លោក អ៊ុច បូររិទ្ធ ជំរុញឱ្យមានការបន្តដុះខាត់សមត្ថភាពមន្ត្រីអគ្គលេខាធិការដ្ឋានព្រឹទ្ធសភា

ប្រធានស្ដីទីព្រឹទ្ធសភា លោក អ៊ុច បូររិទ្ធ បានជំរុញដល់អគ្គលេខាធិការដ្ឋានព្រឹទ្ធសភាឱ្យបន្តយកចិត្តទុកដាក់ក្នុងការលើកកម្ពស់ប្រសិទ្ធភាពការងារបន្ថែមទៀត តាមរយៈការបន្តដុះខាត់នូវសមត្ថភាពរបស់មន្ត្រី ទាំងលើចំណេះដឹង និងចំណេះធ្វើ រួមទាំងជំនាញភាសាបរទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើម្បីលើកកម្ពស់ប្រសិទ្ធភាពការងារ លោក អ៊ុច បូររិទ្ធ បាននិយាយថា យើងត្រូវបន្តលើកកម្ពស់សមត្ថភាពរបស់ខ្លួនជាប់ជាប្រចាំ តាមរយៈការដុះខាត់ចំណេះដឹង ចំណេះធ្វើ និងផ្នែកភាសាបរទេស។ លើសពីការពង្រឹងសមត្ថភាព លោក ថា ពុំទាន់គ្រប់គ្រាន់នោះទេ ដោយត្រូវមានស្មារតីខិតខំ តស៊ូ ព្យាយាម និងការទទួលខុសត្រូវចំពោះតួនាទី និងការងារដែលខ្លួនរ៉ាប់រងថែមទៀត។

ការលើកឡើងរបស់ប្រធានស្ដីទីព្រឹទ្ធសភា បានធ្វើឡើងក្នុងពេលដែលលោកដឹកនាំកិច្ចប្រជុំបូកសរុបលទ្ធផលការងារប្រចាំឆ្នាំរបស់អគ្គលេខាធិការដ្ឋានព្រឹទ្ធសភា កាលពីរសៀលថ្ងៃទី១២ ខែមីនា ឆ្នាំ២០២៦ នៅវិមានសាមគ្គីភាព។ ក្នុងកិច្ចប្រជុំ ដែលមានវត្តមានថ្នាក់ដឹកនាំនៃអង្គភាពចំណុះអគ្គលេខាធិការដ្ឋានព្រឹទ្ធសភា លោក សង្កត់ធ្ងន់ថា យើងម្នាក់ៗមានតួនាទីភារកិច្ចបម្រើជាតិមាតុភូមិ និងប្រជាជន ហើយការខិតខំប្រឹងប្រែងរបស់យើង ក៏ជាការឆ្លុះបញ្ចាំងពីមនសិកាស្នេហាជាតិផងដែរ។

ប្រធានស្តីទីព្រឹទ្ធសភា ក៏បានណែនាំដល់អគ្គលេខាធិការដ្ឋានព្រឹទ្ធសភា និងអង្គភាពពាក់ព័ន្ធ ឱ្យពិនិត្យពិចារណាឡើងវិញក្នុងការកែលម្អរចនាសម្ព័ន្ធការងារ ដើម្បីឱ្យស្របទៅនឹងសភាពការណ៍វិវត្តន៍ និងទំហំការងារ ដែលមានការកើនឡើង ជាពិសេសចំពោះមុខត្រូវយកចិត្តទុកដាក់ក្នុងការចូលរួមរៀបចំកិច្ចប្រជុំអន្តរសភាសំខាន់ៗដែលកម្ពុជានឹងធ្វើជាម្ចាស់ផ្ទះ។

តាមលោក អ៊ុច បូររិទ្ធ ក្នុងឆ្នាំនេះ កម្ពុជានឹងធ្វើជាម្ចាស់ផ្ទះសម្រាប់ការរៀបចំកិច្ចប្រជុំគណៈកម្មការនយោបាយនៃសភាប្រើភាសាបារាំង (APF) នៅខេត្តសៀមរាប ការរៀបចំសន្និសីទប្រធានសភានៃអន្តរសភា (ISC) និងការចូលរួមចំណែករបស់ព្រឹទ្ធសភានៅក្នុងការធ្វើជាម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនី។

លោក អ៊ុច បូររិទ្ធ បានវាយតម្លៃខ្ពស់ចំពោះថ្នាក់ដឹកនាំ និងមន្ត្រី បុគ្គលិកទាំងអស់នៃអគ្គលេខាធិការដ្ឋានព្រឹទ្ធសភា ដែលបានរួមសាមគ្គីគ្នាសម្រេចលទ្ធផលដ៏គួរឱ្យកត់សម្គាល់នាឆ្នាំកន្លងទៅ ហើយលោក ឱ្យបន្តលើកកម្ពស់ស្មារតីសាមគ្គី និងសហការគ្នានេះទៀត ដើម្បីសម្រេចទិសដៅការងារ និងលើកកម្ពស់កិត្យានុភាពស្ថាប័នបន្ថែមទៀត។

នៅក្នុងកិច្ចប្រជុំខាងលើ លោក ឡាយ សំកុល អគ្គលេខាធិការព្រឹទ្ធសភា បានប្រកាសដាក់ចេញផែនការសំខាន់ៗនៅក្នុងឆ្នាំ២០២៦ រួមមានការពិនិត្យឡើងវិញនូវការប្រព្រឹត្តទៅនៃអគ្គលេខាធិការដ្ឋានព្រឹទ្ធសភា ការបន្តដោះស្រាយ និងបំពេញតម្រូវការផ្សេងៗរបស់ស្ថាប័ន ការអភិវឌ្ឍធនធានមនុស្ស ជាពិសេសការរៀបចំសូចនាករដែលអាចវាស់វែង និងវាយតម្លៃបាន ដើម្បីរៀបចំផែនការយុទ្ធសាស្រ្តសម្រាប់ឆ្នាំ២០២៧-២០៣០៕