ត្រឹម១២ថ្ងៃ កម្ពុជាចាក់វ៉ាក់សាំងស៊ីណូវ៉ាក់ជូនដល់ពលរដ្ឋបានជាង៥២ម៉ឺននាក់នៅទូទាំងប្រទេស

ត្រឹមតែរយៈពេល១២ថ្ងៃ កម្ពុជាបានចាក់វ៉ាក់សាំងស៊ីណូវ៉ាក់ដល់ពលរដ្ឋដែលមានអាយុចាប់ពី១៨ឆ្នាំឡើងទៅ បានជាង៥២ម៉ឺននាក់នៅទូទាំងប្រទេស។

យោតាមរបាយការណ៍ក្រសួងសុខាភិបាលបានឲ្យដឹងថា នៅក្នុងរយៈពេល១២ថ្ងៃ នៃយុទ្ធនាការចាក់វ៉ាក់សាំងកូវីដ១៩ ស៊ីណូវ៉ាក់ ក្រុមគ្រូពេទ្យបានចាក់ជូនមន្ត្រីរាជការ និងជនគោលដៅនៅទូទាំងប្រទេសបានចំនួន៥២៩,៣៤៩នាក់ ក្នុងនោះអ្នកអនុញ្ញាតឱ្យចាក់មានចំនួន៥០០,៥៤៩នាក់ និងអ្នកមិនអនុញ្ញាតឱ្យចាក់មានចំនួន៣២,៣២៩នាក់។

គណៈកម្មការចំពោះកិច្ចចាក់វ៉ាក់សាំងកូវីដ១៩ បានចាប់ផ្តើមបើកយុទ្ធនាការចាក់វ៉ាក់សាំង ស៊ីណូវ៉ាក់ នៅក្នុងក្របខណ្ឌទូទាំងប្រទេសនៅថ្ងៃទី០១ ខែមេសា ឆ្នាំ២០២១ ទៅលើជនគោលដៅចំនួន៨ក្រុម ដែលមានមនុស្សប្រមាណ
៧៤៥,០០០នាក់។

ការបើកយុទ្ធនាការចាក់វ៉ាក់សាំងស៊ីណូវ៉ាក់នេះ ធ្វើឡើងបន្ទាប់ពីកម្ពុជាបានទិញវ៉ាក់សាំងចំនួន១លាន៥សែនដូសពី​រដ្ឋាភិបាលចិន ដែលបានដឹកមកដល់កម្ពុជាកាលពីថ្ងៃទី២៦ ខែមីនា កន្លងទៅនេះ។

តាមរបាយការណ៍របស់ក្រសួងសុខាភិបាល បានឱ្យដឹងផងដែរថា ប៉ុន្តែបើបូកការចាក់វ៉ាក់សាំងទាំង៣ប្រភេទ ទី១ស៊ីណូហ្វាម ទី២ អាស្ត្រាហ្សេនីកា និងទី៣ ស៊ីណូវ៉ាក់ ក្រសួងបានចាក់ជួនដល់ពលរដ្ឋបានជាង៨៥ម៉ឺននាក់ហើយ ខណៈកម្ពុជាបានចាប់ផ្តើមចាក់ជាលើកដំបូងនៅថ្ងៃទី១០ខែកម្ភៈឆ្នាំ២០២១កន្លងទៅ៕

អត្ថបទ ៖ សំអឿន