កញ្ញា Zoe Gabriel ក្លាយជាម៉ូដែលប្រចាំម៉ាក Charles & Keith ក្រោយរងការមាក់ងាយ

ថ្មីៗនេះ Zoe Gabriel បានថតរូបឃោសនាឲ្យម៉ាក Charles & Keith សម្រាប់ទិវាសិទ្ធនារីក្នុងរ៉ូបពណ៌ប្រផេះ ស្បែកជើងកវែងពណ៌ខ្មៅ និងកាបូបម៉ូដថ្មីពណ៌ស្វាយទើបនឹងចេញ បង្កការភ្ញាក់ផ្អើលជាខ្លាំងតាមប្រព័ន្ធអ៊ីនធឺណែត ។

រឿងទាំងអស់ចាប់ផ្ដើមឡើងកាលពីខែមករា ពេលក្មេងស្រី Gabriel រស់នៅប្រទេសសិង្ហបុរីបានធ្វើការបង្ហោះវីដេអូបង្អួតកាបូបម៉ាក Charles & Keith ដែលឪពុកទិញឲ្យតាមបណ្ដាញសង្គម Tik-Tok ថាជាកាបូបតម្លៃថ្លៃដំបូងរបស់នាង ស្រាប់តែមានអ្នកបញ្ចេញមតិបង្អាប់កាបូបនោះថាមិនថ្លៃ មិន Luxury ផងក៏អួតដែរ ។

ដោយតូចចិត្តពេក Gabriel ក៏ចេញវីដេអូឆ្លើយតបទាំងទឹកភ្នែករៀបរាប់ពីការលំបាកនៃគ្រួសាររបស់នាងព្រោះថាកាបូបតម្លៃ ៨០ ដុល្លារមិនថោកទេសម្រាប់ឪពុកនាង គាត់ខំសន្សំទម្រាំអាចទិញកាដូឲ្យកូនស្រីជាទីស្រលាញ់បាន ។ មិនបង្អង់យូរ Charles & Keith បានអញ្ជើញ Gabriel និង ឪពុកទៅទស្សនាទីស្នាក់ការ ហើយពិសាបាយជុំគ្នាជាមួយម្ចាស់ក្រុមហ៊ុនទៀតផង ។

ក្រៅពីនេះ Charles & Keith ដែលមានហាងចំនួន ៦០០ សាខាទូទាំងពិភពលោកនឹងបរិច្ចាគប្រាក់ចំណូល ២០ ភាគរយទៅឱ្យ UN Women ក្នុងឱកាសទិវាសិទ្ធនារីផងដែរ ៕

ប្រែសម្រួល ៖ វារី

ចុចអាន ៖ រូបរាងរបស់ ​Janie កំពុងរងការរិះគន់ថា ដូចមនុស្សទាស់សរសៃ