សត្វដំរីព្រៃចូលមកទម្លុះបារ៉ាសនៅច្រកតំបន់ ៤០០ កម្ពុជា-ថៃ បង្ក​ការភ្ញាក់ផ្អើលទាំងយប់

សត្វដំរីព្រៃមួយហ្វូង ដែលមិនទាន់ដឹងច្បាស់ពីចំនួនក្បាលពិតប្រាកដ បានដើរចេញពីព្រៃនៅក្នុងទឹកដីប្រទេសថៃ ហើយបានចូលមកទម្លុះបារ៉ាសត្រួតពិនិត្យ ដែលយោធាថៃបានដាក់បិទនៅច្រកតំបន់ ៤០០ មិនឲ្យពលរដ្ឋធ្វើដំណើរឆ្លងកាត់ បង្កឲ្យមានការភ្ញាក់ផ្អើលទាំងកណ្ដាលយប់។

តាមការបញ្ជាក់របស់លោក ម៉ី ណាន់ នាយប៉ុស្តិ៍នគរបាលច្រកតំបន់ ៤០០ ស្ថិតក្នុងស្រុកសំឡូត ខេត្តបាត់ដំបង បានឲ្យដឹងថា នៅវេលាម៉ោង ១២ និង ២០ នាទី រំលងអាធ្រាត ឈានចូលថ្ងៃទី ៣ ខែមករា ឆ្នាំ២០២៦ នៅប៉ុស្តិ៍ត្រួតពិនិត្យចំណុចខ្ពស់ខាងលើ តាមបន្ទាត់ព្រំដែនកម្ពុជា–ថៃ ច្រកទ្វារតំបន់ ៤០០ មានសត្វដំរីព្រៃមួយហ្វូង មិនច្បាស់ចំនួន បានចូលមកកាច់បារ៉ាសត្រួតពិនិត្យ និងបន្លាលួសរបស់ភាគីថៃ ក្នុងបំណងឆ្លងចូលមកក្នុងទឹកដីកម្ពុជា។

យ៉ាងណាមិញ សត្វដំរីទាំងនោះត្រូវបានកម្លាំងប្រចាំការរបស់ភាគីទាំងសងខាង រួមសហការដេញឲ្យវិលត្រឡប់ទៅក្នុងទឹកដីថៃវិញ មុននឹងអាចឆ្លងចូលមកកម្ពុជា។

ហេតុការណ៍នេះ បានធ្វើឲ្យភាគីទាំងសងខាងមានការភ្ញាក់ផ្អើលខ្លាំង ដោយសារសំឡេងស្រែក និងសំឡេងវាយបំបាក់បារ៉ាសដែក ដែលសន្និដ្ឋានថា សត្វដំរីព្រៃអាចមានបំណងចង់ឆ្លងចូលមករស់នៅក្នុងទឹកដីកម្ពុជា ទើបបានជាវាយបំបាក់បារ៉ាសរបស់ភាគីថៃយ៉ាងខ្លាំងបែបនេះ។ យ៉ាងណាក្តី ហេតុការណ៍នេះមិនបានបង្កឲ្យមានការប៉ះពាល់ដល់អាយុជីវិតមនុស្សឡើយ៕

អត្ថបទ ៖ សោ និយមរ័ត្ន