មីនុយអាហារថ្នាក់អភិជនលើកប៉ាល់ ទីតានិក លក់ដាច់ក្នុងតម្លៃ ១០៣,០០០ ដុល្លារ

កាលពីថ្ងៃអាទិត្យ ទី១២ ខែវិច្ឆិកា ក្រុមហ៊ុនដេញថ្លៃរបស់ចក្រភពអង់គ្លេសបានឲ្យដឹងថា មីនុយអាហារពេលល្ងាច សម្រាប់អ្នកអភិជនលើកប៉ាល់ទីតានិក ត្រូវបានលក់ចេញក្នុងតម្លៃ ១០៣,០០០ ដុល្លារ ។

វាជាមីនុយអាហារពេលល្ងាចសម្រាប់អ្នកអភិជនបរិភោគកាលពីថ្ងៃទី១១ ខែមេសា ឆ្នាំ១៩១២ ពោលមុនហេតុការណ៍លិចកប៉ាល់ ៣ ថ្ងៃ ។ ក្នុងមីនុយនោះដែរមានដូចជា អយស្ទ័រ សាច់គោ ត្រីសាល់មុន សាច់មាន់ សាច់ចៀម និងបង្អែមលាងមាត់ផ្សេងៗទៀត ។

មីនុយខាងលើត្រូវបានលក់ចេញនៅឯក្រុមហ៊ុនដេញថ្លៃ Henry Aldridge & Son ក្នុងទីក្រុង Wiltshire ភាគនិរតីនៃអង់គ្លេស ។ ជាមួយគ្នានេះដែរ ទំនិញផ្សេងទៀតដែលលក់ចេញក្នុងការដេញថ្លៃនោះរួមមាន នាឡិកាដាក់ហោប៉ៅផលិតនៅប្រទេសស្វីសតម្លៃ ១១៨,៧០០ ដុល្លារ និងភួយតម្លៃ ១១៧,៥០០ ដុល្លារ ។

គួរបញ្ជាក់ថា អ្នកដំណើរ និងនាវិកជាង ១,៥០០ នាក់បានបាត់បង់ជីវិតនៅក្នុងហេតុការណ៍លិចកប៉ាល់ទីតានិក បន្ទាប់ពីបុកផ្ទាំងទឹកកកកាលពីថ្ងៃទី១៤ ខែមេសា ឆ្នាំ ១៩១២ ៕

ប្រែសម្រួល៖ វារី

ប្រភព៖ vnexpress

ចុចអាន៖ ព្រោះតែកំណប់មហាសាលទាំង៥នេះហើយ ទើបទេសចរ ប្រថុយជីវិតជិះយានចុះទៅតំបន់ ខ្មោចកប៉ាល់ទីតានិក