ព័ត៌មានជាតិ

សួនឌីជីថលលើកដំបូងជិតចេញរូបរាងនៅកម្ពុជា គ្រោងអភិវឌ្ឍនៅលើផ្ទៃដីទំហំ ១០០ ហិកតា

បានផុស

៧ ខែ មុន

នៅ

ថ្ងៃសុក្រ ៥ ធ្នូ ២០២៥

ដោយ

កម្ពុជាកំពុងរៀបចំបង្កើត និងអភិវឌ្ឍន៍សួនឌីជីថលជាលើកដំបូង ក្នុងគោលដៅគាំទ្រដល់ធុរកិច្ចថ្មីឌីជីថល និងប្រែក្លាយប្រទេសកម្ពុជាទៅជាមជ្ឈមណ្ឌលឌីជីថល សំដៅរួមចំណែកដល់ការអភិវឌ្ឍសេដ្ឋកិច្ច និងសង្គមឌីជីថលនៅកម្ពុជា។

ថ្លែងនៅក្នុងពិធីបើកវេទិការដ្ឋាភិបាលឌីជីថលឆ្នាំ២០២៥ និងពិព័រណ៍បច្ចេកវិទ្យាឌីជីថលដែលរៀបចំឡើងនៅព្រឹកមិញនេះ លោក ជា វ៉ាន់ដេត រដ្ឋមន្រ្តីក្រសួងប្រៃសណីយ និងទូរគមនាគមន៍បានលើកពីចក្ខុវិស័យរបស់ក្រសួងគឺប្រែក្លាយកម្ពុជាជាបណ្តើរៗឱ្យទៅជាប្រទេសដែលពុំនិយមប្រើប្រាស់ក្រដាសបន្តទៀត ដោយឈរលើការប្រើប្រាស់បច្ចេកវិទ្យាឌីជីថល ដែលប្រជាពលរដ្ឋមានទំនុកចិត្ត ព្រមទាំងអាចលើកតម្កើងតួនាទីរបស់កម្ពុជាលើឆាកអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្រ្តីបញ្ជាក់ថា តាមរយៈគម្រោងអភិវឌ្ឍសួនឌីជីថល ( Digital Hub) នឹងជួយជំរុញដល់ការធ្វើបរិវត្តកម្ម សហគ្រិនភាព នវានុវត្តន៍ ជាពិសេសការបង្កើតជាប្រព័ន្ធអេកូឡូស៊ីមួយ ដែលផ្សារភ្ជាប់ការអប់រំបណ្តុះបណ្តាលជំនាញទៅនឹងឧស្សាហកម្មក្នុងវិស័យឌីជីថល។

ប្រភពពីមន្រ្តីក្រសួងប្រៃសណីយនិងទូរគមនាកមន៍បានប្រាប់កម្ពុជាថ្មី សួនឌីជីថលដែលប្រកាសបង្កើតឡើង ត្រូវបានអភិវឌ្ឍនៅលើផ្ទៃដីទំហំ ១០០ ហិកតា ស្ថិតនៅតាមបណ្តោយផ្លូវជាតិលេខ ៦។

សួនបច្ចេកវិទ្យានេះ នឹងក្លាយជាមជ្ឈមណ្ឌលទិន្នន័យជាតិទី ១ ជាកន្លែងផ្តល់សេវា Data Hosting មួយប្រកបដោយសុវត្ថិភាព ជាមជ្ឍមណ្ឌលបណ្តុះបណ្តាល ជាកន្លែងប្រមូលផ្តុំដោយក្រុមហ៊ុនបច្ចេកវិទ្យាធំៗនៅក្នុងតំបន់ និងលើពិភពលោកមកដាក់ប្រតិបត្តិការនៅកម្ពុជា។

រាជរដ្ឋាភិបាលបានកំណត់ «បច្ចេកវិទ្យា» ជាអាទិភាពគន្លឹះថ្មីមួយ និង «ការអភិវឌ្ឍសេដ្ឋកិច្ច និងសង្គមឌីជីថល» ជារបៀបវារៈគោលនយោបាយថ្មីមួយទៀតក្នុង «យុទ្ធសាស្រ្តបញ្ចកោណ ដំណាក់កាលទី១»។

