ក្រូចថ្លុងពូជ​តាម៉ៅ​បាត់ដំបងរសជាតិជូរអែម ល្បីល្បាញ​សាយ​ភាយ​ដល់ទីក្រុងភ្នំពេញ    

ក្រូចថ្លុងពូជតាម៉ៅដែលល្បីថាមានរសជាតិជូរអែមឆ្ងាញ់ ត្រូវ​បាន​នាំ​មក​លក់​ចែកចាយ​នៅទីផ្សារ​​ទីក្រុងភ្នំពេញ ដោយសារតែមានអតិថិជន​កម្មង់ពីអាជីវករក្រុងបាត់ដំបង ព្រោះតែឱជារសឆ្ងាញ់ពិសារ។    

បច្ចុប្បន្នក្រូចថ្លុងពូជតាម៉ៅ កំពុងដាំនៅក្នុងភូមិអូរដំបង និងភូមិអូរស្រឡៅ ស្ថិតក្នុងឃុំអូរដំបង១ ស្រុកសង្កែ ខេត្តបាត់ដំបង ដោយសារតែប្រជាកសិករនៅក្នុងតំបន់នោះនិយមចូលចិត្តដាំពូជក្រូចថ្លុងនេះ បើទោះបីជាក្រូចថ្លុងមានពូជច្រើនមុខក៏ដោយ ក៏រសជាតិមិនលើសពូជតែម៉ៅនេះដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី ម៉ន សុខា ជាអ្នកលក់ក្រូចថ្លុងបាននិយាយថា សព្វថ្ងៃអ្នកស្រីលើកផ្លែក្រូចថ្លុងនេះច្រើនមកពីតំបន់អូរដំបងនិងអូរស្រឡៅ ដោយសារតែនៅទីនោះមានប្រជាពលរដ្ឋដាំច្រើន ហើយម្យ៉ាងវិញទៀតទោះបីជាមានពូជផ្សេងក៏ដោយក៏អ្នកស្រីកម្រយកមកលក់ណាស់ ព្រោះវាមិនឆ្ងាញ់ដូចពូជតាម៉ៅជូរអែមនេះឡើយ។    

អ្នកស្រីបានបន្ថែមថា ថ្មីៗនេះមានម៉ូយនៅឯទីក្រុងភ្នំពេញ បានទាក់ទងមកឲ្យផ្ញើក្រូចថ្លុងប្រភេទនេះទៅឲ្យគេម្ដង ៣០០ ផ្លែ ដែលគេលើកយកទៅលក់បន្ត ព្រោះពូជក្រូចនេះឆ្ងាញ់អ្នកទីក្រុងភ្នំពេញក៏និយមចូលចិត្ត។ ដោយឡែកសម្រាប់អ្នកស្រីលក់រាយនៅក្រុងបាត់ដំបងសព្វថ្ងៃក្នុងមួយផ្លែតម្លៃ ៣ ០០០ រៀល ប៉ុន្តែបើអ្នកភ្នំពេញគេទិញយកទៅលក់បន្តអ្នកស្រីក៏បញ្ចុះតម្លៃឲ្យខ្លះដែរ ដើម្បីរកស៊ីជាមួយគ្នាបន្តទៀត ព្រោះការផ្ញើទៅលើកក្រោយនេះគឺជាលើកទី ២ ហើយ ដែលម៉ូយនៅភ្នំពេញកម្មង់យក។  

ជាចុងក្រោយអ្នកស្រីបានផ្ដាំផ្ញើដល់អ្នកដែលនិយមចូលចិត្តពិសារក្រូចថ្លុងគួរពិនិត្យមើលផង ព្រោះបច្ចុប្បន្នមានការនាំចូលពីប្រទេសក្រៅដែលពូជក្រូចថ្លុងនោះមានផ្លែធំៗ ហើយសំបកក្រញូវសាច់ខាងក្នុងពណ៌ក្រហម ប្រៀបដូចជាក្រូចថ្លុងខ្មែរប៉ុន្តែធាតុពិតមិនឆ្ងាញ់ដូចគ្នា​នោះ​ទេ​ ដោយសព្វថ្ងៃមានតែពូជតែម៉ៅតូចល្មម ដែលមានរសជាតិជូរអែមឆ្ងាញ់ពិសា៕

អត្ថបទ : សោ និយមរ័ត្ន