញពីទំនួលខុសត្រូវ និងការគោរពទៅវិញទេ។ ក្រោយពីសុំទោស អ្នកក៏ត្រូវបង្ហាញដោយទង្វើឲ្យឃើញថា អ្នកពិតជាកែប្រែចំណុចមិនល្អនោះចោល ដោយការកសាងគុណសម្បត្តិឡើងវិញ។

៨.ទទួលយកពីចំណុចមិនល្អរបស់ដៃគូ

ចំណុចល្អៗ អ្នកច្បាស់ជាទទួលយកបានហើយ ចុះចំណុចមិនល្អវិញ តើអ្នកគួរធ្វើយ៉ាងណាចំពោះចំណុចមិនល្អរបស់អ្នកម្ខាងទៀត? អ្នកត្រូវចាំថា ស្នេហាមិនមែនល្អឥតខ្ចោះទេ ហើយក៏គ្មាននរណាម្នាក់គ្មានចំណុចអាក្រក់ដែរ។ គ្រប់គ្នាតែងមានចំណុចល្អ និងមិនល្អរៀងៗខ្លួន អ្វីដែលសំខាន់ គឺអ្នកព្រមទទួលយកចំណុចមិនល្អរបស់គេបាន ឬអត់? កុំព្យាយាមឲ្យគេផ្លាស់ប្តូរដោយសារតែយើងម្នាក់ តែអាចថយម្នាក់មួយជំហាន ដើម្បីទទួលយកគ្នាទៅវិញទៅមក និងសម្របគ្នា ឈានដល់ការរស់នៅដោយចុះសម្រុងជាមួយគ្នា។

៩.ឲ្យគូស្នេហ៍សាកល្បងពីអ្វីដែលគេចង់ធ្វើ

អ្នកគួរគោរពតាមការសម្រេចចិត្តរបស់គូស្នេហ៍របស់អ្នក តាមរយៈគាំទ្រការសម្រេចចិត្តរបស់គេ ប្រសិនជាគេចង់ធ្វើអ្វីមួយនោះ។ អ្នកត្រូវលើកទឹកចិត្ត ផ្តល់យោបល់ល្អៗ និងឧស្សាហ៍សួរនាំពីស្ថានភាព និងការរីកចម្រើនមួយនោះ។ ប្រសិនជាការសាកល្បងធ្វើអ្វីមួយបានជោគជ័យ អ្នកនឹងមានសុភមង្គលជាមួយគ្នា​ តែបើបរាជ័យអ្នកក៏មិនត្រូវលែងដៃនរណាម្នាក់ចោលឡើយ ត្រូវជួយគ្នាស្វែងរកដំណោះស្រាយមួយដែលល្អ។

១០.កុំបោះបង់គ្នាក្នុងគ្រាលំបាក

ស្រឡាញ់គ្នាមករាប់ឆ្នាំ តស៊ូជាមួយគ្នា ក៏ច្រើនណាស់មកហើយ តែអ្នកកុំភ្លេចថា នរណាឈរជាមួយអ្នកក្នុងគ្រាលំបាក? នរណានៅក្បែរអ្នក ជួយដោះស្រាយបញ្ហាជាមួយអ្នកនៅពេលអ្នកដួល គ្មានទីពឹង? ចូរអ្នកចាំថា មនុស្សម្នាក់ដែលខំលះបង់ ដើម្បីអ្នក អ្នកក៏មិនត្រូវបោះបង់គេចោលដោយសារហេតុផលបន្តិចបន្តួចឡើយ។

យ៉ាងណាមិញ ប្រសិនជាអ្នកចង់បាននរណាម្នាក់ដែលស្រឡាញ់អ្នកពិតប្រាកដ អាចតស៊ូជាមួយគ្នាទៅថ្ងៃមុខបាន ទោះមានឧបសគ្គអ្វីក៏ដោយនោះ សូមអ្នកកុំគិតពីសម្រស់ លុយកាក់ តែត្រូវមើលពីចរិតលក្ខណៈ ចិត្តគំនិតរបស់បុគ្គលនោះ ទើបជារឿងត្រឹមត្រូវ។ ទ្រព្យសម្បត្តិ សម្រស់ គង់មានថ្ងៃណាមួយបាត់បង់ជាក់ជាមិនខាន ដូច្នេះ ចូរអ្នកគិតគូរឲ្យបានល្អិតល្អន់ មានទំនួលខុសត្រូវ និងស្មោះត្រង់ចំពោះស្នេហារបស់អ្នក៕

ដោយ៖ អុន ស្រីមាន