ព័ត៌មានជាតិ

សម្ដេច ឃួន សុដារី ឱ្យសភាតាមដានការអនុវត្តន៍ច្បាប់លើកូនស្នងការរងខេត្តបន្ទាយមានជ័យឱ្យបានដិតដល់

បានផុស

៤ សប្តាហ៍ មុន

នៅ

ថ្ងៃពុធ ១ មេសា ២០២៦

ដោយ

ប្រធានសភាកម្ពុជា សម្ដេចសភាធិបតី ឃួន សុដារី បានឱ្យគណៈកម្មការជំនាញរដ្ឋសភាតាមដានការអនុវត្តច្បាប់របស់រដ្ឋាភិបាលលើកូនស្នងការរងខេត្តបន្ទាយមានជ័យ ដែលបង្កគ្រោះថ្នាក់ចរាចរណ៍បណ្ដាលឱ្យមនុស្ស៦នាក់ស្លាប់ឱ្យបានដិតដល់។ នេះបើតាមការបញ្ជាក់ពីនាយកខុទ្ទកាល័យសម្ដេចប្រធានសភាលោក កែវ ពិសិដ្ឋ។

ប្រាប់អ្នកយកព័ត៌មាននៅវិមានរដ្ឋសភាព្រឹកថ្ងៃទី១ ខែមេសា នេះលោក កែវ ពិសិដ្ឋ បានឱ្យដឹងថាករណីគ្រោះថ្នាក់ចរាចរណ៍ដែលបង្កការខឹងសម្បារពីពលរដ្ឋលើកូនស្នងការរងខេត្តបន្ទាយមានជ័យនេះត្រូវបានសម្ដេចសភាធិបតី ឃួន សុដារី តាមដានយ៉ាងយកចិត្តទុកដាក់ និងជឿជាក់ថារដ្ឋាភិបាលនឹងដោះស្រាយបញ្ហានេះឱ្យបានត្រឹមត្រូវតាមច្បាប់។

លោកថា៖ «តួនាទី Parliamentary oversight ការតាមដានការអនុវត្តច្បាប់នោះ គឺយើងតាមដានទៅឃើញថាជនល្មើសអត់មានបង្ហាញខ្លួន? ហើយច្បាប់មិនបានអនុវត្តន៍ទេ។ នោះជាពេលដែលខាងរដ្ឋសភាអាចកោះអញ្ជើញរដ្ឋាភិបាល ឬតំណាងដែលជាសមាជិករដ្ឋាភិបាលមកបំភ្លឺថាមិចបានករណីហ្នឹងអត់(អនុវត្តន៍)ច្បាប់? តែដំណាក់កាលឥឡូវគឺជាដំណាក់កាលមួយក្នុងនីតិវិធីដំណើរការដែលរដ្ឋាភិបាលកំពុងតែអនុវត្តន៍ដោយយកចិត្តទុកដាក់ហើយ អ៊ីចឹងរដ្ឋសភាកំពុងតែពិនិត្យមើល កំពុងតែយកចិត្តទុកដាក់តាមដានដោយយកចិត្តទុកដាក់ខ្ពស់បំផុត »។

គួរឱ្យដឹងផងដែរថា គ្រោះថ្នាក់ចរាចរណ៍ដែលបង្កឱ្យមនុស្ស៦នាក់ស្លាប់នៅបណ្ដោយផ្លូវជាតិលេខ៥ ក្នុងស្រុកមោងឬស្សី ខេត្តបាត់ដំបង កាលពីថ្ងៃទី២៧ ខែមីនា ឆ្នាំ២០២៦ ត្រូវបានសមត្ថកិច្ចដាក់ការសន្និដ្ឋានលើ ឈ្មោះ ស៊ីវ ជ័យសិដ្ឋ កូនប្រុសរបស់ស្នងការរងខេត្តបន្ទាយមានជ័យលោកផ្កាយមួយ ស៊ីវ សុជាតិ ដែលកំពុងរត់គេចខ្លួនពីការទទួលខុសត្រូវតាមច្បាប់ ខណៈដែលរឿងនេះត្រូវបាននាយករដ្ឋមន្ត្រី សម្ដេចធិបតី ហ៊ុន ម៉ាណែត បញ្ជាឱ្យអគ្គស្នងការនគរបាលជាតិស្រាវជ្រាវរឿងនេះឱ្យបានហ្មត់ចត់បំផុត។ មហាជននៅមិនទាន់អស់កំហឹងនៅឡើយទេរហូតមកដល់ថ្ងៃទី១ ខែមេសា នេះខណៈជនសង្ស័យបន្តគេចខ្លួននៅឡើយ ហើយឪពុកជនសង្ស័យថាមិនដឹងបាត់កូនទៅណា៕