ឈ្វេងយល់ពីអត្ថប្រយោជន៍នៃ “កម្មវិធីជាតិជំនួយសង្គមក្នុងកញ្ចប់គ្រួសារ”

បើតាមក្រុមប្រឹក្សាជាតិគាំពារសង្គម កម្មវិធីជាតិជំនួយសង្គមក្នុងកញ្ចប់គ្រួសារ មិនត្រឹមតែជាជំនួយសាច់ប្រាក់ប៉ុណ្ណោះទេ ប៉ុន្តែជាសក្ខីភាពនៃការប្តេជ្ញាចិត្តរបស់រាជរដ្ឋាភិបាល ក្នុងការលើកកម្ពស់សុខុមាលភាព និងកាត់បន្ថយភាពក្រីក្រជូនប្រជាពលរដ្ឋ ដោយមិនបោះបង់ពលរដ្ឋណាម្នាក់។ តស់មកឈ្វេងយល់ពីអត្ថប្រយោជន៍នៃ “កម្មវិធីជាតិជំនួយសង្គមក្នុងកញ្ចប់គ្រួសារ”

១.សារបាន

កម្មវិធីជាតិជំនួយសង្គមក្នុងកញ្ចប់គ្រួសារ ត្រូវបានដាក់ឱ្យអនុវត្តចាប់ពីខែមេសា ឆ្នាំ២០២៤ ក្នុងគោលបំណង លើកកម្ពស់សុខុមាលភាពមាតា និងទារក ព្រមទាំងដោះស្រាយកង្វះអាហារូបត្ថម្ភចាប់តាំងពីនៅក្នុងផ្ទៃ ដល់កុមារអាយុ ២ឆ្នាំ ដើម្បីជំរុញការលូតលាស់ទាំងកាយសម្បទា និងបញ្ញាស្មារតី។ ជាពិសេសជួយសម្រាលការលំបាកផ្នែកជីវភាពរស់នៅរបស់គ្រួសារក្រីក្រ និងសមាជិកគ្រួសារជាជនមានពិការភាព ជនចាស់ជរា និងអ្នកផ្ទុកមេរោគអេដស៍ និងជំងឺអេដស៍។

២.ក្រុមគោលដៅ

គ្រួសារក្រីក្រដែលមានបណ្ណសមធម៌ និងសមាជិកគ្រួសារដែលជាជនងាយរងគ្រោះ ដូចជា ស្ត្រីមានផ្ទៃពោះ និង កុមារអាយុក្រោម ២ឆ្នាំ, សិស្សានុសិស្សក្នុងគ្រឹះស្ថានសិក្សាចំណេះទូទៅសាធារណៈ, ជនមានពិការភាព, ជនចាស់ជរា ចាប់ពីអាយុ ៦០ឆ្នាំឡើង, អ្នកផ្ទុកមេរោគអេដស៍ និងអ្នកជំងឺអេដស៍។

៣. លក្ខខណ្ឌនៃការចុះឈ្មោះ

គ្រួសារដែលមានបណ្ណសមធម៌មានសុពលភាព និងសមាជិកគ្រួសារដែលជាជនងាយរងគ្រោះ ត្រូវទៅចុះឈ្មោះ ចូលកម្មវិធីនៅសាលាឃុំ សង្កាត់ ដោយតម្រូវឱ្យ៖

• មេគ្រួសារ ឬសមាជិកគ្រួសារដែលជាតំណាង ត្រូវយកបណ្ណសមធម៌ដែលមានសុពលភាព និងអត្តសញ្ញាណ- ប័ណ្ណសញ្ជាតិខ្មែរ
• ស្រ្តីមានផ្ទៃពោះ និងកុមារអាយុក្រោម ២ឆ្នាំ ត្រូវយកបណ្ណសមធម៌ និងសៀវភៅសុខភាពមាតា ឬបណ្ណសុខភាពកុមារ
• សិស្សានុសិស្សត្រូវយកបណ្ណសមធម៌ និងលិខិតបញ្ជាក់ការចុះឈ្មោះចូលរៀន ដែលចេញដោយសាលារៀន៕