ព័ត៌មានជាតិ

រោងចក្រផលិតចំណីអាហារឧកញ៉ា សួរ វីរៈ ស្ថិតតាមផ្លូវជាតិលេខ ៥១ ខណៈផលិតផលនឹងមានលក់លើទីផ្សាររង្វង់ ៦ ខែទៀត

បានផុស

៥ ខែ មុន

នៅ

ថ្ងៃព្រហស្បតិ៍ ២៩ មករា ២០២៦

ដោយ

អ្នកឧកញ៉ា សួរ វីរៈ អគ្គនាយកក្រុមហ៊ុន វីរៈប៊ុនថាំ អេចប្រេស បានបញ្ជាក់ពីទីតាំងរោងចក្រផលិតចំណីអាហាររបស់ក្រុមហ៊ុនកំពុងសាងសង់ស្ថិតនៅតាមបណ្តោយផ្លូវលេខ ៥១ ដែលមានចម្ងាយប្រហែល ២៥ គីឡូម៉ែត្រពីរាជធានីភ្នំពេញ។

ផ្តល់បទសម្ភាសន៍ដល់អ្នកសារព័ត៌មានក្នុងឱកាសចូលរួមសន្និបាតបូកសរុបលទ្ធផលការងាររបស់សភាពាណិជ្ជកម្មកម្ពុជារៀបចំឡើងកាលពីម្សិលមិញនេះ អ្នកជំនួញរូបនេះបានគូសបញ្ជាក់ថា ការសាងសង់រោងចក្រជំហានដំបូងគ្រោងចំណាយទុនវិនិយោគប្រមាណជាង ១៥ លានដុល្លារ និងបង្កើនទំហំទុនដល់ ៣០ លានដុល្លារលើការបំពាក់គ្រឿងបរិក្ខារបន្ថែម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧកញ៉ា សួរ វីរៈ បានបញ្ជាក់ថា នៅក្នុងដំណាក់កាលដំបូងនេះ ការវិនិយោគគ្រោងនឹងមានរោងចក្រចំនួន ១០។ បច្ចុប្បន្ន រោងចក្រចំនួន ៣ ត្រូវបានសាងសង់រួចរាល់។ ផលិតផលដែលគ្រោងនឹងផលិតនៅក្នុងបណ្តុំរោងចក្រនេះរួមមាន៖ ប្រេងឆា (ផលិតពីសណ្តែកសៀង និងពោត) ត្រីខកំប៉ុង មី និងគ្រឿងទេសផ្សេងៗដូចជា ទឹកម្ទេស, ប្រេងខ្យង, ម្សៅស៊ុប, និងប៊ីចេងជាដើម។

បន្តចុចអាន៖ ឧកញ៉ា សួរ វីរៈ ផ្ដើមពីអ្នកនាំភ្ញៀវទេសចរដើរលេង រហូតបើកក្រុមហ៊ុនដឹកជញ្ជូន ឈានមុខមួយនៅកម្ពុជា

ដើម្បីគាំទ្របច្ចេកទេសធានាបាននូវគុណភាព លោកឧកញ៉ាបានឲ្យដឹងថា ក្រុមហ៊ុននឹងនាំយកអ្នកជំនាញមកពីក្រៅប្រទេសដូចជា ចិន, ជប៉ុន, អឺរ៉ុប, និងអាមេរិក ដើម្បីបង្រៀនដល់ក្រុមការងារក្នុងស្រុក។ លើសពីនេះ ក្រុមហ៊ុនក៏បានពិភាក្សាជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីទទួលបានទិន្នន័យបន្ថែមថា តើកម្ពុជានៅខ្វះខាតមុខម្ហូបឬផលិតផលចាំបាច់ណាខ្លះ ដើម្បីផលិតឱ្យស្របតាមតម្រូវការក្នុងស្រុក។

លោករំពឹងថា ផលិតផលដំបូងនឹងអាចត្រូវបញ្ចេញលក់ក្នុងរយៈពេលប្រហែល ៦ ខែខាងមុខទៀត ហើយបន្ទាប់ពីគម្រោងទីមួយទទួលបានជោគជ័យ ក្រុមហ៊ុននឹងបន្តទៅដំណាក់កាលទីពីរបន្តទៀត៕