មេធំ  Telegram ទុកមរតកជាង១៧ ពាន់លានដុល្លារ ដល់កូនចំនួន១០៦នាក់ នៅទូទាំងពិភពលោក

លោក Pavel Durov ដែលគេស្គាល់ថា ជាសហស្ថាបនិកនៃកម្មវិធីផ្ញើសារដ៏ពេញនិយម Telegram បានប្រាប់ទស្សនាវដ្តីនយោបាយបារាំង Le Point កាលពីថ្ងៃទី ១៩ ខែមិថុនាថា កូនៗចំនួន ១០៦នាក់ នឹងទទួលបាននូវមរតកដែលមានតម្លៃជាង ១៧ ពាន់លានដុល្លារ រួមទាំងអ្នកដែលមានផ្ទៃពោះតាមរយៈការបរិច្ចាគមេជីវិតឈ្មោលរបស់លោកកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មហាសេដ្ឋីបច្ចេកវិទ្យារូបនេះក៏បាននិយាយផងដែរថា គាត់បានសរសេរបណ្ដាំមរតកក្នុងការបែងចែកទ្រព្យសម្បត្តិ ដែលមានតម្លៃ ១៧.១ ពាន់លានដុល្លារ ក្នុងចំណោមកូនផ្លូវការរបស់គាត់ទាំង៦ នាក់ និងកូន ១០០ នៅក្នុងប្រទេសចំនួន១២ ដែលកើតតាមរយៈការបរិច្ចាគមេជីវិតដល់គ្លីនិកសម្ភពក្នុងរយៈពេល ១៥ ឆ្នាំកន្លងមកនេះ។

មេធំរបស់កម្មវិធី Telegram វ័យ៤០ ឆ្នាំបាននិយាយថា «ខ្ញុំចង់បញ្ជាក់ឲ្យច្បាស់ថា មិនមានភាពខុសគ្នារវាងកូនបង្កើតនិងកូនដែលកើតចេញពីការបរិច្ចាគមេជីវិតឈ្មោលរបស់ខ្ញុំទេ ពួកគេសុទ្ធតែជាកូនរបស់ខ្ញុំ និងមានសិទ្ធិស្មើគ្នា ខ្ញុំមិនចង់ឲ្យពួកគេបែកបាក់គ្នាបន្ទាប់​ពី​ខ្ញុំ​ស្លាប់​នោះ​ទេ»។

ទោះជាយ៉ាងណាក៏ដោយ លោក Durov មិនមានបំណងអនុញ្ញាតឲ្យកូនៗចូលប្រើប្រាស់ទ្រព្យសម្បត្តិរបស់គាត់បានយ៉ាងងាយស្រួលនោះទេ យ៉ាងហោចណាស់ រហូតដល់ពួកគេមានអាយុ ៣០ ឆ្នាំ (ឆ្នាំ ២០៥៥) ដោយសំអាងថា ចង់ឲ្យពួកគេរស់នៅដូចមនុស្សធម្មតា កសាងខ្លួនអ្នកឡើង រៀនជឿជាក់លើខ្លួនឯង បង្កើតរបស់របរដោយមិនពឹងផ្អែកលើគណនីធនាគារ។

លោក Durov បាននិយាយថា ឥឡូវនេះគាត់បានសរសេរបណ្ដាំមរតកមួយ។ ដោយសារតែការងាររបស់គាត់មានហានិភ័យខ្ពស់ គាត់បាននិយាយថា ការការពារសេរីភាពធ្វើឲ្យអ្នកមានសត្រូវជាច្រើន រួមទាំងនៅក្នុងប្រទេសដែលមានអំណាច។

លោក Pavel Durov កើតនៅឆ្នាំ ១៩៨៤ ក្នុងប្រទេសរុស្ស៊ី ប៉ុន្តែរស់នៅក្នុងទីក្រុងឌូបៃ។ យោងតាមទស្សនាវដ្ដី Forbes លោកជាប់ចំណាត់ថ្នាក់ទី ១៣១ ក្នុងបញ្ជីមហាសេដ្ឋីពិភពលោក ដែលមានទ្រព្យសម្បត្តិសុទ្ធរហូតដល់ ១៧.១ ពាន់លានដុល្លារ។ យ៉ាងណា តាមរយៈកម្មវិធី Telegram បានជួយឲ្យទ្រព្យសម្បត្តិសុទ្ធរបស់លោកកើនឡើងយ៉ាងខ្លាំង ប៉ុន្តែក៏បានធ្វើឲ្យគាត់មានបញ្ហាផ្លូវច្បាប់ផងដែរ។

កម្មវិធី Telegram របស់គាត់ត្រូវបានគេស្គាល់ដោយសារការផ្តោតលើភាពឯកជន និងការផ្ញើសារដែលបានអ៊ិនគ្រីប។ជាមួយនឹងអ្នកប្រើប្រាស់សកម្មប្រចាំខែជាងមួយពាន់លាននាក់ វេទិកានេះមានចន្លោះប្រហោងដែលអនុញ្ញាតឲ្យវាប្រើប្រាស់សម្រាប់ការលាងលុយកខ្វក់ ការជួញដូរគ្រឿងញៀន និងការចែករំលែកខ្លឹមសារនៃការរំលោភបំពានលើកុមារ។នោះហើយជាមូលហេតុដែលដែលលោក Durov ត្រូវបានចាប់ខ្លួនកាលពីឆ្នាំមុន។ បន្ទាប់​ពី​រង​ការ​ចោទ​ប្រកាន់​ថា​មិន​បាន​រក្សា​កម្មវិធី​ឲ្យបាន​សមរម្យ​ដើម្បី​កាត់​បន្ថយ​ឧក្រិដ្ឋកម្ម៕

អត្ថបទ៖ សាង ស្រីល័ក្ខ

ចុចអាន៖ម៉ាឡេស៊ីប្តឹង Telegram ពីបទផ្សព្វផ្សាយមាតិកា​បង្កគ្រោះថ្នាក់