ព័ត៌មានជាតិ

ស្តង់ជាច្រើនទីតាំងរៀបចំក្នុងខេត្តរតនគិរី ដើម្បីទទួលជំនួយគាំទ្រដល់កងទ័ព និងពលរដ្ឋភៀសសឹកពីសមរភូមិសង្រ្គាម

បានផុស

៧ ខែ មុន

នៅ

ថ្ងៃសុក្រ ១២ ធ្នូ ២០២៥

ដោយ

ស្តង់ជាច្រើនទីតាំងបានរៀបចំនៅក្នុងខេត្តរតនគិរី ដើម្បីទទួលជំនួយជាសម្ភារ គ្រឿងឧបភោគ និងថវិកា ដើម្បីផ្តល់ដល់ជនភៀសសឹក និងកងទ័ពក្នុងសង្រ្គាមឈ្លានពានពីប្រទេសថៃ។

លោក ចន្ថានី តំណាងឲ្យយុវជនស្រឡាញ់សន្តិភាពខេត្តរតនគិរីបានប្រាប់កម្ពុជាថ្មីថា ទីតាំងទទួលជំនួយបានរៀបចំឡើងនៅក្នុងក្រុងបានលុង និងតាមបណ្តាស្រុកទាំង ៩ និងនៅតាមឃុំមួយចំនួនទៀត។ ការកៀគរជំនួយនេះក្រៅពីពលរដ្ឋក្នុងខេត្ត ភ្ញៀវទេសចរដែលធ្វើដំណើរមកកម្សាន្តក៏អាចចូលរួមផ្តល់ការគាំទ្រសម្ភារឬថវិកាតាមទឹកចិត្ត ដើម្បីប្រមូលដឹកទៅចែកដល់ជនភៀសសឹក ក៏ដូចជាផ្តល់ដល់វីរកងទ័ពដែលកំពុងក្រាញននៀលតស៊ូពីការឈ្លានពានពីកងទ័ពថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រះភិក្ខុនាម សេង មេងហួរ គង់នៅវត្តភ្នំបេង នៅភូមិ ២ សង្កាត់កាចាញ ក្រុងបានលុងខេត្តរតនគិរី បានប្រាប់កម្ពុជាថ្មីថា ក្នុងគ្រាប្រទេសរងការឈ្លានពាននេះ ព្រះអង្គបានបរិច្ចាកសម្ភារៈខ្លះៗមានទឹកសុទ្ធ មី ភេសជ្ជៈ ទឹកត្រី ទឹកស៊ីអ៉ីវ ក្នុងស្មារតីរួមគ្នា ស្រឡាញ់គ្នា ដើម្បីជាតិមាតុភូមិ។

លោកស្រី ហ៊ា សុឈី ជាគ្រូបង្រៀននៅស្រុកអូរយ៉ាដាវបានប្រាប់ថា អ្នកគ្រូក៏បានបរិច្ចាគគ្រឿងឧបភោគបរិភោគមួយចំនួនក្នុងគោលបំណងចែកដល់កងទ័ពជួរមុខ និងប្រជាពលរដ្ឋភៀសសឹក ដែលកំពុងភៀសខ្លួនចេញពីសមរភូមិប្រយុទ្ធ។

មន្ត្រីរាជការនៅតាមមន្ទីរ ស្ថាប័ន ផ្សេងៗទៀតក្នុងខេត្តរតនគិរី បានកំពុងគៀងគរគ្នាជាសម្ភារៈនិងថវិកាជារៀងរាល់ថ្ងៃ ដើម្បីដឹកជញ្ជូនទៅកងទ័ពជួរមុខនិងជនភៀសសឹក ដើម្បីលើកទឹកចិត្តដល់វីរកងទ័ពកម្ពុជា ច្បាំងតទល់ជាមួយកងទ័ពថៃឈ្លានពានមានជ័យជំនះ បានសុខសន្តិភាពឡើងវិញ៕

Related Topics: