ផ្លូវថ្មើរជើងចតុមុខនៅយប់ថ្ងៃសៅរ៍មានភ្ញៀវជាតិ/អន្តរជាតិ ដើរកម្សាន្តរហូតជាង ១០ម៉ឺននាក់

នាព្រលប់ថ្ងៃសៅរ៍ ត្រូវថ្ងៃទី២២ ខែវិច្ឆិកា ឆ្នាំ២០២៥ ពោលគឺនៅក្នុងសប្តាហ៍ទី៤៣នេះ ផ្លូវថ្មើរជើងចតុមុខ (Chaktomuk Walk Street) មានរៀបចំកម្មវិធី ជជែកលើវិថីទេសចរណ៍ ប្រធានបទទេសចរណ៍-កីឡា ទេសចរណ៍-ភាពយន្ត នៅមុខវត្តឧណ្ណាលោម ធ្វើឱ្យមានបងប្អូនប្រជាពលរដ្ឋមកដើរលេងកម្សាន្តប្រមាណចំនួន ១០៥ ០០០នាក់ ក្នុងនោះភ្ញៀវបរទេស ៣ ០០០នាក់ ។

មន្ត្រីទេសចរណ៌បានបញ្ជាក់ថា៖« តាមការពិនិត្យមើលជាក់ស្តែងវិថីថ្មើរជើងចតុមុខនេះត្រូវបានមហាជនមានការគាំទ្រយ៉ាងពេញទំហឹងពីមួយសប្តាហ៍ទៅមួយសប្តាហ៍។ ជាពិសេសដោយសារតែរដ្ឋបាលរាជធានីភ្នំពេញ កម្លាំងសមត្ថកិច្ចគ្រប់ប្រភេទ និងអាជ្ញាធរមូលដ្ឋានខណ្ឌដូនពេញ រក្សាបាននូវសន្តិសុខ សណ្តាប់សុវត្ថិភាពសង្គម និងបរិស្ថាន អនាម័យស្អាតជាប់ជាប្រចាំព្រមទាំងបញ្ចៀសបាននូវការកកស្ទះចរាចរណ៍»។

ទន្ទឹមនឹងនោះ រដ្ឋបាលរាជធានីភ្នំពេញដែលដឹកនាំដោយលោក ឃួង ស្រេង អភិបាលរាជធានីភ្នំពេញបានដាក់បញ្ចូលនូវទីតាំងសប្បាយៗជាច្រើនកន្លែង និងរៀបចំឱ្យមានការលក់ដូរចំណីអាហារដ៏សម្បូរបែបសម្រាប់បងប្អូនដែលបានអញ្ជើញមកដើរលេងកម្សាន្ត៕
ដោយ៖ ស្រីរ័ត្ន