បុគ្គលល្បី ៥ រូប ធ្លាប់ត្រូវបណ្ដេញចេញពីការងារមុនទទួលជោគជ័យ

បុគ្គលល្បីៗទទួលបានជោគជ័យក្នុងការងារ និងជំនួញរាប់លានដុល្លារមិននឹកស្មានថាពួកគាត់ធ្លាប់បរាជ័យក្នុងការងារសោះ ។ ពួកគាត់ទាំង ៥ នាក់ខាងក្រោមសុទ្ធជាបុគ្គលជោគជ័យដែលធ្លាប់ត្រូវបណ្ដេញចេញពីការងារ ៖

១. Steve Jobs

Steve Jobs បានចាប់ផ្ដើមបង្កើតកុំព្យូទ័រ Apple នៅយានដ្ឋានរបស់គាត់ក្នុងឆ្នាំ ១៩៧៦ ដល់ឆ្នាំ ១៩៨០ Apple ក្លាយជាអាជីវកម្មដែលមានតម្លៃរាប់ពាន់លានដុល្លារ និងជាក្រុមហ៊ុនដែលធ្វើការជួញដូរជាសាធារណៈយ៉ាងទូលំទូលាយ ។ នៅក្នុងសុន្ទរកថាឆ្នាំ ២០០៥ Steve បាននិយាយនៅ Stanford ថា កាលពីឆ្នាំមុនគាត់ដាក់ចេញការបង្កើតដ៏ល្អបំផុតគឺ Macintosh ហើយលោកទើបតែមានអាយុ ៣០ ឆ្នាំប៉ុណ្ណោះមុនត្រូវគេដេញចេញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រានោះ Apple កំពុងដំណើរការល្អ Steve គិតថាចង់ជួលមនុស្សម្នាក់ដែលមានសមត្ថភាពមករួមដៃធ្វើការជាមួយគ្នា មួយឆ្នាំដំបូងគ្រប់យ៉ាងទៅមុខយ៉ាងរលូន ប៉ុន្តែក្រោយមកចក្ខុវិស័យរបស់ពួកគេអំពីអនាគតចាប់ផ្ដើមខុសគ្នា ហើយសូម្បីក្រុមប្រឹក្សាភិបាលក៏ចូលខាងអ្នកផ្សេងដែរដូច្នេះ Steve ក៏ចាកចេញទៅទាំងអស់សង្ឃឹម ។ ដល់ឆ្នាំ ១៩៩៧ ទើបលោកត្រឡប់មកវិញអភិវឌ្ឍន៍ iPod, iPhone, និងiPad ។

២. Oprah Winfrey

មុនពេល Oprah ក្លាយជាតារាទូរទស្សន៍គាត់ត្រូវបានដេញចេញពីការងាររាយការណ៍ព័ត៌មាននៅ WJZ-TV របស់ Baltimore ដោយសារតែគាត់មិនសក្តិសមម្រាប់ព័ត៌មានទូរទស្សន៍ ។ Oprah គឺជាផលិតករទូរទស្សន៍ តារាសម្តែង អ្នកនិពន្ធ និងសប្បុរសជន អ្នកស្រីត្រូវគេស្គាល់ច្រើនបំផុតពីកម្មវិធីរបស់គាត់គឺ “The Oprah Winfrey Show” ដែលចាក់ផ្សាយពីទីក្រុងឈីកាហ្គោ អស់រយៈពេល ២៥ ឆ្នាំ ។

៣. JK Rowling

អ្នកស្រី JK គឺជាអ្នកនិពន្ធរឿង “Harry Potter” ដ៏ល្បីគាត់ធ្លាប់ធ្វើការជាលេខារហូតត្រូវគេដេញចេញព្រោះលួចសរសេររឿងប្រលោមលោកក្នុងម៉ោងការងារ ។ ក្រោយមកក្នុងឆ្នាំ ២០០០ សៀវភៅ ៣ រឿងរបស់ Harry Potter លក់ចេញ ៣៥ លានក្បាល និងរកប្រាក់ចំណូលសរុបបាន ៤៨០ លានដុល្លារ ។

៤. Walt Disney

The Kansas City Star បានដេញលោក Disney ចេញកាលពីគាត់មានអាយុខ្ទង់ ២០ ឆ្នាំដោយសារតែមិនមានគំនិតច្នៃប្រឌិតគ្រប់គ្រាន់ ។ បច្ចុប្បន្នក្រុមហ៊ុន The Walt Disney មានតម្លៃ ៥៩ ពាន់លានដុល្លារបូករួមទាំង សួនកម្សាន្ត ការបោះពុម្ពផ្សាយ ភាពយន្ត និងទូរទស្សន៍ខ្សែកាប ។

៥. Thomas Edison

Thomas Edison ជាអ្នកបង្កើតអំពូលអគ្គិសនី ទូរលេខ និងកាមេរ៉ារូបភាពចលនាដំបូង ។ នៅយប់មួយក្នុងឆ្នាំ ១៨៦៧ គាត់កំពុងធ្វើការជាមួយនឹងថ្មអាស៊ីដ ពេលនោះគាត់បានធ្វើកំពប់អាស៊ីដស៊ុលហ្វួរីកទៅលើឥដ្ឋ វាហូរទៅតុចៅហ្វាយគាត់នៅខាងក្រោម នៅព្រឹកបន្ទាប់ Thomas ត្រូវបានបណ្តេញចេញតែម្ដង ។

ដូច្នេះយើងមិនគួរអស់សង្ឃឹមជាមួយការបរាជ័យក្នុងជីវិតឡើយ ព្រោះវាមិនបានមកកំណត់វាសនារបស់អ្នកតស៊ូទេ យើងគ្រប់គ្នាគប្បីមើលអ្នកទាំង ៥ ខាងលើជាគំរូទើបជាការប្រសើរ ៕

ប្រែសម្រួល ៖ វារី

ចុចអាន ៖ កញ្ញា Zoe Gabriel ក្លាយជាម៉ូដែលប្រចាំម៉ាក Charles & Keith ក្រោយរងការមាក់ងាយ