រដ្ឋមន្ត្រីសុខាភិបាល ណែនាំដល់មន្រ្តីនាយកដ្ឋាន និងមន្ទីរពេទ្យ ពង្រឹងប្រសិទ្ធភាពការងារ តម្លាភាព និងសុចរិតភាព

លោក ឈាង រ៉ា រដ្ឋមន្រ្តីក្រសួងសុខាភិបាល បានណែនាំដល់មន្រ្តីនាយកដ្ឋាន និងមន្ទីរពេទ្យ ចូលរួមពង្រឹងប្រសិទ្ធភាពការងារ តម្លាភាព និងសុចរិតភាព។ ការណែនាំនេះ ធ្វើឡើងក្នុងកិច្ចប្រជុំជាមួយថ្នាក់ដឹកនាំ មន្រ្តីរាជការ បុគ្គលិកនៃនាយកដ្ឋានធនធានមនុស្ស និងលោក លោកស្រី ប្រធាន អនុប្រធានការិយាល័យរដ្ឋបាល បុគ្គលិកនៃមន្ទីរពេទ្យជាតិទាំងអស់ នៅទីស្តីការក្រសួងសុខាភិបាល នាថ្ងៃទី១៨ ខែមីនា ឆ្នាំ២០២៦។

គោលបំណងនៃកិច្ចប្រជុំនេះ ដើម្បីពង្រឹងការអនុវត្តការងារឱ្យកាន់តែមានប្រសិទ្ធភាព ដោយមនសិការវិជ្ជាជីវៈ ឆន្ទៈមុះមុត ដោយប្រកាន់ខ្ជាប់នូវក្រមសីលធម៌វិជ្ជាជីវៈ ព្រមទាំងការចូលរួមយ៉ាងសកម្ម ក្នុងការបម្រើសុខភាពជូនប្រជាពលរដ្ឋ ប្រកបដោយប្រសិទ្ធភាព ស័ក្តិសិទ្ធភាព សុវត្ថិភាព និងសមធម៌។

បន្ថែមពីនេះ លោកក៏បានណែនាំដល់មន្រ្តីនាយកដ្ឋាន និងមន្ទីរពេទ្យយកទៅអនុវត្តបន្ត ដូចជា ការគ្រប់គ្រងធនធានមនុស្ស ត្រូវអនុវត្តតាមច្បាប់ លិខិតបទដ្ឋានគតិយុត្ត ស្របតាមគោលការណ៍ និងនីតិវិធី សំដៅប្រមូលផ្តុំធនធានមនុស្សសុខាភិបាលប្រកបដោយសមត្ថភាព ដើម្បីលើកកម្ពស់គុណភាពសេវាសុខាភិបាលឱ្យកាន់តែប្រសើរឡើងបន្ថែមទៀត។ លើកកម្ពស់គុណភាពនៃការអប់រំ បណ្តុះបណ្តាលវិជ្ជាជីវៈសុខាភិបាល និងការអភិវឌ្ឍវិជ្ជាជីវៈបន្ត សម្រាប់ផ្តល់ធនធានមនុស្សសុខាភិបាលនូវសមត្ថភាព ជំនាញចម្រុះ និងចំណេះដឹង។

លើសពីនេះ ត្រូវពង្រឹងអភិបាលកិច្ច និងភាពជាអ្នកដឹកនាំ ក្នុងការជ្រើសរើសបុគ្គលិកសុខាភិបាល និងការបែងចែក ការរក្សាទុក និយ័តកម្ម និងការវាយតម្លៃសមិទ្ធកម្ម។ ការផ្តល់បរិយាកាសការងារសមស្រប សុវត្ថិភាព និងកត្តាជំរុញ ដើម្បីលើកទឹកចិត្តដល់បុគ្គលិក សុខាភិបាល ធ្វើការឱ្យអស់ពីសក្តានុពល ដែលជំរុញឆ្ពោះទៅរកគុណភាពសេវាសុខាភិបាល និងសហការជាមួយក្រសួង ស្ថាប័នពាក់ព័ន្ធ ប្រកបដោយប្រសិទ្ធភាព និងជំហរច្បាស់លាស់៕