សម្តេចតេជោ ប្តូរទម្រង់ការអញ្ជើញទៅចូលរួមកិច្ចប្រជុំកំពូលអាស៊ានក្រៅប្រទេស

សម្តេចតេជោ ហ៊ុន សែន នាយករដ្ឋមន្ត្រីកម្ពុជា នឹងអញ្ជើញទៅចូលរួមកិច្ចប្រជុំកំពូលអាស៊ាន នៅប្រទេសឥណ្ឌូនេស៊ីនៅ​ថ្ងៃ​ទី​២៤ ខែមេសា ចុងសប្តាហ៍នេះ ដែលធ្វើឡើងគ្មានការជូនដំណើរ​ពីថ្នាក់ដឹកនាំ​រាជរដ្ឋាភិ​បាល​កម្ពុជានោះទេ។

សម្តេចតេជោ ហ៊ុន សែន មានប្រសាសន៍តាមរយៈសារអេឡិចត្រូនិកតេឡេក្រាម នៅព្រឹកថ្ងៃអង្គារ៍ ទី ២០ ខែមេសា​នេះថា ហេតុផលដែលសម្តេចប្តូរទម្រង់នៃការចេញដំណើររបស់សម្តេច និងការ​ចូលមកវិញ គឺ ដោយសារកម្ពុជាកំពុងតែបិទទីក្រុង និងបញ្ហាកូវីដ១៩។

សម្តេចតេជោបានថ្លែងថា “ខ្ញុំធ្វើដំណើរទៅពេលត្រឡប់មកវិញ ក៏ត្រូវធ្វើចត្តាឡីស័ក ចឹងប្រសិនបើសម្តេច ឯកឧត្តមលោកជំទាវ ទៅទទួលខ្ញុំ ក៏អាចនឹងត្រូវធ្វើចត្តាឡីស័កដូចគ្នា ដូច្នេះធ្វើឱ្យកម្លាំងដឹកនាំនៅតាមស្ថាប័នរាជរដ្ឋាភិបាល នឹងជួបការលំបាកកាន់តែខ្លាំង”។

សម្តេចតេជោប្រាប់ថា ពេលសម្តេចត្រឡប់មកដល់ប្រទេសវិញ ពុំមានការធ្វើសន្និសីទសារព័ត៌មាននោះទេ ប៉ុន្តែជំនួសដោយការយកសំណាក ដើម្បីធ្វើតេស្តរកមេរោគកូវីដ១៩ ដូច្នេះហើយបានជាសម្តេចប្តូរទម្រង់នៃការចាកចេញ ដោយគ្មានការជូនដំណើរ ហើយចូលមកវិញគ្មានអ្នកទទួល។

សម្តេចតេជោ បញ្ជាក់ថា សម្រាប់ពិធីការ និងអ្នកសារព័ត៌មានក៏ត្រូវនៅឱ្យឆ្ងាយៗ ដើម្បីចៀសវាងការធ្វើចត្តាឡីស័ក៕

អត្ថបទ៖ ឡេង ដេត