ស្មារតីខ្មែរតែមួយ៖ ខ្មែរឥស្លាមក៏ត្រូវបានយកចិត្តទុកដាក់ ក្នុងពេលប្រទេសមានសង្គ្រាម

ក្នុងកាលៈទេសៈជាតិកំពុងជួបការលំបាក ដោយការឈ្លានពានពីប្រទេសជិតខាង កម្លាំងមហាសាមគ្គីជាតិខ្មែរ កំពុងពុះកញ្ជ្រោលដ៏រឹងមាំ ក្នុងស្មារតីសមរភូមិក្រោយជួយសមរភូមិមុខ តាមរយៈការគាំទ្រដល់កងកម្លាំងជួរមុខ ជាមួយនឹងការផ្ដល់ជំនួយមនុស្សធម៌ដល់ពលរដ្ឋដែលត្រូវបានភៀសសឹក។ ក្នុងស្មារតីខ្មែរតែមួយនេះ កងទ័ពនិងជនភៀសសឹក ដែលជាខ្មែរឥស្លាមក៏ត្រូវបានយកចិត្តទុកដាក់ដូចគ្នា។

លោកស្រី ម៉ាណ ណាវី សមាជិកព្រឹទ្ធសភា ដែលជាជនជាតិខ្មែរឥស្លាម កាលពីថ្ងៃទី១៦ ខែធ្នូ ឆ្នាំ២០២៥ បាននាំយកអំណោយដែលបានពីការបរិច្ចាគរបស់សប្បុរសជនផ្ដល់ឱ្យជនភៀសសឹកចំនួន១ពាន់គ្រួសារ និងបានផ្តល់អាហារក្រៀមសម្រាប់កងទ័ពជួរមុខចំនួន ៥៩០កញ្ចប់។

ក្នុងពេលជួបជាមួយជនភៀសសឹក លោកស្រី ម៉ាណ ណាវី បានលើកឡើងអំពីការយកចិត្តទុកដាក់របស់សម្ដេចតេជោ ហ៊ុន សែន ប្រធានព្រឹទ្ធសភា ចំពោះពលរដ្ឋ ដែលកំពុងរងគ្រោះដោយអំពើឈ្លានពានដ៏ព្រៃផ្សៃរបស់ប្រទេសថៃមកលើប្រទេសកម្ពុជា ហើយលោកស្រីក៏បាននាំមកនូវការផ្តាំផ្ញើសាកសួរសុខទុក្ខពីសំណាក់គណៈដឹកនាំរបស់សាសនិកឥស្លាមផងដែរ។

លោកស្រី បាននិយាយទៅពលរដ្ឋភៀសសឹកទាំងអស់ដែលកំពុងស្នាក់នៅក្នុងជំរុំ មិនថាសាសនាណានោះទេ គឺត្រូវចេះសាមគ្គី និងយកអាសារគ្នាទៅវិញទៅមក ហើយម្យ៉ាងទៀតនោះ លោកស្រីណែនាំឱ្យជនភៀសសឹកចូលរួមថែរក្សាសុខភាព និងថែរក្សាអនាម័យឱ្យបានល្អក្នុការស់នៅជាប្រចាំ។

សមាជិកព្រឹទ្ធសភារូបនេះ ក៏បន្តអំពាវនាវដល់ពលរដ្ឋទាំងអស់ជឿជាក់លើរាជរដ្ឋាភិបាល និងវីរកងទព័កម្ពុជា ដែលកំពុងឈរជើងដ៏អង់អាចក្លាហានក្នុងការប្រយុទ្ធការពារបូរណភាពទឹកដីជាមួយសត្រូវឈ្លានពាន៕