នាឡិកាដៃមួយគ្រឿងដែលទិញក្នុងឆ្នាំ ១៩៦៤ ក្រោមតម្លៃ ៧០ ផោន (៨៨.៣៤ ដុល្លារ) អាចនឹងលក់បាន ៤៥,០០០ ផោន (៥៦,៨១២.៥០ ដុល្លារ) ក្នុងការដេញថ្លៃសប្ដាហ៍នេះ ។

នាឡិកា Rolex Submariner ខាងលើមានម្ចាស់ដើមឈ្មោះ Simon Barnett ជាអ្នកមុជទឹកប្រចាំឧទ្ធម្ភាគចក្រជួយសង្គ្រោះនៅក្នុង Royal Navy ដែលទទួលមរណភាពកាលពីឆ្នាំ ២០១៩ ។

បច្ចុប្បន្នកូនប្រុសរបស់គាត់ឈ្មោះ Pete Barnett កំពុងដាក់ដេញថ្លៃនាឡិកានោះ ហើយនិយាយថា “ពីមុននាឡិកា Rolex Submariner គឺជាឧបករណ៍ចាំបាច់ មិនមែនពាក់ដើម្បីលម្អដូចឥលូវទេ” ។ លោក Pete បន្ត “នាឡិកានេះមានតម្លៃណាស់ព្រោះធ្លាប់ជាវត្ថុសំខាន់របស់ឪពុកខ្ញុំសម្រាប់ធ្វើការ” ។

គួរបន្ថែមថាលោក Simon Barnett មានបទពិសោធន៍ចូលរួមក្នុងបេសកកម្មជួយសង្គ្រោះជាច្រើន ពិសេសឆ្នាំ ១៩៦៧ គាត់ស្ទើរតែបាត់បង់ជីវិតនៅពេលព្យាយាមជួយសង្គ្រោះអ្នកបើកឧទ្ធម្ភាគចក្រកងទ័ពជើងទឹកដែលបានធ្លាក់នៅសមុទ្រមេឌីទែរ៉ាណេ ។ 

ចំណែកនាឡិកាវិញនឹងដាក់ដេញថ្លៃក្នុងថ្ងៃព្រហស្បតិ៍ ស្អែកនេះដោយ TW Gaze ជាមួយតម្លៃរំពឹងទុកពី ៣៧,៨៧៥ ដុល្លារទៅ ៥៦,៨១២.៥០ ដុល្លារ ៕

ប្រភព ៖ BBC

ចុចអាន ៖ ៧ ចំណុចនេះហើយ ធ្វើឲ្យនាឡិកា Rolex ថ្លៃជាងគេបំផុត