សុរាជាគ្រឿងកំដរអារម្មណ៍សម្រាប់កម្មវិធីជួបជុំគ្នាសប្បាយរីករាយ ដែលតែងបង្កបញ្ហាដល់សុខភាព និងផ្លាស់ប្ដូរអាកប្បកិរិយាធ្វើឲ្យមានអំពើហិង្សា ជាពិសេសគ្រោះថ្នាក់ចរាចរណ៍ ។ គ្រួសារជាច្រើនកំពុងមានបញ្ហានិងបែកបាក់ដោយសារគ្រឿងស្រវឹង ដូច្នេះមុនរៀបការជាមួយគាត់ អ្នកគប្បីសង្កេតពី ៨ សញ្ញានេះសិន ៖

១. បរិយាកាសជុំវិញខ្លួនពាក់ព័ន្ធនឹងសុរា

ពេលមានកម្មវិធី ឬអបអរសាទរអ្វីមួយ រឿងដំបូងដែលគាត់នឹកឃើញគឺផឹកជុំគ្នា សូម្បីមិត្តភ័ក្ដិហៅជួបជុំគ្នាក៏គ្មានអ្វីប្លែកពីសេពគ្រឿងស្រវឹងដែរ ។

២. គាត់ផឹកដើម្បីកាត់ស្ត្រេស ឬថប់បារម្ភ

សប្បាយចិត្តក៏ផឹក កើតទុក្ខក៏ផឹក គឺជាលេសសម្រាប់មនុស្សប្រមឹកដើម្បីសេពគ្រឿងស្រវឹងប៉ុណ្ណោះ ។

៣. ផឹកមិនប្រកាន់ពេលវេលា

មិនតែប៉ុណ្ណោះផឹកដាច់យប់ក៏មាន ទោះបីស្អែកត្រូវធ្វើការធម្មតាក៏បុគ្គលនោះប្ដេជ្ញាចិត្តផឹកដែរ ។

៤. ចរិតផ្លាស់ប្ដូរក្រោយស្រវឹង

អ្នកនឹងសង្កេតឃើញថាគាត់ចាប់ផ្ដើមឆេវឆាវ, ស្លូត, និងនិយាយច្រើនជាដើម ផ្ទុយពីអ្នកមិនសូវចេះផឹកដែលងងុយគេងពេលស្រវឹង ។

៥. រំលងសកម្មភាពប្រចាំថ្ងៃ

គាត់អាចបាត់ពីកន្លែងការងារ មិនសូវជួបជុំអ្នកផ្ទះ និងមិនឲ្យតម្លៃការជួបជុំធម្មតា ។

៦. គ្រួសារមានប្រវត្តិប្រើប្រាស់គ្រឿងស្រវឹង

ជួនកាលម្ដាយឪពុករបស់គាត់ជាអ្នកចូលចិត្តផឹកស៊ីញឹកញាប់បណ្ដាលឲ្យកូនយកគំរូតាម ។

៧. ផឹកមិនប្រកាន់ប្រភេទស្រា

មនុស្សមួយចំនួនផឹករើសម៉ាកស្រានិងប្រភេទស្រាណាស់ ដោយឡែកអ្នកញៀនស្រាមិនសូវរើសឡើយទោះបីជាម៉ាកនោះមានគុណភាពអន់ក៏នៅតែផឹក ។

៨. ឆាប់ខឹង

សរសៃប្រសាទត្រូវរងឥទ្ធិពលពីការសេពគ្រឿងស្រវឹងរយៈពេលយូរទើបបុគ្គលនោះមានចរិតឆេវឆាវទាំងមិនទាន់សេពគ្រឿងស្រវឹង ។

យោងតាម CDC បានឲ្យដឹងថា ក្នុងមួយឆ្នាំៗមនុស្សស្លាប់ដោយសារគ្រឿងស្រវឹងមានច្រើនជាង ១៤,០០០ នាក់នៅសហរដ្ឋអាមេរិក ៕

ប្រែសម្រួល ៖ វារី

ចុចអាន ៖ រឿង ៧ យ៉ាង ហាមធ្វើពេលស្រវឹង ព្រោះប៉ះពាល់សុខភាពធ្ងន់ធ្ងរ