ក្រសួងអប់រំ លើកទឹកចិត្តឱ្យរៀបចំសិក្ខាសាលា និងកិច្ចប្រជុំអនឡាញ សន្សំសំចៃប្រេងនិងអគ្គិសនី

ក្រសួងអប់រំ យុវជន និងកីឡា បានដាក់ចេញសេចក្តីណែនាំដល់បុគ្គលិកអប់រំទាំងថ្នាក់ជាតិ និងក្រោមជាតិ ឱ្យសន្សំសំចៃការប្រើប្រាស់ប្រេងឥន្ទនៈ និងអគ្គិសនី ព្រមទាំងកាត់បន្ថយជាអតិបរមាក្នុងការរៀបចំសិក្ខាសាលា និងកិច្ចប្រជុំដែលត្រូវធ្វើដំណើរឆ្ងាយ ដោយងាកមករៀបចំកិច្ចប្រជុំតាមអនឡាញជំនួសវិញ។

ការណែនាំនេះ ឆ្លើយតបទៅនឹងសារាចររាជរដ្ឋាភិបាលកម្ពុជាស្តីពី «វិធានការសន្សំសំចៃលើ ការប្រើប្រាស់ប្រេងឥន្ធនៈ និងអគ្គិសនី» ក្នុងបរិបទដែលតម្លៃប្រេងឥន្ធនៈកើនឡើងយ៉ាងគំហុកជាសកល ដោយសារបញ្ហាសង្គ្រាមនៅមជ្ឈិមបូព៌ា និងតម្រូវការប្រើប្រាស់អគ្គិសនីមានការកើនឡើងខ្លាំង ដោយសារអាកាសធាតុក្តៅ បានកំពុងប៉ះពាល់ដោយផ្ទាល់ដល់ការប្រើប្រាស់ថាមពលជាទូទៅ។

ដើម្បីចូលរួមអនុវត្តសារាចររបស់រាជរដ្ឋាភិបាល ក្រសួងអប់រំ យុវជន និង កីឡា កាលពីថ្ងៃទី ២៣ ខែមីនា បានណែនាំដល់ថ្នាក់ដឹកនាំ បុគ្គលិកអប់រំទាំងថ្នាក់ជាតិ និងថ្នាក់ក្រោមជាតិ គណៈគ្រប់គ្រង លោកគ្រូ អ្នកគ្រូ និស្សិត និងសិស្សានុសិស្ស នៅតាមគ្រឹះស្ថានសិក្សាសាធារណៈ និងឯកជនគ្រប់កម្រិត ឱ្យចូលរួមអនុវត្តវិធានការ សន្សំសំចៃការប្រើប្រាស់ប្រេងឥន្ធនៈ និងអគ្គិសនី។

ក្នុងនោះ លើកទឹកចិត្តបុគ្គលិកអប់រំ គ្រូបង្រៀន និស្សិត និងសិស្សានុសិស្ស ឱ្យជ្រើសរើសមធ្យោបាយធ្វើដំណើរ សាធារណៈ មធ្យោបាយធ្វើដំណើររួមគ្នា និងជ្រើសរើសមធ្យោបាយធ្វើដំណើរដែលប្រើប្រាស់ប្រេងឥន្ធនៈ តិច ឬមិនប្រើប្រាស់ប្រេងឥន្ធនៈ។ ក្រសួងអប់រំណែនាំថា៖«លើកទឹកចិត្តឱ្យរៀបចំ សិក្ខាសាលានិងកិច្ចប្រជុំតាមប្រព័ន្ធអនឡាញ និងលើកទឹកចិត្តបុគ្គលិកអប់រំ និងគ្រូបង្រៀន ឱ្យប្រើប្រាស់ថាមពលអគ្គិសនីប្រកបដោយប្រសិទ្ធភាព ដោយត្រូវចៀសវាងការប្រើប្រាស់ឧបករណ៍បរិក្ខារអគ្គិសនីណាដែលមិនចាំបាច់»។ បិទភ្លើង កង្ហារ ម៉ាស៊ីនត្រជាក់ កុំព្យូទ័រ ម៉ាស៊ីនហ្វូតូកូពី និងឧបករណ៍បរិក្ខារអគ្គិសនីផ្សេងៗបន្ទាប់ពីបញ្ចប់ការងារ ឬនៅពេលមិនប្រើប្រាស់។

ចំណែក ក្រសួងសេដ្ឋកិច្ច និងហិរញ្ញវត្ថុ ក៏បានសម្រេចកាត់ព្យួរឥណទានចំណាយប្រេងឥន្ធនៈ និងប្រេង​រំអិល​ចំនួន​ ៣០ ភាគរយ នៃឥណទានសរុបរបស់គ្រប់ក្រសួង ​ស្ថាប័នទាំងអស់ ​រួមទាំង ព្រឹទ្ធសភា, រដ្ឋសភា ​និង​ក្រុមប្រឹក្សាធម្មនុញ្ញ ដោយលើកលែងតែក្រសួងការពារជាតិ និងក្រសួង​មហា​ផ្ទៃ ​ក្នុងគោលដៅរក្សាឥណទានទុកសម្រាប់យថាហេតុដែល​មានតម្រូវការប្រេង​ឥន្ធនៈ​បន្ថែម​សម្រាប់​កិច្ចការ​យុទ្ធសាស្ត្ររបស់រាជរដ្ឋាភិបាល៕