ជនជាតិវៀតណាម៥៩នាក់ ត្រូវបានបណ្ដេញចេញពីកម្ពុជា

នគរបាលអន្តោប្រវេសន៍ បន្តបណ្ដេញនូវជនជាតិវៀតណាមចំនួន៥៩នាក់ ចេញពីប្រទេសកម្ពុជា  ក្រោយត្រូវបានរកឃើញថា ពួកគេបានប្រព្រឹត្តល្មើសនឹងច្បាប់អន្តោប្រវេសន៍របស់កម្ពុជា។

ការអនុវត្តនីតិវិធីបណ្ដេញចេញនេះ ត្រូវបានធ្វើឡើងតាមច្រកទ្វារព្រំដែនអន្តរជាតិម៉ឺនជ័យ ខេត្តព្រៃវែង កាលពីថ្ងៃទី២៩ ខែមករា ឆ្នាំ២០២៦ តាមការណែនាំរបស់ឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ និងឧត្តមសេនីយ៍ឯក សុខ វាសនា អគ្គនាយកអន្តោប្រវេសន៍។

ក្នុងចំណោមជនជាតិវៀតណាមខាងលើ មានស្រី១៦នាក់ ដោយនាយកដ្ឋានស៊ើបអង្កេត និងអនុវត្តនីតិវិធី បានទទួលពីស្នងការដ្ឋាននគរបាលរាជធានីភ្នំពេញ ខេត្តស្វាយរៀង និងខេត្តកណ្តាល  ដោយសមត្ថកិច្ច បានបញ្ជាក់ថា ពូកគេមានពាក់ព័ន្ធនឹងករណីលួចស្នាក់នៅ ធ្វើការខុសច្បាប់ និងលួចឆ្លងដែនខុសច្បាប់ចូលកម្ពុជា៕