ប្តីស្ត្រីវិជ្ជមានកូវីដ-១៩ រត់គេចខ្លួនមកភ្នំពេញ អាជ្ញាធរប្រកាសកុំរត់គេចទៀត

អភិបាលខណ្ឌពោធិ៍សែនជ័យ ប្រកាសបន្ទាន់នៅរសៀលថ្ងៃទី១៦ ខែមេសានេះ បើប្រជាពលរដ្ឋណាស្គាល់ ឬបានឃើញឈ្មោះ ចាន់ ណា សូមទាក់ទងទៅអាជ្ញាធរនៅជិតបំផុត។

លោក ហែម ដារិទ្ធិ អភិបាលខណ្ឌពោធិ៍សែនជ័យ បានប្រកាសជាបន្ទាន់ថា បើបងប្អូនណាស្គាល់ ឬឃើញឈ្មោះ ចាន់​ ណា នៅភូមិប្រជាបាទ ឃុំទំពរមាស ស្រុងសំរោងទង ខេត្តកំពង់ស្ពឺ ធ្វើការនៅ Grand Phnom Penh (អតីតជាបុគ្គលិក បុរីភ្នំពេញថ្មី) ដូចមានក្នុងរូបថតនេះ សូមឱ្យគាត់ធ្វើចត្តាឡីស័ក្ត១៤ថ្ងៃ និងយកសំណាកជាបន្ទាន់ ឬសូម លោក ចាន់​ ណា ផ្ទាល់ កុំរត់គេចអី ព្រោះនាំគ្រោះថ្នាក់ដល់ខ្លួន ឬនាំជម្ងឺទៅអ្នកផ្សេងដែលគ្នាមិនដឹង ឬញាតិមិត្តខំស្រឡាញ់លោក ដោយលោកជាអ្នកនាំជម្ងឺទៅអោយពួកគាត់វិញ។

លោក ហែម ដារិទ្ធិ បានបង្ហាញមូលហេតុថា បុរសគេចខ្លួនខាងលើនេះបានទៅលេងស្រុកដើម្បីជួបប្រពន្ធ ហើយបច្ចុប្បន្ន ប្រពន្ធគាត់បានកើតជម្ងឺកូវីដ-១៩ ដែលកំពុងសម្រាកព្យាបាលនៅខេត្ត។ លុះពេលសមត្ថកិច្ចខេត្តទៅយកសំណាកពីគាត់នោះ គាត់ក៏បានរត់មកដល់ភ្នំពេញ ហើយទៅពួនសំងំនៅក្នុងរោងជាងខាងក្រោយវត្តអង្គតាមិញជាមួយកម្មករគ្នាគាត់រយៈពេល២ទៅ៣ថ្ងៃ ដែលកម្មករផ្សេងៗមិនដឹងថាគាត់កើតមានជម្ងឺ កូវីដ-១៩ ឬអត់មាននោះទេ (ទាល់តែពិនិត្យសិន)។

លោក ហែម ដារិទ្ធិ បញ្ជាក់ទៀតថា នៅព្រឹកនេះមេការបានដឹងដំណឹងពីខេត្តថា បុរសឈ្មោះ ចាន់ ណា រូបនេះបានរត់គេចពីខេត្តមក តែពេលគាត់ទៅរកសួរនាំស្រាប់តែបាត់ខ្លួន ឈ្មោះ ចាន់ ណា ទៀត៕

អត្ថបទ៖ ច័ន្ទ វីរៈ