កម្ពុជា ច្រានចោលសំណើលុប MOU ឆ្នាំ២០០០ ថាជាការផ្ទុយនឹងច្បាប់អន្តរជាតិ

អ្នកនាំពាក្យរដ្ឋលេខាធិការដ្ឋានកិច្ចការព្រំដែន បានចេញសេចក្តីប្រកាសបដិសេធព័ត៌មាន ដោយច្រានចោលទាំងស្រុងចំពោះការផ្សព្វផ្សាយរបស់សារព័ត៌មានក្នុងស្រុកថៃ ដែលបានលើកឡើងអំពីហេតុផល និងអនុសាសន៍ស្នើឱ្យលុប​ចោល​អនុស្សរណៈយោគយល់ (MOU) ឆ្នាំ២០០០ ពាក់ព័ន្ធនឹងការកំណត់ព្រំដែនរវាងកម្ពុជា-ថៃ។

សេចក្តីប្រកាសបញ្ជាក់ថា ការលើកឡើងរបស់គណៈកម្មាធិការចំពោះកិច្ចព្រឹទ្ធសភាថៃ គឺជាការធ្វើឡើងដោយគ្មានមូលដ្ឋានត្រឹមត្រូវ ផ្ទុយនឹងច្បាប់អន្តរជាតិ និងមានចេតនានយោបាយ ដែលអាចបំផ្លាញសមិទ្ធផលនានា ដែលភាគីទាំងពីរបានសម្រេចតាមរយៈយន្តការគណៈកម្មការព្រំដែនរួម (JBC) ក្នុងអតីតកាល។

តាមការពន្យល់របស់អ្នកនាំពាក្យ MOU ឆ្នាំ២០០០ គឺជាកិច្ចព្រមព្រៀងទ្វេភាគីដែលមានសុពលភាពច្បាប់អន្តរជាតិ បានចុះហត្ថលេខារួច និងចុះបញ្ជីនៅលេខាធិការដ្ឋានអង្គការសហប្រជាជាតិ ហើយបង្កើតកាតព្វកិច្ចច្បាប់សម្រាប់ភាគីទាំងពីរ ក្នុងការដោះស្រាយបញ្ហាព្រំដែនដោយសន្តិវិធីតាមរយៈយន្តការ JBC។

សេចក្តីប្រកាសបន្ថែមថា តាមគោលការណ៍ច្បាប់អន្តរជាតិ ភាគីណាមួយមិនអាចយកច្បាប់ ឬនីតិវិធីផ្ទៃក្នុងរបស់ខ្លួន មកធ្វើជាមូលហេតុសម្រាប់លុបចោលកិច្ចព្រមព្រៀងអន្តរជាតិបានឡើយ ជាពិសេសកិច្ចព្រមព្រៀងពាក់ព័ន្ធនឹងបញ្ហាព្រំដែន ដូចដែលបានកំណត់ក្នុងអនុសញ្ញាទីក្រុងវីយែន ឆ្នាំ១៩៦៩ ស្តីពីច្បាប់សន្ធិសញ្ញា។

ក្នុងនោះដែរ អ្នកនាំពាក្យបានលើកឡើងពីសមិទ្ធផលសំខាន់ៗដែលសម្រេចបានតាមរយៈយន្តការ JBC រួមមាន ការស្វែងរកទីតាំងពិតប្រាកដនៃបង្គោលព្រំដែនសម័យបារាំងចំនួន៧៤ ការជួសជុល និងថែទាំបង្គោលព្រំដែន ការវាស់វែង និងបោះបង្គោលបណ្តោះអាសន្ន ព្រមទាំងការងារបច្ចេកទេសផ្សេងៗទៀត។

ជាមួយគ្នានេះ ភាគីកម្ពុជាបានបញ្ជាក់ថា តែងតែប្រកាន់ខ្ជាប់ការដោះស្រាយបញ្ហាព្រំដែនដោយសន្តិវិធី តាមរយៈយន្តការទ្វេភាគីដែលមានស្រាប់ និងត្រៀមខ្លួនបន្តការងារវាស់វែង និងខណ្ឌសីមាព្រំដែនជាមួយភាគីថៃ ដើម្បីឈានទៅរកការបញ្ចប់ជាស្ថាពរ និងរក្សាសន្តិភាពយូរអង្វែងតាមបណ្តោយព្រំដែន។

ជាសេចក្តីសន្និដ្ឋាន សេចក្តីប្រកាសបានបញ្ជាក់ថា ការលុប MOU ឆ្នាំ២០០០ មិនត្រឹមតែជាការរំលោភច្បាប់អន្តរជាតិប៉ុណ្ណោះទេ ប៉ុន្តែថែមទាំងអាចបង្កឱ្យមានឧបសគ្គដល់ដំណើរការដោះស្រាយបញ្ហាព្រំដែនដោយសន្តិវិធី និងប៉ះពាល់ដល់ការកសាងព្រំដែនដែលមានស្ថិរភាព សន្តិភាព និងអភិវឌ្ឍន៍រវាងប្រទេសទាំងពីរផងដែរ៕