បច្ចេកវិទ្យាឌីជីថល ជាពិសេសបច្ចេកវិទ្យាបញ្ញាសិប្បនិម្មិត (AI) បានវិវត្តយ៉ាងលឿន និងបានជ្រាបចូលក្នុងគ្រប់មជ្ឈដ្ឋាននិងគ្រប់ស្រទាប់នៃសង្គមសេដ្ឋកិច្ច ស្របជាមួយនឹងការប្រែប្រួលជាបន្តបន្ទាប់នៃរបៀបរបបរស់នៅ របៀបរបបធ្វើការ ឬធ្វើពាណិជ្ជកម្ម និងរបៀបរបបប្រាស្រ័យទាក់ទងគ្នាជាប្រចាំថ្ងៃ។

ចូលរួមជាអធិបតីភាពក្នុងកម្មវិធីបើកនៃ «វេទិការដ្ឋាភិបាលឌីជីថលឆ្នាំ២០២៥ និងព្រឹត្តិការណ៍ជាតិ-អន្តរជាតិពាក់ព័ន្ធ» ក្រោមប្រធានបទ «ការពន្លឿនអនាគតឌីជីថល៖ អភិបាលកិច្ច កំណើន និងភាពជាដៃគូសកល» លោក វង្សី វិស្សុត ឧបនាយករដ្ឋមន្រ្តីប្រចាំការ និងរដ្ឋមន្រ្តីទទួលបន្ទុកទីស្ដីការគណៈរដ្ឋមន្ត្រីបានគូសបញ្ជាក់ថា បច្ចេកវិទ្យាបាននាំមកនូវកាលានុវត្តភាពផង និងហានិភ័យផង ហើយការចាប់យកបច្ចេកវិទ្យាឌីជីថល បានក្លាយជាកត្តាកំណត់ឧត្តមភាពប្រកួតប្រជែង និងជោគវាសនារបស់ប្រទេសជាតិ ស្ថាប័ន សហគ្រាស ក៏ដូចជាបុគ្គលនីមួយៗ។

លោកថា សម្រាប់ប្រទេសកម្ពុជានិងប្រទេសកំពុងអភិវឌ្ឍ បច្ចេកវិទ្យាអាចត្រូវបានចាត់ទុកជាយានមួយសម្រាប់ពន្លឿនការធ្វើទំនើបកម្ម ការអភិវឌ្ឍ និងបង្កើនតម្លៃបន្ថែមក្នុងសង្គមសេដ្ឋកិច្ចរបស់ខ្លួន ជាពិសេសលើកកម្ពស់ជីវភាពរបស់ប្រជាពលរដ្ឋ។ ប៉ុន្តែបើសិនជាការចាប់យកបច្ចេកវិទ្យាប្រព្រឹត្តទៅមិនទាន់ពេល ខុសទិសដៅ មិនទាន់ការប្រកួតប្រជែង ឬមិនទាន់តម្រូវការនៃស្ថានភាពជាក់ស្តែង គម្លាតនៃការអភិវឌ្ឍ (development gap) នឹងកាន់តែរីកធំឡើងទាំងក្នុងកម្រិតរវាងប្រទេសនិងប្រទេស និងរវាងប្រជាជននិងប្រជាជន។

ក្នុងឱកាសនោះ លោកជំរុញដល់គ្រប់ក្រសួង-ស្ថាប័នពាក់ព័ន្ធ សហការលើកកម្ពស់សមត្ថភាពចាប់យកបច្ចេកវិទ្យាឌីជីថល ជាពិសេសបច្ចេកវិទ្យាបញ្ញាសិប្បនិម្មិត សំដៅបង្កើនប្រសិទ្ធភាពក្នុងការផ្តល់និងទទួលសេវាសាធារណៈ និងទាញយកប្រយោជន៍ឱ្យបានជាអតិបរមាពីចរន្តសេដ្ឋកិច្ចឌីជីថលសកល៕