ព័ត៌មានជាតិ

គិតត្រឹមល្ងាចនេះមានកម្មករធ្វើការនៅរោងចក្រស្តាម៉ាស្ទ័រ & ហ្វ្រែងជិត២០០នាក់មានវិជ្ជមានកូវីដ១៩

បានផុស

៥ years មុន

នៅ

ថ្ងៃសៅរ៍ ២៤ មេសា ២០២១

ដោយ

លោក វេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាលខេត្តកណ្តាលបានឲ្យដឹងថា គិតត្រឹមល្ងាចថ្ងៃទី២៤មេសា នេះក្រុមគ្រូពេទ្យបានធ្វើតេស្តតាមរយៈឧបករណ៍តេស្តសំណាក Rapid Test ទៅលើកម្មករធ្វើការនៅរោងចក្រស្តាម៉ាស្ទ័រ & ហ្វ្រែង (ខេមបូឌា) មានទីតាំងស្ថិតនៅ ឃុំពើក ស្រុកអង្គស្នួល ខេត្តកណ្តាល សរុបចំនួន១០១៣នាក់ ក្នុងនោះមានវិជ្ជមានកូវីដ១៩បឋមចំនួន១៩៧នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា ក្រុមការងារបានបញ្ជូនសំណាកទាំងនោះទៅធ្វើវិភាគបញ្ជាក់បន្ថែមនៅវិទ្យាស្ថានជាតិសុខភាពសាធារណៈដើម្បីឲ្យប្រាកដប្រជាថាពួកគេមានវិជ្ជមានកូវីដ១៩។

លោកបានបន្តទៀតថា បន្ទាប់ពីយកសំណាកកម្មករនៅរោងចក្រស្តាម៉ាស្ទ័រ & ហ្វ្រែង (ខេមបូឌា)រួចហើយក្រុមគ្រូពេទ្យយើងបានបន្តយកសំណាកកម្មករនៅក្បែររោងចក្រពៅឃើ ដែលមានទីតាំងនៅជិតនោះបានជាង១០០នាក់ទៀត ដោយប្រើប្រាស់ឧបករណ៍តេស្តសំណាក Rapid Testហើយជាលទ្ធផលបឋមរកឃើញប្រមាណជាង១០នាក់មានវិជ្ជមានកូវីដ១៩ជាបឋម។

លោក វេជ្ជបណ្ឌិត គួយ ប៊ុនធឿន បានបន្ថែមថា នៅថ្ងៃស្អែកក្រុមគ្រូពេទ្យនឹងបន្តចុះយកសំណាកនៅរោងចក្រចំនួន៤ផ្សេងទៀតផងដែរ។

សំណាកកម្មករធ្វើការនៅរោងចក្រមួយទៀតឈ្មោះSix Plus ស្ថិតនៅ ឃុំព្រែកអញ្ចាញ ស្រុកមុខកំពូល ខេត្តកណ្តាលដោយសារមានកម្មករម្នាក់មានឆ្លងជំងឺកូវីដ១៩។

គួរបញ្ជាក់ថា មានកម្មករនិយោជិតចំនួន ២២៥ នាក់ទៀតមានជាប់ពាក់ព័ន្ធដោយផ្ទាល់ ព្រមទាំងកម្មករនិយោជិតចំនួន ៧១៨នាក់ ពាក់ព័ន្ធដោយប្រយោល លើចំនួនកម្មករនិយោជិតសរុប ចំនួន ៩៦៣នាក់។ រីឯរោងចក្រ Six Plus វិញមានវិជ្ជមាន ០១ករណី និងកម្មករ និយោជិតប្រមាណ ៧០នាក់ផ្សេងទៀតជាប់ពាក់ព័ន្ធដោយផ្ទាល់។

លោក គង់ សោភ័ណ្ឌ អភិបាលខេត្តកណ្តាលបញ្ជាឲ្យ ផ្អាកដំណើរការសង្វាក់ផលិតកម្មជាបណ្តោះអាសន្នរោងចក្រស្តាម៉ាស្ទ័រ & ហ្វ្រែង (ខេមបូឌា)និងរោងចក្រSix Plus ស្ថិតនៅ ឃុំព្រែកអញ្ចាញ ស្រុកមុខកំពូល ខេត្តកណ្តាលដោយសារមានកម្មករម្នាក់មានឆ្លងជំងឺកូវីដ១៩និងមានអ្នកពាក់ព័ន្ធ៧០នាក់ ហើយបងប្អូនកម្មករនិយោជិតទាំងអស់ ត្រូវតាមដានសុខភាព និងផ្តល់ព័ត៌មានអំពីស្ថានភាពសុខភាពរបស់ខ្លួន ទៅរដ្ឋបាលរោងចក្រ និងអាជ្ញាធរមូលដ្ឋានឲ្យបានជាប់ជាប្រចាំ ក្នុងអំឡុងពេលនៃការផ្អាកការងារនេះ រដ្ឋបាលស្រុក និង ម្ចាស់រោងចក្រ ត្រូវសហការបាញ់ថ្នាំសម្លាប់មេរោគ នៅតាមអាគារផលិតកម្មនានា និងតាមបរិវេណក្រៅរោងចក្រ៕

ដោយ ៖ សំអឿន