ព័ត៌មានជាតិ

ក្រោយជោគជ័យផលិតជីសរីរាង្គ អ្នកឧកញ៉ា សួរ វីរៈ ពង្រីករោងចក្រផលិតជីគីមីបន្ថែមទៀត

បានផុស

៤ ខែ មុន

នៅ

ថ្ងៃអង្គារ ១០ មីនា ២០២៦

ដោយ

ក្រុមហ៊ុន វិរៈ ប៊ុនថាំ កំពុងពង្រីកផលិតភាពរោងចក្រផលិតជីគីមីបន្ថែម ក្រោយជោគជ័យការផលិតជីសរីរាង្គ និងជីទឹកផ្គត់ផ្គង់ទីផ្សារក្នុងស្រុក។

អ្នកឧកញ៉ា សួរ វីរៈ អគ្គនាយកក្រុមហ៊ុនវិរៈ ប៊ុនថាំ បានឲ្យដឹងថា រោងចក្រផលិតជីរបស់ក្រុមហ៊ុនត្រូវបានអភិវឌ្ឍឡើងនៅលើផ្ទៃដីទំហំ ១៥ ហិកតា ដោយមានរោងចក្រសរុបចំនួន ៤។ ក្នុងចំណោមនោះ រោងចក្រចំនួន ៣ សម្រាប់ផលិតជីគីមី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះរោងចក្រផលិតជីគីមី រំពឹងថានឹងរួចរាល់ក្នុងរយៈពេលមួយខែទៀត ដើម្បីចាប់ផ្តើមផលិត និងចែកចាយនៅទូទាំងប្រទេស។

អ្នកឧកញ៉ា សួរ វីរៈ បញ្ជាក់ថា ដោយសារកម្ពុជាពុំទាន់មានប្រភពធាតុដើមសម្រាប់ផលិតជីគីមី ដូច្នេះវត្ថុធាតុដើមត្រូវបាននាំចូលពីក្រៅប្រទេសទាំងអស់ រួចមកកែច្នៃតាមរូបមន្តរបស់ក្រុមហ៊ុន។

ពាក់ព័ន្ធដំណើរការខ្សែសង្វាក់ផលិតកម្មផលិតជីរបស់ក្រុមហ៊ុន អ្នកឧកញ៉ា សួរ វីរៈ បានអះអាងថា ក្រុមហ៊ុនមានការធានាយ៉ាងច្បាស់លាស់លើគុណភាព ហើយប្រសិនបើកសិករប្រើប្រាស់មិនមានប្រសិទ្ធភាព ក្រុមហ៊ុននឹងធានាលើទិន្នផលជូនពួកគាត់។

«តាមរយៈការសាកល្បងលើដំណាំស្រូវ និងបន្លែផ្លែឈើ លទ្ធផលទទួលបានល្អចន្លោះពី ៩៩% ទៅ ១០០%។ កសិករដែលធ្លាប់ទទួលបានទិន្នផលស្រូវ ៥ តោន បានកើនឡើងដល់លើសពី ៦ តោន បន្ទាប់ពីប្រើប្រាស់ជីតាមបច្ចេកទេសរបស់ក្រុមហ៊ុន»។

អ្នកឧកញ៉ា សួរ វីរៈ ដែលសាងជំនួយតាមរយៈក្រុមហ៊ុនដឹកជញ្ជូនអ្នកដំណើរនេះ បានលើកពីយុទ្ធសាស្ត្រកាត់បន្ថយការនាំចូល ប្រសិនបើប្រជាពលរដ្ឋយល់ដឹង និងគាំទ្រផលិតផលក្នុងស្រុក កម្ពុជាអាចកាត់បន្ថយការនាំចូលជីសរីរាង្គពីក្រៅប្រទេសបានរហូតដល់ ១០០% ខណៈគោលនយោបាយរបស់រដ្ឋាភិបាលក្នុងការទិញវត្ថុធាតុដើមក្នុងតម្លៃទាបតាមកិច្ចសន្យាពីក្រៅប្រទេស ក៏នឹងជួយឱ្យក្រុមហ៊ុនអាចផលិត និងលក់ជីជូនកសិករក្នុងតម្លៃទាប៕