រន្ទះបាញ់បុរសម្នាក់ស្លាប់ពេលទៅរកត្រី

បុរសម្នាក់រន្ទះបាញ់ស្លាប់ពេលទៅខ្វារត្រីស្លូញនៅវាលត្រពាំងកក់ ខាងត្បូងភូមិម្កាក់ នៅវេលាម៉ោង៣៖៣០នាទីរសៀលថ្ងៃទី១១ខែមេសា នៅចំណុចវាលត្រពាំង​កក់ខាងត្បូង​ ភូមិ​ម្កាក់​ សង្កាត់ម្កាក់ ក្រុងសិរីសោភ័ណ ខេត្តបន្ទាយមានជ័យ។

បុរសជនរងគ្រោះមានឈ្មោះ ចក់ ចាន់ធី អាយុ ២៥ឆ្នាំ មានទីលំនៅភូមិ២ សង្កាត់កំពុងស្វាយ ក្រុងសិរីសោភ័ណ ខេត្តបន្ទាយមានជ័យ។

នរបាលមូលដ្ឋានបានឱ្យដឹងថាមុនពេលកើតហេតុជនរងគ្រោះបានជិៈម៉ូតូទៅខ្វារត្រីស្លូញតែម្នាក់ឯង នៅចំណុចវាលត្រពាំង​កក់ខាងត្បូង​ត្រូវរន្ទះបាញ់ស្លាប់នៅនិងកន្លែងខ្វារត្រីស្លូញ។

ប្រជាពលរដ្ឋម្នាក់ធ្វើស្រែនៅជិតនោះបាននិយាយថាគាត់លឺរន្ទះបាញ់ប្រាវ ដោយមានការភ័យ គាត់បើកត្រាក់ទ័រត្រឡប់ ពីភ្ជួរស្រែមកផ្ទះវិញ ពេលបើកមកដល់ចំណុចខាងលើបានប្រទះឃើញជនរងគ្រោះ ដេកស្លាប់លើខ្នងទំនប់នៅក្បែរម៉ូតូដោយមានដងកង្ខារសម្រាប់ខ្វារត្រីស្លូញធ្វើអំពីប្ញស្សីប្រវែង២ម៉ែត្រ គងលើដើមទ្រូង ហើយបានរាយការណ៍មកសមត្ថ​កិច្ច។

ពេលសមត្ថកិច្ចចុះទៅដល់ពិនិត្យសពឃើញថាជនរងគ្រោះគឺពិតជាស្លាប់ដោយសាររន្ទះបាញ់ពេលរៀបឡើងជិៈម៉ូតូត្រឡប់មកផ្ទះពិតគ្មានពាក់ព័ន្ធអំពើឃាតកម្មនោះទេ។

សពជនរងគ្រោះក្រោយពិនិត្យរួចបានប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី៕

អត្ថបទ៖ វ៉ាន់ ណា