ព័ត៌មានជាតិ

តំបន់សេដ្ឋកិច្ចពិសេសទាំង ៥ នៅខេត្តព្រះសីហនុ មានជាង ២០០ រោងចក្រ ក្រោមទុនវិនិយោគប្រមាណ ២ ពាន់លានដុល្លារ

បានផុស

៩ ខែ មុន

នៅ

ថ្ងៃសៅរ៍ ១៨ តុលា ២០២៥

ដោយ

តំបន់សេដ្ឋកិច្ចពិសេសទាំង ៥ កន្លែង នៅខេត្តព្រះសីហនុមានរោងចក្រកំពុងដំណើរការជាង ២០០ រោងចក្រ ក្រោមទុនវិនិយោគប្រមាណ ២ ពាន់លានដុល្លារ ហើយដែលបានបង្កើតការងាររាប់ម៉ឺនកន្លែងដល់ពលរដ្ឋក្នុងមូលដ្ឋាន។

លោក ឡុង ឌីម៉ង់ អភិបាលរងខេត្តព្រះសីហនុបានប្រាប់កម្ពុជាថ្មីថា ខេត្តព្រះសីហនុមានរោងចក្រសរុបចំនួន ៣៦៤ កំពុងបើកដំណើរការ។ ក្នុងនោះតែនៅក្នុងតំបន់សេដ្ឋកិច្ចពិសេសទាំង ៥ មានរោងចក្រប្រមាណជាង ២៤០ រោងចក្រ ដែលបានស្រូបទាញកម្លាំងពលកម្មបម្រើការងារប្រមាណ ៥ ម៉ឺននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តំបន់សេដ្ឋកិច្ចក្រុងព្រះសីហនុ មានរោងចក្រជាង ២០០ មានកម្មករប្រមាណ ៣៥ ០០០ នាក់ ជាមួយទុនវិនិយោគប្រមាណ ១ ៥៦៥ លានដុល្លារអាមេរិក។ តំបន់សេដ្ឋកិច្ចក្រុងព្រះសីហនុ កន្លងទៅថ្មីៗនេះក៏បានអបអរសម្រាប់វត្តមានរោងចក្រទី ២០០ ដែលបានបើកដំណើរការ ក្រោមវត្តមានសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។

ដោយឡែកតំបន់សេដ្ឋកិច្ចពិសេសកំពង់ផែស្វយ័តក្រុងព្រះសីហនុ មានរោងចក្រចំនួន ២ កំពុងដំណើរការ មានកម្មករនិយោជិតចំនួន ២៨៨ នាក់ ក្រោមទុនវិនិយោគប្រមាណ ៧៩ លានដុល្លារ។

តំបន់សេដ្ឋកិច្ចពិសេសចេជាងមានរោងចក្រសរុប ២៩ មានកម្មករសរុប ១២ ០០០ នាក់ ក្រោមទុនវិនិយោគជាង ៣២២ លានដុល្លារ។

តំបន់សេដ្ឋកិច្ចពិសេសហ្គ្រេនបូកគោ មានរោងចក្រសរុបចំនួន ៣ មានកម្មករសរុប ៣០០ នាក់ ក្រោមទុនវិនិយោគប្រមាណ ១១ លានដុល្លារ។ តំបន់សេដ្ឋកិច្ចពិសេសខេមបូឌាន ស៊ីណូមេធលលីក មេធៀរៀល មានរោងចក្រសរុប ៥ មានកម្មករចំនួន ៧៦ នាក់ មានទុនវិនិយោគ ២៧ លានដុល្លារអាមេរិក។

លោក ឡុង ឌីម៉ង់ បានបញ្ជាក់ថា ក្រៅពីតំបន់រោងចក្រសេដ្ឋកិច្ច ក្នុងខេត្តព្រះសីហនុក៏មានសហគ្រាសធុនតូច និងមធ្យម និងសិប្បកម្មប្រមាណ ១ ១៩០ មូលដ្ឋាន ដែលបង្កើតការងារដល់ពលរដ្ឋបានប្រមាណ ៥ ០០០ នាក់។

លោក ឡុង ឌីម៉ង់បានអះអាងថា ខេត្តដ៏មានសក្តានុពលនេះនៅមានតម្រូវការកម្លាំងពលកម្មបន្ថែមប្រមាណ ៦ ពាន់នាក់ថែមទៀត សម្រាប់បំពេញការងារក្នុងខ្សែសង្វាក់ផលិតកម្មក្នុងរោងចក្រស្របកំណើនរោងចក្រសហគ្រាសជាច្រើនកំពុងវិនិយោគក្នុងខេត្ត៕